Juray Soura Bible
ଞନଙ୍ଞଙ୍ବର୍ 3
ଅଡ଼୍କୋନ୍ ଆବିସୟ ଆସନ୍ ଡିନ୍ନାନ୍ ଆଗନବ୍ରି
ଅଡ଼୍କୋନ୍ ଆସନ୍ ଡିନ୍ନାନ୍ ଆଗନବ୍ରି, ଆରି ରୁଆଙନ୍ ଆଜାୟ୍ତା ଅଡ଼୍କୋନ୍ ଆକାବ୍ବାଡ଼ା ଡକୋ । କନୋଡନ୍ ଆ ଡିନ୍ନା ଡ ରନବୁ ଡିନ୍ନାନ୍; ଗନୁନ୍ ଆ ଡିନ୍ନା ଡ ପନୁୟନ୍ ଆ ଡିନ୍ନା ଡକୋ । ରନବୁନ୍ ଆଡିନ୍ନା ଡ ମନବ୍ନଙନ୍ ଆଡିନ୍ନା; ପାଲ୍ପାଲନ୍ ଆଡିନ୍ନା ଡ ତନୁବନ୍ ଆଡିନ୍ନା ଡକୋ । ୟେୟେଡାନ୍ ଆଡିନ୍ନା ଡ କନିଜନ୍ ଆଡିନ୍ନା; ଅନିଃୟମନ୍ ଆଡିନ୍ନା ଡ ତଙ୍ସେଙ୍ନେଇଙନ୍ ଆଡିନ୍ନା; ଅରେଙନ୍ ଆସନେଡ୍ ଡିନ୍ନା ଡ ଅରେଙନ୍ ଆ ତନର୍ତୁମ୍ ଡିନ୍ନା; କନୋଣ୍ତୋ ଡିନ୍ନା ଡ କନୋଣ୍ତୋନ୍ ସିଲଡ୍ ଆନ୍ନାନେନ୍ ଆଡିନ୍ନା, ସନାୟ୍ଡଙ୍ ଡିନ୍ନାନ୍ ଡ ଅନବ୍ସେଡ୍ ଡିନ୍ନାନ୍; ଡନକୋ ଡିନ୍ନା ଡ ଅନବ୍ସେଡ୍ ଡିନ୍ନାନ୍; ପନେନ୍ ଆଡିନ୍ନା ଡ ବନଜନ୍ ଆଡିନ୍ନା; କଡ଼ିଙ୍ଲେ ଆଡକୋନେ ଡିନ୍ନା ଡ ବର୍ରନ୍ ଆଡକୋନେ ଡିନ୍ନା; ଡନୁଙ୍ୟମ୍ ଡିନ୍ନାନ୍ ଡ ଏଡ଼ୁର୍ମଡ୍ ଡିନ୍ନାନ୍; ଜୁଜ୍ଜେନେନ୍ ଆଡିନ୍ନା ଡ ସନୟୁ ଡିନ୍ନାନ୍ ଡକୋ ।
ଇସ୍ୱରନ୍ ଆତରିୟେନ୍ ଆକାବ୍ବାଡ଼ା
କାବ୍ବାଡ଼ାମରନ୍ ଆନିନ୍ ଆଲନୁମନ୍ ସିଲଡ୍ ଇନି ଆଲାବ ଞାଙ୍ତେ ? ଇସ୍ୱରନ୍ ମନ୍ରାଅନଞ୍ଜିଆଡଙ୍ ମଗାଡ୍ଲେ ଆଡକୋନେ ଆସନ୍ ଅଙ୍ଗା ଆକାବ୍ବାଡ଼ା ତିୟେଞ୍ଜି, ତିଆତେ ଞେନ୍ ଗିୟ୍ଲାୟ୍ । ଆନିନ୍ ଅଡ଼୍କୋନ୍ ଆବିସୟ୍ ସମୟନ୍ ଅନ୍ରଙ୍ ଡେଏନ୍ ଆମ୍ମୁଙ୍ ମବ୍ନଙ୍ଲେ ସାଡେନ୍ନି; ଆରି ଆନିନ୍ ଆ ଉଗର୍ଲୋଙଞ୍ଜି ଅନ୍ନଞିଡେନ୍ ଡକୋଏନ୍; ଡେଲୋଜନଙ୍ଡେନ୍ ଇସ୍ୱରନ୍ ପର୍ତମ୍ମୁ ସିଲଡ୍ ଅନଞିଡ୍ ଜାୟ୍ ଅଙ୍ଗା ଆ କାବ୍ବାଡ଼ା ଲୁମେନ୍, ମନ୍ରାନ୍ ତିଆତେ ସାୟ୍ଡଙ୍ଲେ ଅରପ୍ତିଏ । ଞେନ୍ ଜନା ଡ, ଆମେଙ୍ମତ୍ତାନ୍ ସର୍ଡାନ୍ ଡ ମନଙ୍ କାବ୍ବାଡ଼ାନ୍ ଆଲନୁମ୍ ସିଲଡ୍ ଆନିଞ୍ଜି ଆରି ଇନ୍ନିଙ୍ ଆକାବ୍ବାଡ଼ା ମନଙ୍ତଡ୍ । ଆରି, ଡିଲେ ମନ୍ରାନ୍ ଆନିନ୍ ଅଡ଼୍କୋନ୍ ଆ କାବ୍ବାଡ଼ାଲୋଙ୍ ଜନୋମନ୍ ଗନାନ୍ ଡ ସର୍ଡାନେନ୍ ଡେତେ, କେନ୍ଆତେ ଇସ୍ୱରନ୍ ଆତନିୟ୍ । ଞେନ୍ ଜନା ଡ, ଇସ୍ୱରନ୍ ଇନିଜି ଅଡ଼୍କୋନ୍ ତୁବ୍ତେ, ତିଆତେ ଆଏଡ଼ର୍ ଆସନ୍; ତିଆତେ ଅବ୍ଗୋଗୋୟ୍ଲେ ଅରପ୍ତିନେ, ଅଡ଼େ ତିଆତେ ଅବସୋୟ୍ଲେ ଅରପ୍ତିନେ; ଆରି ମନ୍ରାଞ୍ଜି ଇସ୍ୱରନ୍ ଆମୁକ୍କାଲୋଙ୍ ଆ ବତଙ୍ନେ ଆସନ୍ ଆନିନ୍ ତିଆତେ ଲୁମେନ୍ । ଇନିଜି ଅଡ଼୍କୋନ୍ ନମି ଡକୋ, ତିଆତେ ଡକୋଏନ୍; ଆରି, ଇନିଜି ଡେତେ, ତିଆତେ ଆମ୍ମୁଙ୍ ମା ଡକୋଏନ୍; ଆରି, ଅଙ୍ଗାତେ ଜିର୍ରେସାଡେନ୍, ଇସ୍ୱରନ୍ ତିଆତେ ଆରି ବତର ସାୟ୍ଡଙ୍ତେ ।
ଅଞିଡ୍ ପନ୍ସୁଆତିନ୍
ଆରି, ଞେନ୍ ଓୟୋଙନ୍ ଆଜାୟ୍ତା ପନ୍ସୁଆତି ଡରକୋନେଲୋଙନ୍ ଗିୟ୍ଲାୟ୍ ଡ, ତେତ୍ତେ ନିୟ୍ ପେଲ୍ଲାନ୍ ଡକୋ, ଆରି ଡରମ୍ମ ଡରକୋନେଲୋଙନ୍ ଗିୟ୍ଲାୟ୍, ତେତ୍ତେ ନିୟ୍ ପେଲ୍ଲାନ୍ ଡକୋ । ଞେନ୍ ଅମଜିଞେନ୍ ବର୍ଡମ୍ଲନାୟ୍, “ଇସ୍ୱରନ୍ ଡରମ୍ମମରନ୍ ଡ ପେଲ୍ଲାମରନ୍ଆଡଙ୍ ପନ୍ସୁଆତିତେ; ଇନିଆସନ୍ଗାମେଣ୍ତେନ୍ ଅଡ଼୍କୋନ୍ ଆବିସୟ ଡ ଅଡ଼୍କୋନ୍ ଆଲନୁମ୍ ଆସନ୍ ଡିନ୍ନାନ୍ ଡକୋ ।” ଞେନ୍ ମନ୍ନେ ମନ୍ନେ ବର୍ରନାୟ୍, “ଇସ୍ୱରନ୍ ଏଙ୍ଗାଲେ ମନ୍ରାଅନଞ୍ଜିଆଡଙ୍ ଅଲ୍ଲ୍ତେ ଆରି ଆନିଞ୍ଜି ଆନିଞ୍ଜିଡମନ୍ ଜନ୍ତୁନ୍ ଅନ୍ତମ୍, କେନ୍ଆତେ ଏଙ୍ଗାଲେ ଆନିଞ୍ଜି ଗିୟ୍ତଜି, ତିଆସନ୍ ଆନିଞ୍ଜି ଆସନ୍ କେନ୍ଆତେ ଗଟେତେ ।” ଇନିଆସନ୍ଗାମେଣ୍ତେନ୍ ମନ୍ରାଅନଞ୍ଜି ଆଡଅଙ୍ ଇନିଜି ଗଟେତେ, ଜନ୍ତୁଞ୍ଜି ଆଡଅଙ୍ ନିୟ୍ ଆବସରିନ୍ ଗଟେତେ; ଅଡ଼୍କୋଞ୍ଜି ଆଡଅଙ୍ ଆବସରିନ୍ ମା ତନଙଡନ୍ ଗଟେତେ; ଆନିନ୍ ଏଙ୍ଗାଲେ ରବୁତେ, ଆନିନ୍ ନିୟ୍ ତିଅନ୍ତମ୍ ରବୁତେ; ଆରି, ଅଡ଼୍କୋଞ୍ଜି ଆ ପରାନ୍ନାରିଙ୍ ଆବୟନ୍; ଆରି, ଜନ୍ତୁନ୍ ସିଲଡ୍ ମନ୍ରାନ୍ ଇନ୍ନିଙ୍ ସୋଡ଼ାତଡ୍; ଇନିଆସନ୍ଗାମେଣ୍ତେନ୍ ଅଡ଼୍କୋନ୍ କାଜାନ୍ । ଅଡ଼୍କୋଞ୍ଜି ଆବୟନ୍ ଆ ଡରକୋନେଲୋଙ୍ ଜିର୍ତଜି; ଅଡ଼୍କୋଞ୍ଜି ଆଉମରିଲନ୍ ସିଲଡ୍ ଜିର୍ରାଜି ଆରି ଅଡ଼୍କୋଞ୍ଜି ଆରି ବତର ଆଉମରିଲଲୋଙନ୍ ମାୟ୍ତନେଜି । ମନ୍ରାନ୍ ଆପୁରାଡ଼ା ତୋଣ୍ତୋ ରୁଆଙନ୍ ଜିର୍ତେ ଆରି ଜନ୍ତୁନ୍ ଆପୁରାଡ଼ା ପୁର୍ତିନ୍ ଆଜାୟ୍ତା ଜିର୍ତେ ଗାମ୍ଲେ ଆନା ଜନାଏ ? ତିଆସନ୍ ମନ୍ରାନ୍ ଆକାବ୍ବାଡ଼ାଡମ୍ଲୋଙନ୍ ସର୍ଡାନେନ୍ ଅମ୍ରେଙ୍ଲେ ଇନ୍ନିଙ୍ ଅଗୋୟ୍ ସୁକ୍କାନ୍ ଅବୟ୍ତଡ୍ ଗାମ୍ଲେ ଞେନ୍ ଗିୟ୍ଲାୟ୍; ଇନିଆସନ୍ଗାମେଣ୍ତେନ୍ କେନ୍ ମା ଆବନ୍ତାନ୍; ଆରି, ତିସିଲଡ୍ ଇନି ଗଟେତେ, ତିଆତେ ଆଗନିୟ୍ ଆସନ୍ ଆନା ଆନିନ୍ଆଡଙ୍ ଆବ୍ୟର୍ରେ ଓରୋଙ୍ଲେ ରପ୍ତିଏ ?
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.