Hunde Nouveau Testament
Mariko 2
Yesu alamya mukoni wa makonongola
Inyuma ya biro bike, Yesu nianafuluka i Kaperenaumu, na bandu niabanaumpfao mbu ali mu nyumba. Bandu bangi babuanana aho, nehikira ku luero lwehusha buali ho bangatsuka kwa lukyo lwa nyumba. Mwa mango Yesu abaa apfulirabo aKinwa kya Ongo, niabanamuletera mukoni wa makonongola, yabaa ahetwe na bandu bane. Wetuwe kubwishi bwa mubuanano wa bandu, bahusha kobangamuleta mwa mbere sa Yesu. Niyo batobola hambashiro wa nyumba yo Yesu abaa alimo.1 Niabanamukimya ku mundara mwa mbere sa Yesu. Yesu abere axunga abwimire bwa bandu abo, nianabwira amukoni wa makonongola mbu: «Mwana wani asantsambi sawe sameshashirwa.» Beyisa bauma ba Muomba bobabaa aho niabanaanikira mwa myete yabo mbu: «Kubwishi bwaki amundu uyu angakamba Ongo? Inde mundu yangashashira ntsambi ali ate Ongo yewene?» Aho, Yesu nianakengula mwa mwete uwe amianikire yabo, nianabutsabo mbu: «Kubwishi bwaki amuibutsiritsa abinwa byoshe ibi? Kihe kyekyolo, kwebwira amundu wa makonongola mbu: ‹Asantsambi sawe sameshashirwa›, neri imubwira mbu: ‹Batuka, tsimba amundara wawe ube neenda?› Anixonda mbu mumenye ku Muala wa Mundu awete maala meshashira asantsambi kwa kihuo kuno.»
Kubatyo nianabwira amundu wa makonongola uyo mbu: «Anikubwira mbu batuka, tsimba amundara wawe ube nefuluka hamwawe!» Na bandu boshe babere bali yobalola kwa mundu uyo, mo kashangi umo nianaimana, nianatsimba amundara uwe neiendera. Abandu boshe bashishala, basingya Ongo mbu: «Tutatsatwaxunga binwa biri ngebi kiro na hake!»
Yesu abirangira Lawi mbu amukulikire
Inyuma kwaho Yesu nianaya kandi kwa musike wa ngetsi ye Ngalilaya. Mubuanano wa bandu bangi abaa eremukulikira, ne Yesu ni ereiyisabo. Abere ali yatsuka, nianaxunga Lawi2 muala wa Alufayo, ni aikere mwa nyumba yarefutishiramo akoli. Yesu nianamubwira mbu: «Nikulikire!» Lawi nianabatuka nemukulikira. Inyuma kwaho, Yesu nianalya biryo mwa nyumba ya Lawi. Bafutishi bangi ba koli, na bakotsi bangi ba ntsambi, balya bilyo kuuma ne Yesu na bemitsa bewe, kubwishi bandu bangi bali ngakuno abo bobabaa baneremukulikira. Mwa mango abeyisa ba Muomba ba kikanga kya Bafarisayo babere baxunga ku Yesu alya kuuma na bandu abo, niabanabutsa abemitsa bewe mbu: «Kubwishi bwaki amwiyisa wenyu alya kuuma na bafutishi ba koli na bakotsi ba santsambi?» Yesu abere aumpfa kobaneena, nianabwirabo mbu: «Abakambwe batalaa ku munganga, wetuwe abakoni bobanamulaako. Nitawichaa ibirangira bobatunganene, wetuwe abakotsi ba santsambi.»
Mahemo meihangira ilya
Abemitsa ba Yohana Murubiki na Bafarisayo babaa banaihangira ilya. Bandu bauma bahika nebutsa Yesu mbu: «Kubwishi bwaki abemitsa ba Yohana Murubiki na bemitsa ba Bafarisayo banaihangira ilya, wetuwe abemitsa bawe bataihangira ilya?» Yesu nianaxubyitsabo mbu: «Amuanikira mbu bobalalikirwe mwa buheruki bangaihangira ilya bilyo bya linye mwa mango nina abuheruki akinali kuuma nabo? Ihi! Mwa mango akineho batangakocha iihangira ilya.» Wetuwe kwendehika lwire lo nina buheruki endetengyibwa mwa kati kabo, mo biro umo, mobakendeihangira ilya.
Hatali mundu yanalandira kiraka kihya ku lukimba lukulire. Akekola atyo, akiraka kihya ikyo ni kikaberenga alukimba lo lukulire, na rebereka ralo ni raiongerera kutsibu. Hatali mundu yangahira tifai nyihya mu abipfûma bya luhu3 lukulire. Akekola atyo, atifai nyihya iyo ni ikaberenga abipfûma bya luhu lolukulire, na tifai na bipfûma byoshe, ni byapfa busha. Wetuwe lirirene ihira atifai nyihya mu bipfûma bihya bya luhu.
Yesu ye Nina aSabato
(Mat 12:1-8; Luk 6:1-5)
Lwire luuma lwa Sabato, Yesu abaa atsuka mu maxwa ma ngano. Mwa luendo lwabo, abemitsa bewe batangira ihulula bikumba bya ngano. aBafarisayo niabanamubwira mbu: «Kubwishi bwaki abemitsa bawe abakola binwa bya Muomba wetu ahangire ikola mu lwire lwa Sabato?»
Yesu nianaxubyitsabo mbu: «Mbeni Mutatsamwasoma akinwa kyo mwami Ndauti akolaa mwa mango abaa alaire ku bilyo, iye na bandu babaa ali nabo ni bakukwitse? Mbeni ataingiraa mwa nyumba ya Ongo, nelya kwa mikati yo ikomire yobabaa bametula Ongo? Akinwa ikyo kyakolwaa mwa mango Abiyatari abaa shebakungu. Abakungu ho bobabaa baherwe arubu lwelya amikati iyo. Wetuwe Ndauti alyaa kuyo, neha bobabaa ali kuuma nabo?» Yesu nianaxuba ibwirabo mbu: «Alwire lwa Sabato lwaterekwaa kubwishi bwa bandu, wetuwe amundu atabumbwaa kubwishi bwa Sabato. Kubwishi bwekyo, Muala wa Mundu ye Nina aSabato.»
Source notes (3)
- Footnote Bayahuti bauma babaa banahimba batya: ni banalambika miti iraluulu wa nyumba ngakuno kishesha, noko ni kwebatondeka amatebura ngakuno bishakalo. Na kwa nyumba ni kunaba muurukiro.
- Footnote Soma Matayo 9:9, Lawi yanalukwa kandi Matayo.
- Footnote aBayahuti babaa banakolesa ngaha sosikolirwe mu nyuhu sa nyamexwa.
Hunde Nouveau Testament. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.