Mme Saam 57

Ake etubom ikwọ. Akeene uyioikwọ “Kuusobo.” Saam Defid. Ake miktam. Ke ini anye amaakefeghe abọkkọ Sọọl akedịbe ke abaitiad.

Itooro ye Mbuọdidem Ke Ini Afanekọñ

1Nie mbọm mbaña miin, Abasi mmi, nie mbọm mbaña miin,

sia afo ado itie udịbe mmi.

Ami ñyaadịbe ke ndukpọñ mfuud mba mfo

tutu nsobo aboiyo afep.

2Ami ntua nnọ Abasi Andikoñ Ñkan,

nnọ Abasi, ake antoppoke miin ikpe.

3Anye atie ke hefịn añnyaaña miin

aduat mbon se isịn ifịk imbịne;

Abasi annọ ima ye akpanikọ amọ.

4Ami mba ke ufọọd mme ekpe;

eñkpak miin ñkedʌñ ke atu mme ndiọi unam,

ideen se eded ammọ eba nte eduad ye utịgha,

ake edeme ammọ e-edooho ubaban akañkañ.

5O Abasi, bọ ubọọñ, koñ kan mme hefịn;

yak ubọọñ mfo ayọhọ afịd ekondo.

6Ammọ etat iyịre enịm edikọp ukod mmi,

mfʌhọ amañyọhọ miin idem.

Ammọ etịppe ube ke usʌñisañ mmi,

ado ammọ eduọññọ edọñọ do ke idem ammọ.

7O Abasi, esịd mmi anie iwuuk,

esịd mmi anie iwuuk;

ami ñyaakwọ ikwọ ñnyʌñ nsio ñkpo ikwọ.

8Ukpọñ mmi, demme!

Hab ye ndidoudʌk, idemme!

Ami ñyaademme usiere.

9Abọọñ, ami ñyautooro fiin, ke atu mme idịd.

Ami ñyaakwọ ubaña fiin ke atu mbon awo.

10Sia ima mfo akpon, tutu akewuọ mme hefịn;

akpanikọ mfo asịm mme ikpaanyọñ.

11O Abasi, bọ ubọọñ, koñ kan mme hefịn;

yak ubọọñ mfo ayọhọ afịd ekondo.