Mme Saam 56:3

Ake etubom ikwọ. Ekwọ ekeene uyioikwọ “Ibiom ke Afriyo Anyan Usʌñ.” Saam Defid, a-adooho miktam. Ke ini mbon Filistia ekemʌmmọ anye ke Kad.

Akam Mbuọdidem ke Abasi

1Nie mbọm mbaña miin, Abasi mmi,

sia mme mbon usua mmi esịn ifịk embịne miin;

ammọ efiik enam ekọñ ye ami afịd usen.

2Mme asua mmi edumbịnne miin afịd usen;

ke ntañidem ammọ uwak ammọ esʌk enam ekọñ ye ami.

3Ke ini ndịk ammʌmmọ miin, ami nie mbuọdidem mmi ke afo.

4Ke Abasi, ake ami ntooroke ikọ amọ,

ami nnie mbuọdidem ke Abasi ñko ami nnieghe ndịk.

Nsoo ke ñkaña awo abʌkidem akeme adinnam?

5Ammọ edukpakka ikọ mmi afịd usen;

afịd ñkara ammọ ebaña iduọ mmi.

6Ammọ edʌk idiọọk edioomo, edịbe embet,

ammọ eyep ñkpadisañ mmi,

etie ebet adidat uwem mmi.

7Ke ntak ibak ammọ kuuyak ammọ ebọkkọ;

Abasi ke iyadesịd mfo, suuhọ mme idịd nịm.

8Wet ukuud mmi;

wet ibad mmọọñayịd mmi sịn ke ikpañwed mfo,1

nte ammọ isịneke ke ñwed ibad mfo?

9Ndin mme asua mmi eyaetịmme edem

ke ini ami ñkoodo ñyem unwam.

Ke ntom ke ami ndiidiọọñọ ke Abasi ada ye ami.

10Ke Abasi, ake ami ntooroke ikọ amọ,

ke Abọọñ, ake ami ntooroke ikọ amọ,

11ke Abasi ke ami mbuọt idem ñnyʌññọ mfeghe ndịk.

Nsoo ke awo akeme adinnam miin?

12Abasi mmi, ami mba ke idak akaaña unọ fiin;

Ami ñyaunọ fiin mme uwa ekọọm.

13Sia afo amemfak miin asio ke ñkpa

uyakka ukod mmi afiọnnọ,

nọ ami nsaña ke iso Abasi

ke unwana uwem.