Sálmarnir 138

1Drottinn, ég þakka þér af öllu hjarta! Ég vil lofsyngja þér í áheyrn englanna á himnum. 2Ég vil falla fram fyrir þínu heilaga musteri, þakka þér elsku þína og trúfesti, og loforð þín sem þú hefur innsiglað með þínu mikilfenglega nafni. 3Þegar ég bið, þá heyrir þú bænir mínar, styrkir mig og hughreystir.

4Konungar jarðarinnar skulu þakka þér, Drottinn, því að allir heyra þeir rödd þína. 5Já, þeir skulu syngja um verk Drottins, því að mikil er dýrð hans. 6En þótt Drottinn sé mikill, þá lýtur hann að hinum lítilmótlegu, en hrokafullir halda sig fjarri. 7Þótt ég sé umvafinn erfiðleikum, muntu sjá um að allt fari vel. Þú réttir fram hnefann gegn óvinum mínum. Kraftur þinn mun frelsa mig. 8Drottinn mun leysa úr öllum mínum málum – því að Drottinn, miskunn þín varir að eilífu. Yfirgef mig ekki, því að ég er verk handa þinna.