Mme Saam 102

Akam awo ñkpọnnam i-idem amemme ndin anye anam aseeme anọ Abọọñ

1Abọọñ, kop akam mmi;

yak ayịd uyem adinyaaña mmi adi ubịne fiin.

2Kundịp miin iso mfo

ke ini ami mbaaha ke itie ukuud.

Kpañ utọñ nnọ miin;

ami mmaukoot, sọp mbọọrọ miin.

3Sia usen mmi asop nte nsʌñikañ;

akpọ mmi asak nte ifiaikañ.

4Esịd mmi abʌññọ anyʌñ ayeeme nte mbid;

ami mmefre adidia ndidia mmi.

5Ke ukuud mmi ami ñkuun ke akpọsọñ uyio

ndisʌhọ ikpaidem ye akpọ.

6Ami mba nte ñkịdikịd akpautatan,

nte ñkịdikịd ke atu ñwuudo itie.

7Ami ntaba idab; ndikappa mba

nte asaña ikpọọñ inuen ke anyọñ akọm.

8Mme asua mmi ensuenne miin afịd usen;

mbon e-ebọññọ ñkpo ke iwuod mmi ekama anyịñ mmi enam isuuñọ.

9Sia ami ndia ntọñ nte ndidia

ñnyʌñ ñwuaha se ñnwọñ ye mmọọñayịd

10ke ntak akwa ifiobesịd mfo,

sia afo amembenne miin ke anyọñ anyʌñ antop miin aduọọk.

11Mme usen mmi ebañña nte ndukpọñ ndubiayio;

ami mmeyeeme nte mbid.

12Ado afo, Abọọñ, atie ke ebekpo ke nsi-nsi;

anyịñ mfo ayaaba ke afịd emana.

13Afo ayaadakkada atua Saiyọn mbọm,

sia ini akem afo adiwọt anye mfọnido;

akemini ado a-adisịm.

14Sia mme itiad amọ e-enem nditọufọk mfo esịd;

ntọñ amọ a-anam ammọ enie mbọm.

15Mme idịd eyaebaak anyịñ Abọọñ,

afịd mme ndidem ke ekondo eyaekpono ubọọñ mfo.

16Sia Abọọñ ayaamaana abọp Saiyọn

anyʌñ awuọ ada ke ubọọñ amọ.

17Anye ayaabọọrọ akam mbon ñkpọnnam

anye idiisịnne ebeeñe ammọ ke ndek.

18Yak ewet ñkpọ ami enịm enọ emana ini iso

ke mbon a-awo imiibotto diin editooro Abọọñ:

19“Abọọñ atie ke adisana itie amọ ke anyọñ asuuk anyen ase,

anye amaatie ke hefịn ase ederimbod,

20nọ akop aseeme mbon ñkpakọb

anyʌñ asaana mbon se emaekebiere ikpe ñkpa enọ ayaak.”

21Eyaesian anyịñ Abọọñ ke Saiyọn

ye itooro amọ ke Yeruselem

22ke ini mme awo ye mme idịd

ebohoke adikpono Abọọñ.

23Ke isañ uwem mmi, anye amaabuuñ adudu mmi;

amaakpịkke isua uwem mmi.

24Ke ntoro ami mmaabo:

“Abasi mmi, kumbenne miin usio, ke ufọọd mme usen mmi;

mme isua mfo ekakaiso eba ke afịd emana.

25Ke aditọọñọ afo akesịn itiad idakisọñ ederimbod,

mme hefịn enyʌñ edo ubọkutom mfo.

26Ammọ eyaetak, ado afo asʌk abaaba;

afịd ammọ eyaetaha nte afọñ.

Afo ayaakpuuñọ ammọ nte afọñ

ndin eyaetop ammọ eduọọñọ.

27Ado afo ukpʌhọke,

mme isua mfo idiinyʌññọ inie utịd.

28Nditọ mme nditọufọk mfo eyaedʌñ ke iso mfo;

ubon ammọ eyaesọọñọ eda ke iso mfo.”