Dagiti Salmo 55

1Ipangagmo ti kararagko, O Dios, ken saanmo kadi nga ilemmengan ti ararawko. 2Ipangagnak ket sungbatannak; awan ti inanak kadagiti pakariribukak 3gapu kadagiti timek dagiti kabusorko, gapu iti panangparigat dagiti nadangkes; ta riribuk ti iyegda kaniak ket kapungtotdak. 4Nasaktan unay ti pusok, ken nagtupak kaniak ti alliaw ni patay. 5Panagbuteng ken panagpigerger ti immay kaniak, ket linapunosnak ti buteng. 6Kinunak, “O, no addaanak koma kadagiti payak a kasla iti kalapati! Ket makatayabak koma nga umadayo ken makainana. 7Kitaem, ket innak iti adayo a disso; agtalinaedak idiay let-ang. Selah 8Agdardarasak a mapan iti panglinongan manipud iti napigsa nga angin ken bagio.” 9Dadaelem ida, O Apo, ket dimo pagkikinnaawaten ida, ta makitak ti kinaranggas ken riribuk iti siudad. 10Aldaw ken rabii, lawlawlawenda dagiti paderna; kinadakes ken riribuk ti adda iti tengngana. 11Adda ti kinadangkes iti tengngana; saan a pumanaw kadagiti kalsadana dagiti panangidadanes ken panangallilaw. 12No koma kabusor ti manglalais kaniak, maibturak; uray isuna a gimmura kaniak a nagpannakkel kaniak, mailemmengak. 13Ngem sika, ti tao a kapadpadak, ti kaduak ken nasinged a gayyemko. 14Naaddaanta ti nasam-it a panaglinlinnangen; nagnata iti balay ti Dios agraman ti adu a tattao. 15Kellaat koma nga umay ni patay kadakuada; maipababada koma a sibibiag iti sheol, ta kinadangkes ti pagnanaedanda, iti mismo nga ayanda. 16No maipapan kaniak, umawagakto iti Dios, ket isalakannakto ni Yahweh. 17Agdayengdeng ken umasugak iti rabii, bigat ken agmatuon; ipangagna ti timekko. 18Sitatalged nga ispalenna ti biagko manipud iti gubat a maibusor kaniak, ta adu dagiti bimmusor kaniak. Selah. 19O Dios, a nagturay manipud iti un-unana, denggennakto ken parmekennanto ida. Saan nga agbalbaliw dagidiay a lallaki; saanda nga agbuteng iti Dios. 20Inlayat ti gayyemko dagiti imana kadagiti nakikapia kenkuana; saanna a rinaem ti katulaganda. 21Nalammuyot ti ngiwatna a kas iti mantikilia ngem adda gura ti pusona; naluklukneng ngem iti lana dagiti balikasna, ngem kinapudnona, immasutda kadagiti kampilan. 22Ikamangyo dagiti dadagsenyo kenni Yahweh, ket saranayenakayonto; saanna pulos nga ipalubos a magaraw ti nalinteg a tao. 23Ngem sika, O Dios, ipisokmonto dagiti nadangkes iti abut ti pannakadadael; dagiti mawaw iti dara ken manangallilaw a lallaki ket saanto nga agbiag iti uray kaguddua iti kaatiddog ti panagbiag dagiti dadduma, ngem no siak, agtalekak kenka.