Juray Soura Bible
ଞନଙ୍ଞଙ୍ବର୍ 4
ପୁର୍ତିନ୍ ଆ ପେଲ୍ଲା
ତିସିଲଡ୍ ଞେନ୍ ୟର୍ରନ୍ ଓୟୋଙନ୍ ଆଜାୟ୍ତା ଅଡ଼୍କୋନ୍ ଆଲନୁମ୍ ଅରିର୍ସୋୟମ୍ଡାନ୍ ଗିୟ୍ଲାୟ୍; ଆରି ଗିୟ୍ବା, ଅରିର୍ସୋୟମ୍ଡାନ୍ ଆଡ୍ରେତେଞ୍ଜି ଆମନ୍ରାଜି ୟେୟେଡାତଞ୍ଜି, ଆରି ଆନିଞ୍ଜିଆଡଙ୍ ବନବ୍ୟୋ ଆସନ୍ ଆନ୍ନିଙ୍ତଡ୍; ଆରି, ଆ ଜନୁରୁମରଞ୍ଜି ଆମଙ୍ଲୋଙ୍ ରନପ୍ତିନ୍ ଡକୋ, ବନ୍ଡ ଜନୁରୁନ୍ ଆଡ୍ରେତେଞ୍ଜି ଆମନ୍ରାଜିଆଡଙ୍ ବନବ୍ୟୋ ଆସନ୍ ଆନ୍ନୁଙ୍ତଡ୍ । ନମି ଅମେଙ୍ଲେ ଡକୋନ୍ ଆମନ୍ରାଜି ସିଲଡ୍ ଆମ୍ମୁଙ୍ ଆ ରବୁଏଞ୍ଜି ଆମନ୍ରାଜିଆଡଙ୍ ଞେନ୍ ସେଙ୍କେଲାୟ୍ । ବନ୍ଡ କେନ୍ ବାଗୁଞ୍ଜି ସିଲଡ୍ ଆନା ନମିଆନ୍ତାନ୍ କନୋଡନ୍ ଅନ୍ରଙ୍ ଡେଏଜି ଆରି ଆଙ୍ଗିୟ୍ ଓୟୋଙନ୍ ଆଜାୟ୍ତା ମନଙ୍ତଡନ୍ ଆକାବ୍ବାଡ଼ା ଅନ୍ରଙ୍ ଗିଜେଜି, ଆନିଞ୍ଜି ମନଙ୍ । ସିଲତ୍ତେ ଞେନ୍ ଅଡ଼୍କୋନ୍ ଆକାବ୍ବାଡ଼ା ଡ ଡିଲେ ଆଲନୁମ୍ ଆ କାବ୍ବାଡ଼ାନ୍ ଗିୟ୍ଲାୟ୍ ଡ, ତିଆସନ୍ ମନ୍ରାନ୍ ଆତୟ୍ଲିସିଂଙନ୍ ଆମନ୍ରାଆଡଙ୍ ଇସ୍କତ୍ତାତେ । କେନ୍ଆତେ ମା କାଜାନ୍ ଆରି ରିଙ୍ଗେନ୍ ଗଙ୍ଲେ ଆ ଞରମ୍ତବନ୍ ଅନ୍ତମ୍ । ଉଲ୍ଲୁମରନ୍ ନମି ଆସିଞ୍ଜି କୁନ୍ଡୁବ୍ସିଲନ୍ ଆଜେଲୁନ୍ ଜୋମ୍ତେ ।1 ଅଗୋୟ୍ କାବ୍ବାଡ଼ାନ୍ ଡ ରିଙ୍ଗେନ୍ ଗଙ୍ଲେ ଆଞନମ୍ ବାଗୁ କୁନ୍ଡୁବ୍ସି ସିଲଡ୍ ସନୟୁନ୍ ବାତ୍ତେ ବକୁନ୍ଡୁବ୍ସି ମନଙ୍ । ଆରି ବତର ଞେନ୍ ମେଲ୍ଲେ ଗିୟ୍ଲାୟ୍ ଡ, ଓୟୋଙନ୍ ଆଜାୟ୍ତା ତିଆତେ ଜାୟ୍ କାଜାନ୍; ଆନ୍ନିଙ୍ ଆମନ୍ରା ଆଉଙ୍ସଜନ୍ ଡକୋତନ୍, ଆଅନ୍ତଡ୍, କି ଆବୋଞାଙ୍ତଡ୍, ଡେଲୋଜନଙ୍ଡେନ୍ ଆନିନ୍ ଡିତାନ୍ କାବ୍ବାଡ଼ାତନେ, ବନ୍ଡ ଆନିନ୍ ଆନର୍ଜେନ୍ ବାତ୍ତେ ଆଙ୍ଗିୟ୍ ଅସୟୁମେ । ଆନିନ୍ ବର୍ତନେ, ତିଡେନ୍ ଆନା ଆସନ୍ ଞେନ୍ ସର୍ଡାନେନ୍ ଉମ୍ରେଙ୍ଲେ ଲଗୁନ୍ କାବ୍ବାଡ଼ାନ୍ ଲୁମ୍ତାୟ୍ ? କେନ୍ଆତେ ଜାୟ୍ କାଜାନ୍ ଆରି ଜବ୍ର ପରାନ୍ଡଣ୍ଡନ୍ । ଆବୟ୍ନେନ୍ ସିଲଡ୍ ବାଗୁ ମନ୍ରା ମନଙ୍, ଇନିଆସନ୍ଗାମେଣ୍ତେନ୍ ଆନିଞ୍ଜି ରମ୍ମଙ୍ ରମ୍ମଙ୍ ଆ କାବ୍ବାଡ଼ାଲୋଙ୍ ମନଙ୍ ଜଅନ୍ ଞାଙ୍ତଜି । ଅସମୟ୍ ଆନିଞ୍ଜି ସିଲଡ୍ ବମନ୍ରା ଅକୁଡେନ୍ଡେନ୍ ଆରି ଅବୟ୍ନେ ଆ ଗଡ଼ିନ୍ଆଡଙ୍ ଅବ୍ଡୋତେ; ବନ୍ଡ ଆଉଙ୍ସଜନ୍ ଆଡ୍ରକୋତନ୍ ଆମନ୍ରା ଅକୁଡେନ୍ଡେନ୍ ଆରି ଆନିନ୍ଆଡଙ୍ ଆନବ୍ଡୋ ଆସନ୍ ଆନ୍ନୁଙ୍ତଡ୍ଡେନ୍, ସନୟ୍ପନ୍ ଆଞରାଙ୍ତେନ୍ ଆମନ୍ରା ଅନ୍ତମ୍ । ଆରି, ବାଗୁ ମନ୍ରା ମାୟ୍ଲନ୍ ଲୁଡେଞ୍ଜିଡେନ୍ ଉୟୁବ୍ତଜି; ବନ୍ଡ ଆବୟ୍ନେ ଏଙ୍ଗାଲେ ଅବୁୟୁବ୍ନେ ? ଆଉଙ୍ସଜନ୍ ଆଡ୍ରକୋତନ୍ ଆମନ୍ରାଆଡଙ୍ ଅବ୍ନାରେତେ, ତିଡେନ୍ ବାଗୁ ମନ୍ରା ଆନିନ୍ଆଡଙ୍ ଡୁଲ୍ତିଡ୍ତଞ୍ଜି; ଆରି, ୟାଗିଜଙ୍ରବ୍ ଲୁଆଡନ୍ ଲଜିର୍ ଅନତଡେ । ଅଙ୍ଗା ଆ ବୁଡାକୋୟ୍ ଡ ଏର୍ବନୁଡ୍ଡିନ୍ ଆ ରାଜା ଇନ୍ନିଙ୍ ଞନଙ୍ଞଙ୍ବର୍ ଆଜନନା ଅଜ୍ଜନାଏ, ଆନିନ୍ ଆପାଲ୍ତେଙ୍ ଡୋଲୟ୍ମରନ୍ ଡ ଗିଆନନ୍ ଡକୋନ୍ ଆ ବେଣ୍ତିଆମର୍ ମନଙ୍ । ଇନିଆସନ୍ଗାମେଣ୍ତେନ୍ ଆନିନ୍ ରାଜାନେନ୍ ଆସନ୍ ବଣ୍ଡିସିଙନ୍ ସିଲଡ୍ ଡୁଙ୍ଲନ୍ ଜିର୍ରାୟ୍; ଆରି, ଆନିନ୍ ଆ ରାଜ୍ୟଲୋଙନ୍ ଡୋଲୟ୍ମର୍ କନୋଡନ୍ ଡେଏନ୍ । ଓୟୋଙନ୍ ଆଜାୟ୍ତା ଆତ୍ରଙ୍ଗିୟ୍ତନ୍ ଅଡ଼୍କୋନ୍ ଆପରାନ୍ନାଆଡଙ୍ ଞେନ୍ ଗିୟ୍ଲାୟ୍ ଡ, ଆନିଞ୍ଜି ତି ବେଣ୍ତିଆନ୍, ଅଙ୍ଗା ଅନବ୍ବାଗୁ ଆମନ୍ରା କେନ୍ ଆଡ୍ରକୋନେଲୋଙ୍ ଡୋଲନେ, ଆନିନ୍ ଆଗଡ଼ିନ୍ । ଆନିନ୍ ଅଙ୍ଗା ଆମନ୍ରାଜି ଆସୋଡ଼ାମର୍ ଡେଏନ୍, ତି ଆମନ୍ରାଜି ଡିଡିଲେ ଅରପ୍ତିବୋ; ଡେଲୋଜନଙ୍ଡେନ୍ ଅର୍ସଡୋଙ୍କୋଡ୍ ମନ୍ରାଜି ଆମଙ୍ଲୋଙ୍ ଅସର୍ଡାନେଜି । ଆଜାଡ଼ିନ୍ କେନ୍ ମା କାଜାନ୍ ଆରି ରିଙ୍ଗେନ୍ ଗଙ୍ଲେ ଆଞରମ୍ତେନ୍ ଅନ୍ତମ୍ ।
Source notes (1)
- Footnote ଆଜେଲୁନ୍ ଜୋମ୍ତେ, ଆଗରାମ୍ଗାମ୍ ଆନିନ୍ଡମନ୍ ଆଡଅଙ୍ ଅବ୍ସେଡ୍ତେ
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.