Mme Saam 4

Anye ami anie adadusʌñ ke ikwọ.Ye mme ndido udʌk. Saam Defid.

Akam Ndubiayio

1Ñyie miin ke ini ami mma ukoot fiin,

Adinen Abasi mmi.

Mbappa miin mbaba sio ke ukuud mmi;

ntua miin mbọm nyʌñ kop akam mmi.

2Adaña die ke ndufo ediinam ubọọñ mmi akappa ñkpọ abuud?

Adaña die ke ndufo ediima ndukpọñ-ndukpọñ ñkpọ enyʌñ eyem mme nsu-nsu abasi?

3Ndufo idiọọñọ ibo ke Abọọñ asio anam akpanikọ awo utom amọ anịm asaña-asaña anọ idem amọ;

Abọọñ akop ke ini ami ñkoodo anye.

4Iba ke uteeñe ikiinam idiọọkñkpọ;

ke ini ndufo enaaha ke ñkpana ndufo,

iduuñọ esịd ndufo inyʌñ iba ke ndobuyio.

5Iwa mme uwa ndinen awo

inyʌñ ibuọt idem ke Abọọñ.

6Abọọñ, uwak awo esʌk ebịp ebo, “Anie adiidat uforo isọk ñnyịn?”

Yak unwana iso mfo ayama inọ ñnyịn.

7Yọhọ esịd mmi ye idaara

ke ini abakpa ye ufa ukọd ammọ eyọhọke isọñ.

8Ami ñyaasuuk nnaa ndaiya ke emem,

sia afo, Abọọñ, ikpọọñ,

anam nọ mba ke ifuuro.