Mme Saam 119:105

Alef

1Afọfọn anọ mbon ake usʌñ ammọ imiinieghe ndo,

e-esañake naña mbed Abọọñ atemme.

2Afọfọn anọ mbon enịmme ewʌhọ amọ

enyʌñ eyem anye ke afịd esịd ammọ,

3ammọ inamma idiọọk ndomokeed

ado ekeene usʌñ amọ.

4Afo amenie mme ewʌhọ ake afo anịmme

a-anaaha nte ekpono ayọhọ-ayọhọ.

5O, usʌñ mmi akpekap anie iwuuk

ke adikop item nnọọ mme ewʌhọ mfo.

6Ndọk idinsịmme miin

ke ini ami ñkereke mbaña afịd mbed mfo.

7Ami ñyautooro fiin ke esịd akpanikọ

ke idaha ñkpeebe ndinen mbed mfo.

8Ami ñyaanịm mme ewʌhọ mfo,

kuusioño idem uñkpọñ miin afịd-afịd.

Bed

9Iwaad adiinam die iba ke usʌñ adinenido?

Ado adidu uwem ñkeene ikọ mfo.

10Ami uyem fiin ke afịd esịd mmi;

kuuyak ami ñwuọ ñkpọñ usʌñ mfo.

11Ami mmedịp ikọ mfo ke esịd mmi

mbaak ami ndinam idiọọkñkpọ.

12Itooro unie fiin, Abọọñ;

ñkpeep miin ewʌhọ mfo.

13Ke ñkpọkinua mmi, ami ñyaamaana mbat

afịd mme mbed e-etooho inua mfo.

14Ami mmenem esịd adikeene ewʌhọ mfo,

nte awo anem esịd ke uwak inie.

15Ami mmekere mbaña mme ukpeebñkpọ mfo

ñnyʌñ ñkere usʌñ mfo.

16Ami mmenem esịd ke mme ewʌhọ mfo;

Ami ndiikpọññọ ikọ mfo.

Kimel

17Fọn ido ye ayịnufọk mfo ke ini ami mbaaha ke uwem,

nọ ami ñkop item ikọ mfo

18Tat anyen mmi nọ ami ñkịt

mme utịppeñkpọ e-ebaaha ke mbed mfo.

19Ami ndo asenawo ke ederimbod;

kundịp miin mbed mfo.

20Ukpọñ mmi ayọhọ ke adiyem

mme mbed mfo afịd ini.

21Afo amesua anọ mbon ntañidem, mbon se esuuñọ,

mbon e-etịnne ekpọñ mme mbed mfo.

22Nsio miin fep ke ñnyọọ ye emiom ammọ;

sia ami mmenịm mme ewʌhọ mfo.

23Akpesʌkado mme mbọọñ etieghe keed embʌkkọ miin,

ayịnufọk mfo ayaakere abaña mme ewʌhọ mfo.

24Mme mbed mfo edo inemesịd mmi;

ammọ edoñño mme anọitem mmi.

Daled

25Ensuuk miin enịm ke ntọñ;

mʌm uwem mmi kama akeene ikọ mfo.

26Ami mmaanam ibad eduuwem mmi ndin afo ambọọrọ miin;

ñkpeep miin mme ewʌhọ mfo.

27Nam yak mme usʌñ mbed mfo añnwaña miin,

nọ ami ñkere mbaña utịppe adinam mfo.

28Ukpọñ mmi aba ke mfʌhọ;

ben ikọ mfo nsọọñọ miin idem.

29Mben miin sio ke usʌñ abiaña;

nnọ miin mfọn mfo nyʌñ ñkpeep miin mbed mfo.

30Ami mmemek usʌñ akpanikọ;

ami mmewuuk esịd mmi ke mbed mfo.

31Abọọñ, ami mmemʌm mbed mfo ñkama;

kuuyak ami ndia ndọk.

32Ami mfeghe ke usʌñ mbed mfo

sia afo amenam ñkpọ anekke añnwaña miin.

He

33Abọọñ ñkpeep miin usʌñ ewʌhọ mfo,

nọ ami ñkeene anye ñkewuọ akpatre.

34Nnọ miin mbufiọk nọ ami ñkan nnịm mbed mfo

ñnyʌñ ñkop item ke afịd esịd mmi.

35Ndat miin usʌñ ke ido mfo,

sia do ke ami ñkịt inemesịd.

36Wọññọ esịd mmi wọt mme mbed mfo

idooho ñkañ udod idem mmi.

37Wọññọ anyen mmi kpọñ usʌñ ñkpọ i-imiibaaha ufọn;

mʌm uwem mmi kama ke ikọ mfo.

38Nam enwọñọ ake afo akenwọñọke anọọ nditọufọk mfo,

nọ ato do ubaak fiin.

39Ben asuenne ami mfegheke sio,

sia mme mbed mfo afọn.

40Se naña ami ñyem mme mbed mfo!

Ke adinenido mfo mʌm uwem mmi kama.

Waw

41Abọọñ, yak nsọọñọnda ima mfo adi ambịne miin,

adinyaaña mfo, naña enwọñọ mfo ado;

42ndin ami ñyaabọọrọ awo akeedodo andọọñọ miin ndọk,

sia ami mmenie mbuọdidem ke ikọ mfo.

43Kuusio ikọ akpanikọ mfo ke inua mmi,

sia ami mmesịn idodanyen mmi ke mme mbed mfo.

44Ami ñyaakaa iso nnịm mbed mfo afịd ini,

ke nsi-nsi nsi-nsi.

45Ami ñyaasaña naña mmama,

sia ami mmeyeem mme mbed mfo.

46Ami ñyaatañ mbaña mme mbed mfo ke iso ndidem

ñko ami ndiidiaha ndọk,

47ami mmekop inem ke mme mbed mfo

sia ami mmema ammọ.

48Ami mmeyem mme mbed mfo, ake ami mmaaha,

nọ ami ñkere ke isọñ esịd mmi mbaña mme ewʌhọ mfo.

Sayịn

49Toiyo ikọ ake afo akenọọhọ ayịnufọk mfo,

sia afo amennọ miin idodanyen.

50Idọñesịd ke ufen ami mbọọhọ ado ami:

Enwọñọ mfo ayaamʌm uwem mmi akama.

51Mbon ñkịdidem ennọ ñnyọọ intuaha mbọm,

ado ami ndiitịmmeke ñkpọñ mbed mfo.

52Abọọñ, ami mmetoiyo mme mbed mfo ake esed,

ñko ami mmekịt idọñesịd ke ammọ.

53Ami nnie mbʌññọesịd ke ntak mbon ibak,

ake ewuọhọ ekpọñ mbed mfo.

54Mme ewʌhọ mfo edoñño iwuod ikọ ikwọ mmi

ke itie akeedodo ami mbaaha.

55Abọọñ, ami mmetoiyo anyịñ mfo ke akonayio,

nọ ato do ami ñkan nnịm mbed mfo.

56Naña ami nsinam ado ado;

ami mmekop item ake mme mbed mfo.

Hed

57Abọọñ, afo ado udeeme mmi,

ami mmenam enwọñọ adikop mme ikọ mfo.

58Ami mmeyem iso mfo ke afịd esịd mmi;

nie mbọm mbaña miin keene naña enwọñọ mfo ado.

59Ami mmetịm nse usʌñ mmi

ñnyʌñ ñkanna ikpadisañ mmi ñwọt mme mbed mfo.

60Ami ñyaasọp idem, ñko ndiibiatta ini

adikpono mme ewʌhọ mfo.

61Akpesʌkado mbon ibak embọppọ miin ke udʌk,

ami ndiifreke mbed mfo.

62Ke ufọọd akonayio, ami ndakka nda adunọ fiin ekọọm

ke mme ndinen mbed mfo.

63Ami ndo ufan nnọ afịd mbon se ubaak fiin,

ye mbon e-ekeeneke mme mbed mfo.

64Abọọñ, ederimbod ayọhọ ye ima mfo,

ñkpeep miin mme ewʌhọ mfo.

Ted

65Abọọñ, nam eti ñkpọ nọ ayịnufọk mfo

akeene naña asịne ke ikọ mfo.

66Ñkpeep miin ifiọk ye eti ubiideikpe,

sia ami mmenie mbuọdidem ke mme mbed mfo.

67Mbemiso ekennọ ufen, ami mmaawuọ ñkpọñ usʌñ,

ado idahami ami mmekop item ikọ mfo.

68Afo amefọn, ñko se afo anam afọn;

ñkpeep miin mme ewʌhọ mfo.

69Akpesʌkado mbon ñkịdidem emfiọññọ miin nsu,

ami mmenịm mme mbed mfo ke afịd esịd mmi.

70Esịd ammọ amaadodo ufiọn inyʌññọ inie mbọm,

ado ami ndat esịd ke mbed mfo.

71Amaafọn naña ekennọọ ukuud

nọ ami ñkpeep mme ewʌhọ mfo.

72Mbed a-atooho inua mfo asọñ udua annọ miin

akan mme tọsịn mbaak silfa ye kold.

Yod

73Ubọk mfo akembot miin anyʌñ annam miin;

nnọ miin ifiọk adikpeep mme ewʌhọ mfo.

74Yak mbon se ubaak fiin edaara ke ini ammọ eñkịtte miin,

sia ami nsịn idodanyen mmi ke ikọ mfo.

75Abọọñ, ami mmediọọñọ, ke mme mbed mfo edoñño ndinen,

ndin ke akpanikọ ke afo amentʌkkọ miin.

76Yak nsọọñọ nda ima mfo ado idọñesịd annọ miin,

akeene naña akenwọñọ anọọ ayịnufọk mfo.

77Yak ima mfo adi ambịne miin nọ ami ndu uwem,

sia ikọ mfo ado idadesịd mmi.

78Yak mbon ñkịdidem edia abuud ke ntak ammọ ennamma miin se imiifọnnọ ke unana ntak;

ado ami ñyaasịn akikere ke mme mbed mfo.

79Yak mbon se ubaak fiin ekanna embịne miin,

mbon ake mme mbed mfo anwañake.

80Yak ami ñkeene mme ewʌhọ mfo ke afịd esịd mmi,

mbaak ami ndidia ndọk.

Kaf

81Esịd mmi aduọ ke ami adiyem adinyaaña mfo,

ado ami mmesịn idodanyen mmi ke ikọ mfo.

82Anyen mmi añkpu ke adiyem enwọñọ mfo;

ami mbo, “idaha akee ke afo udundọñ miin esịd?”

83Akpesʌkado ami mbaaha nte ekpadukọd ke nsʌñikañ,

ami mfreke mme ewʌhọ mfo.

84Awo mfo adiibet ikpeene die?

Idaha akee ke afo adiimia mbon eñyịreke miin ufen?

85Mbon ñkịdidem etịppe ube ekama ekọọk afia ennọ miin,

a-adooho isañake ke mbed mfo.

86Adot se enie mbuọdidem ke afịd mme ewʌhọ mfo;

ñnwam miin sia entʌhọde miin ke unana ntak.

87Ayak etək ekpaensio miin ifep ke iso isọñ,

ado ami ñwuọhọ ñkpọñ mme mbed mfo.

88Ke ima mfo mʌm uwem mmi kama,

nọ ami ñkop item ke mbed a-atooho inua mfo.

Lamed

89Abọọñ, ikọ mfo ado ke nsi-nsi,

anie iwuuk ke mme anyọñ.

90Akpanikọ mfo akaka iso ke afịd emana;

afo aketọọñọ ederimbod anye ñko asʌk asọọñọ aba.

91Mme mbed mfo ekaa iso eba edisịm ini ami,

sia afịd ñkpọ enam ñkpọ unọ fiin.

92Akpedo mbed mfo ikidooho idadesịd mmi,

ami ñkpaaketak ke ndutʌhọ mmi.

93Ami ndiifreke mme mbed mfo tutu amama,

sia ato ke ammọ afo annịm miin uwem.

94Ñnyaaña miin, sia ami ndo ake mfo,

Ami mmeyem mme edu unam ñkpọ mfo.

95Mbon ibak mmọdo eda ebet adintịmede miin,

ado ami ñkere mbaña mme mbed mfo.

96Ke afịd se ifọn ima, ami mmekịt adaña,

ado mbed mfo inieghe utịd.

Mem

97O, sese naña ami mma mbed mfo!

Ami nsịn esịd ke anye afịd usen.

98Mme mbed mfo esʌk eba ye ami afịd ini

enyʌñ enam ami nnie aniọñ ñkan mme asua mmi.

99Ami mmenie ifiọk ñkan afịd mme andikpeeb mmi,

sia esịd mmi asịne ke mme mbed mfo.

100Ñkpọ añnwaña miin akan mme ñkpisọñ,

sia ami mmekop item nnọ ikọ mfo.

101Ami nsịnne ukod mmi ke afañ idiọọkñkpọ ndomokeed

nọ ami ñkan ñkop item nnọ ikọ mfo.

102Ami ñwuọhọ ñkpọñ mme mbed mfo;

sia afo ke idem mfo añkpeep miin.

103Ikọ mfo annem miin die ntom ke inua,

anem akan adanakwọọk ke inua mmi!

104Ami mmenie ndiọọñọidem nto mme mbed mfo;

ke ntoro mmesua afịd idiọọk afañ.

Nun

105Ikọ mfo ado utuenikañ anọ ukod mmi,

ado unwana anọ usʌñ mmi.

106Ami mmaata unwọñọ mmaana nsọọñọ,

ke ami ñyaakeene mme ndinen mbed mfo.

107Ami mmebọ ufen eti-eti;

Abọọñ, mʌm uwem mmi kama akeene ikọ mfo.

108Abọọñ, bọ itooro a-atooho unyịmme inua mmi,

nyʌñ ñkpeep miin mme mbed mfo.

109Akpesʌkado ami mmesima adikama uwem mmi ke idem mmi,

ami ndiifreke mbed mfo.

110Mbon ibak ekọọk afia ennọ miin;

ado ami ñwuọhọ ñkpọñ usʌñ mfo.

111Mme mbed mfo edo udeeme mmi ke nsi-nsi;

ammọ edo idaara ake ami nnieghe ke esịd mmi.

112Esịd mmi asọọñọ ada adinam mme ewʌhọ mfo

tutu asịm ataa utịd.

Samek

113Ami mmesua mbon esịd iba,

ado mmema mbed mfo.

114Afo ado itie udịbe ye atuekọñ mmi;

ami mmesịn idodanyen mmi ke ikọ mfo.

115Ndufo mme anam idiọọkñkpọ,

idaaña iñkpọñ miin, nọ ami nnịm mme mbed Abasi mmi!

116Abasi nnịm miin keene enwọñọ mfo, ndin ami ñyaadu uwem;

kuuyak idodanyen mmi akpa mfʌhọ.

117Mmʌm miin kama, ndin ami ñyaabọkkọ;

ami ndiisʌk nnenie mbaak nnọ mme ewʌhọ mfo.

118Afo amesịn afịd mbon ewuọhọ ekpọñ mme ewʌhọ mfo;

sia mme abiaña ammọ ewuọñọ ikpu-ikpu.

119Afo ameduọọñọ afịd mbon ibak ke ederimbod nte mbio;

ke ntoro ami mmema mme mbed mfo.

120Ndịk mfo anam abʌkidem mmi anyeñ;

ami nda ke uteeñe mbaña mme mbed mfo.

Ayịn

121Ami mmenam se ifọn inyʌñ inen;

kuñyaak miin unọọ mbon se imfiik miin.

122Kịt bo ke ayịnufọk mfo ada yak afọn;

kuuyaak mbon ntañidem emfiik miin.

123Anyen mmi ifọnnọ aba, ke adiyem adinyaaña mfo,

ke adiyem adisana enwọñọ mfo.

124Nam ñkpọ ye ayịnufọk mfo ke ima

nyʌñ ñkpeep miin mme ewʌhọ mfo.

125Ami ndo ayịnufọk mfo; nnọ miin ikike

nọ mme mbed mfo añnwaña miin.

126Abọọñ, ini ado ami a-anaaha nte afo adịppe idem

sia ebiat mbed mfo.

127Sia ami mmema mme mbed mfo,

ñkan kold, mma ñkan ataa adisana kold,

128ñko sia ami ndatta afịd mbed mfo nte nnen-nnen,

ami mmesua ukeed idiọọk usʌñ.

Pe

129Mme ewʌhọ mfo edo utịppe,

ke ntoro ami mmekop item ammọ.

130Adiben ikọ mfo ñyaara anwa-anwa anọ unwana;

anye anọ mme akọi ndiọọñọidem.

131Ami ñnweek inua inwañ,

ñyem mme mbed mfo.

132Kanna nse miin nyʌñ nie mbọm mbaña miin,

naña afo asinam afịd ini anọọ mbon se ima anyịñ mfo.

133Ñwọt miin usʌñ keene ikọ mfo,

kuuyak idiọọkñkpọ ndomokeed añkara miin.

134Mfak miin sio ke ndutʌhọ ubon awo;

nọ ami ñkop item mbed mfo.

135Nam nọ iso mfo ayama anọ ayịnufọk mfo

nyʌñ ñkpeep miin mme ewʌhọ mfo.

136Mmọọñayịd mmi afiọrọ nte idịm;

sia awo ikoppo item inọ mbed mfo.

Sade

137Abọọñ, afo ado adinen,

mme mbed mfo ñko edo nnen-nnen.

138Mme ewʌhọ se afo aboon ke isọñ edoñño ndinen;

ammọ edo se awo adot anyen ayọhọ-ayọhọ.

139Akpọsọñ udọñ mmi anam idem ammem miin,

sia mme asua mmi etuut ikọ mfo enịm.

140Enekke etʌm edomo mme enwọñọ mfo,

ayịnufọk mfo anyʌñ ama ammọ.

141Akpesʌkado ndo ikpọọñ, enyʌñ ense ke ndek,

ami mfreke mme mbed mfo.

142Adinenido mfo ado ke nsi-nsi,

mbed mfo ñko ado akpanikọ.

143Mfịna ye ukuud ansịm miin;

ado mme mbed mfo ennọ miin inemesịd.

144Mme ewʌhọ mfo esʌk edo ndinen afịd ini;

nnọ miin ifiọk nọ ami ndu uwem.

Kof

145Abọọñ; ami ukoot fiin ke afịd esịd; mbọọrọ miin,

ndin ami ñyaakop item mme ewʌhọ mfo.

146Ami mbọọñ ukoot fiin; ñnyaaña miin

ndin ami ñyaanịm mme mbed mfo.

147Atiwuọ usiere ami mmedemme, ntua ñyem unwam,

ami mmesịn idodanyen mmi ke ikọ mfo.

148Anyen mmi ana inwañ afịd akonayio

nọ ami nsịn akikere mmi ke mme enwọñọ mfo.

149Kop uyio mmi keene ntak ima mfo Abọọñ,

mʌm uwem mmi keene ntak mme mbed mfo.

150Mbon e-enamma ibak ekpere;

ado ammọ enyọọñ usʌñ ekpọñ mbed mfo.

151Abọọñ kpayeado afo amekpere,

ñko afịd mbed mfo edo akpanikọ.

152Ke anyan ini koo ami mmaakpeep nto mbed mfo

ke afo akenam ammọ yak ediiba ke nsi-nsi.

Res

153Kanna anyen se ufen mmi nyʌñ ñnyaaña miin,

sia ami mfreke mbed mfo.

154Kpe ikpe iwuod mmi ñnyʌñ mfak sio,

mʌm uwem mmi kama akeene enwọñọ mfo.

155Adinyaaña anyọọñ usʌñ akpọñ mbon ibak,

sia ammọ isiyemme mme ewʌhọ mfo.

156Abọọñ mbọm mfo akpon;

mʌm uwem mmi kama keene mme mbed mfo.

157Mme asua etʌkkọke uwem mmi ewak,

ado ami ntịmmeke ñkpọñ mme mbed mfo.

158Ami nse mbon unana mbuọdidem ke ndek,

sia ammọ ikoppo item inọ ikọ mfo.

159Se naña ami mma mme mbed mfo;

Abọọñ, mʌm uwem mmi kama keene ima mfo.

160Afịd ikọ mfo edo akpanikọ,

afịd ndinen mbed mfo eba ke nsi-nsi.

Sin ye Siin

161Mme andikara eñkọbọ miin ke unana ntak,

ado esịd mmi anyeñ ke ikọ mfo.

162Ami mmedat esịd ke enwọñọ mfo

nte awo a-akịtte ekamba mbịme.

163Ami mmesua ñnyʌñ ñkpaaña nsa ke abiaña

ado mmema mbed mfo.

164Akañ itiaba ke usen ke ami nsutooro fiin

ke ntak ndinen mbed mfo.

165Ekamba emem ke mbon se ima mbed mfo enie,

ñko ibaaha se ikpinam ammọ efiọnnọ eduọ.

166Abọọñ, ami nda mbet adinyaaña mfo,

ñko ami ñnyʌñ ñkeene mme mbed mfo.

167Ami mmekop item mbed mfo,

sia ami mmenekke mma ammọ.

168Ami mmekop item nnam mme mbed mfo ye mme ewʌhọ mfo,

sia afo amediọọñọ afịd usʌñ mmi

Tau

169Abọọñ, yak ntuaayịd mmi adọọk ubịne mfịn;

nam nọ ñkpọ añnwaña miin naña ado ke ikọ mfo.

170Yak akam mbʌññọesịd mmi adi ubịne fiin;

mfak miin keene naña ado ke enwọñọ mfo.

171Yak ñkpọkinua mmi ayọhọ ye itooro mfo;

sia afo ameñkpeep miin mme ewʌhọ mfo.

172Yak edeme mmi akwọ ikọ mfo;

sia afịd mme mbed mfo edo ndinen.

173Yak ubọk mfo abeeñe idem adiñnwam miin;

sia ami mmemek mme mbed mfo ndat.

174Abọọñ ami mmeyem adinyaaña mfo,

ñko mbed mfo annọ miin idadesịd.

175Nam ami ndu uwem nọ ami utooro fiin,

ñko yak mme mbed mfo emmʌm miin ekama.

176Ami mmeyooñ nte edọñ a-asoppo usʌñ.

Yem ayịnufọk mfo,

sia ami mfreke mme mbed mfo.