Skip to content
BibleKenya

Isanzu Bible Version

1 Akolinto 13

Ʉlowa

Anga ɨze kʉtambʉla kʉntambʉ niya antʉ nizi niya amalaɨka, ingɨ anga ɨze nʉmʉgila ʉlowa ʉne ntuile anga ʉlʉli nʉla idebe nɨgila anga kɨntʉ ang'wɨ anga mʉntʉ nʉkʉkʉania mazenzele. Hangɨ nihumile kʉtula nɨkɨpegwa kakʉtanantya ʉlʉkani lang'wi Itunda, manye makani ɨhi nag'wi Itunda napihilwe, nihumile ntule nʉhʉɨli nʉkʉhamya ɨmalʉgʉlʉ, ingɨ angaɨze nʉmʉgila ʉlowa tilɨ anga kɨntʉ ʉnene. Anga mpumye maintʉ ɨhi nɨnkete nɨape ɨahimbɨ, hangɨ anga nʉʉpumye ʉmʉɨlɨ nʉwane ʉsonswe moto, angaɨze nʉmʉgila ʉlowa nanso shanga akʉnzaɨlya kɨntʉ kɨhi.

Nʉkete ʉlowa mʉgimya, nʉkete ʉlowa wɨkendepa, mʉntʉ nʉkete ʉlowa mʉgila anga wɨlu, shanga wiketa hangɨ shanga wilolya. Nʉkete ʉlowa shanga wɨduma makani akiaɨɨlya ʉng'wenso du, nʉkete ʉlowa shanga wɨduma nsailo akwe du, hangɨ mʉgila anga ikuo, nʉkete ʉlowa shanga wɨkɨmbʉka nɨmabɨ, mʉntʉ nʉkete ʉlowa shanga wɨlowa ʉbɨ, ingɨ wɨloa nɨtai. Mʉntʉ nʉaloilwe aʉya wɨgimya ɨhi, mʉntʉ nʉaloilwe aʉya wɨahʉɨɨla antʉ angɨɨza, hangɨ wɨhuma maintʉ ɨhi.

Ʉlowa wɨlongoleka, anga ɨze imolɨ ipegwa niya kʉtanantya ʉlʉkani nʉla ng'wi Itunda, niyanso yɨzɨza kɨla lʉhikʉ lʉng'wɨ, anga ɨze ipegwa niyakʉtambʉla ntambʉ nakɨgeni yʉkʉkɨla, anga ɨze ʉkolɨ ʉmanyi nʉwenso ʉkʉkɨla. Kʉnsoko shanga kʉlɨngile maintʉ ɨhi, nɨkɨpegwa kitʉ nɨkakʉtanantya ʉlʉkani lang'wi Itunda shanga kʉlɨngile maintʉ ɨhi, Ingɨ mʉmahikʉ napembilye kʉʉlɨnga makani ɨhi anga nɨlɨ, nɨmakani aya nɨmasheenyu nɨkʉmalɨngile akʉhega.

Naɨ nɨmʉng'enya aɨnɨligitya kɨng'enya, aɨnɨngile kɨng'enya, aɨnɨsɨga kɨng'enya, ingɨ itungo ɨlɨ nɨmʉntʉ mʉkʉlʉ, ɨmakani akɨng'enya akɨile. Itungo ɨlɨ ingɨ shanga kʉʉona maintʉ ɨhi kɨsa, kʉʉona anga ikelʉ nɨlʉkʉzizɨɨla mʉkɨyoo, ingɨ anga akɨle aya kʉiona kɨhenga kʉ ʉsʉ. Itungo ɨlɨ kʉlɨngile iniino ʉdu, ingɨ panyambele kʉʉlɨnga makani ɨhi kɨsa, anga Itunda nʉkʉlɨngile ʉsese.

Itɨ gwa itungo ɨlɨ, akʉlongoleka makani aya nataatʉ, kʉlongoleka kʉmʉhʉɨɨla Itunda nʉ kʉsʉmbɨɨlya kʉsɨngɨɨlya maintʉ kʉpuma kʉng'wi Itunda nʉkʉlongoleka kilowa, nikʉlʉ mʉmakani aya nataatʉ ingɨ ʉlowa.

Isanzu Bible Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.