Mariko

Mwatsi Mubuya wa Yesu Kirisitu

nga ko

Mariko

aandikaa

Bwingiro

Mariko abwerekya ku Yesu Kirisitru ye Muala wa Ongo, na kandi iye Muala wa Mundu. Abwerekya kandi ku Yesu awichaa kwebula mbu akolere abandu neihira kubo nge aba mutulo weufulabo. Mar10:45, Yesu abula mbu: «Ingye, muala wa Mundu nitawichaa kwebula mbu abandu berenikolera, wetuwe nawichaa kwebula mbu nerekolerebo nehana abuyingo bwani, kwebula mbu niufule bandu bangi.» Mariko yaandikire akitabo kino, alukwa kandi mbu ye Yohana-Mariko (Mikolere 12:12). Mariko uyu atabaa muuma wa mwa ndumwa ikumi nebiri sa Yesu, wetuwe abaa muuma wa bobabaa banahereketsa andumwa ya Yesu Kirisitu, Petero. Binwa bingi mu byo Mariko aandikaa kuluenda Yesu, aumpfaabyo itsukira Petero. Mariko nianaandika akitabo kino kwebula mbu kipfule aMwatsi Mubuya ku bobate Bayahuti. Mweandika akitabo kino, atalaa ku byobiandikirwe mwa Ndaane ya kwa Mira nga ko Matayo akolaa. Wetuwe itangira kwa kiche kibere ihikira ku kya munane, na kya rekumi, Marko abwerekya byo Yesu akolaa mwa kyango kye Ngalilaya. Ihuluka kwa kiche kya rekumi ihikira ku kya arekumi na ndatu, abwerekya byo Yesu akolaa mwa kyango kye Yuteya na mwa mulungu we Yerusalemu. Kwemala, ni yaneena kuluenda alupfu lwa Yesu kwa musalaba na repfuka liwe. Mwa bitabo bine bya mwa Mwatsi Mubuya wa Yesu, akitabo kya Mariko kyokyufi irengya abindi. Mwa kitabo kino, Mariko ahirire abwenge buwe kutsibu kwa binwa bya tushingishiro to Yesu akolaa.