Mme Saam 101

Ake Defid. Saam.

1Ami ñyaakwọ ima ye adinen ikpe mfo;

Abọọñ, ami ñyaakwọ itooro mfo.

2Ami ñyaakpeme adidu uwem unana ndudue,

ini akee ke afo uduudi umbịne miin?

Ami ñyaanam ndubeghe ufọk mmi

ye esịd i-imiinieghe ubiomikpe.

3Ami ndiiseeghe ñkpọ ndomokeed a-adooho idiọọk

ke esịd unyịmme.

Ami mmesua se mbon unana mbuọdidem enam;

Ami ndiinieghe udeeme ke se ammọ enam.

4Mbon e-ewọññọke ekpọñ usʌñ eyaeda nsan-nsan eñkpọñ miin;

Ami ndiinieghe ñkpọ ndomokeed adinam ye se ido idiọọk.

5Awo keed akeedodo a-atañña idiọọk ikọ abaña mbọhọidʌñ ammọ ke ndịbe,

ami ñyaakʌp anye inua;

ami ndiiyọọhọ awo keed akeedodo,

a-akamake anyen usua ye esịd ntañidem.

6Anyen mmi adiise mbon e-enamma akpanikọ ke abio,

nọ ammọ ekpedʌñ ye ami;

awo i-isañ ammọ imiinieghe ndudue

ayaanam ñkpọ annọ miin.

7Awo ndomokeed a-anamma utom abiaña

idiidʌññọ ke ufọk mmi;

Awo ndomokeed a-asʌhọke nsu

idiidaaha ke iso mmi.

8Kwa ubakusen ami ñyaakʌp

afịd mbon ibak e-ebaññake ke abio inua;

ami ñyaasobo afịd mme anamidiọọk

ke abio A-Abọọñ anieghe.