Biblica® Libre Ang Pulong Sang Dios
Salmo 4
Pagsalig sa Dios
Ang kanta nga ginsulat ni David. Sa direktor sang mga manugkanta: Gamita ang mga instrumento nga may mga kuwerdas.
O Dios nga akon manugpangapin,
sabta ako kon magpanawag ako sa imo.
Indi bala nga ginbuligan mo ako sa akon mga kalisod?
Gani karon, pamatii ang akon mga pangamuyo kag kaluoyi ako.
Kamo nga mga tawo nga nagakontra sa akon,
san-o pa bala kamo mag-untat sa pagpakahuya sang akon dungog?
San-o pa bala kamo mag-untat sa paghigugma sa mga butang nga wala sing pulos
kag sa pagsunod sa kabutigan?1,2
Dumduma ninyo nga ginpili sang Ginoo ang mga diosnon nga mangin iya.
Amo gani nga pamatian niya ako kon magpanawag ako sa iya.
Kon mangakig kamo,3 indi kamo magpakasala.
Kag samtang nagahigda kamo, magpakalinong kamo kag magpamalandong.
Magsalig kamo sa Ginoo
kag maghalad sa iya sing husto nga mga halad.4
Madamo ang nagasiling,
“Ginoo, kabay pa nga mangin bugana ang amon pangabuhi.
Ipakita ang imo kaayo sa amon!”
Pero ang kalipay nga ginahatag mo sa akon,
mas labaw pa sa kalipay sang mga tawo
nga bugana ang ila mga uyas kag duga sang ubas.
Gani sa akon pagtulog indi ako mahadlok
tungod kay ginabantayan mo ako, Ginoo.
Source notes (4)
- Footnote sa paghigugma…kabutigan: Siguro ang buot silingon amo ang pagsimba sa mga dios-dios.
- Footnote Sa Hebreo may sugpon pa nga “sela,” nga indi klaro ang buot silingon. Makita man ini sa bersikulo 4.
- Footnote Kon mangakig kamo: Indi klaro ang buot silingon sang Hebreo sini.
- Footnote maghalad…halad: ukon, maghalad sa iya nga husto ang inyo kabuhi
Biblica® Libre Ang Pulong Sang Dios. Copyright © 1996, 2006, 2011, 2022 Biblica, Inc. Licensed under CC BY-SA 4.0. Ang “Biblica”, kag ang Biblica logo mga trademark nga ginrehistro sang Biblica, Inc sa United States Patent and Trademark Office. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.