Skip to content
BibleKenya

Hunde Nouveau Testament

Yohana 16

«Namebabwira abinwa ibi, kwebula mbu mutangechesiya abwimire bwenyu. Bendebahentsa mwa masinakoki. Na kandi, kwendehika kashangi bobakenderebaita, bendereanikira mbu abakolera Ongo. Benderekola batyo kubwishi batamenyaa Tata, neri ingye. Wetuwe namebabwira abinwa ibi kwebula mbu akashangi kakendeba kameeraho, ni mwaubuka ku nakindire ibabwira.

Amulimo wa Mutima Akomire

«Nitababwiraa abinwa ibi lubere kubwishi nabaa nikinali kuuma nemwe. Tsene, nafuluka ira mwa yanilikaa, hatali na muuma mwimwe yanibutsa mbu hai houya. Wetuwe kubwishi namebabwira abinwa ibi, mwameyongwa kutsibu mwa myete yenyu. Anibabwira akuli: nikeenda, ni munguruko kwimwe kureba nitaendire, amuasikya ni atiwiche yomuli. Wetuwe nikeenda, ni nikamulika yomuli. Naye mwa mango endewicha, endebereretsa abandu ba kwa kihuo kino kuluenda asantsambi sabo, na kuluenda abutunganane bwani, na kuluenda alubancha lwa Ongo. Kuluenda asantsambi ni kubwishi bataniimirire. Kuluenda abutunganane ni kubwishi anienda ira mwa Tata, nemwe mutikyendenilolako kandi. Na kuluenda alubancha ni kubwishi amukulukulu wa kwa kihuo kino amekinda ichirwa lubancha.

«Nikinawete ku binwa bingi byebabwira, wetuwe tsene, mutangakochabyo. Mwa mango aMutima wa kuli endewicha, endebaendya mwa kuli yoshe. Atendeneena mwa maala mewe yewene, wetuwe endeneenaho byakendehulikya, naye endebapfulira amyatsi ya binwa byobyendewicha. Iye endeniha ngulu kubwishi abinwa byakenderebabwira bikenderetenga mwingye. Abyoshe byo Tata aweteko byani. Kubwishi bwekyo, shanibabwira mbu abinwa bya Mutima Akomire enderebabwira, bikenderetenga mwingye.

Abuyongwa bwendebinduka lumoo

«Hanashibya kashangi kake imwe mutikinixungeko, na mukashangi kake kandi, mukanixungako.»

Niyo abemitsa bewe bauma babutsabutsanya mbu: «Axonda ineenaki? Atubwiraa mbu: ‹Hashibya kashangi kake nimutakiri amunixungako›, na ‹mukashangi kake kandi, mukanixungako.› Aneenaa kandi mbu: ‹Naenda ira mwa Tata.› Abinwa byoshe ibi, bibwire bite?» Nabo niabanabutsabutsanya kandi mbu: «Arebula mbu: ‹kashangi kake› ni bulaki?» Tutechi kyaraneena.

Yesu nianakengula kwabaxonda imubutsa. Ni yabwirabo mbu: «Amubutsabutsanya kuluenda abinwa byonaneenaa ku hanashiba kashangi kake ni mutamunilolako, wetuwe inyuma wa kashangi kake mukanilolako kandi. Mwa kuli, anibabwira: mukalira neyongwa, wetuwe abandu ba kihuo bemoa. Mukayongwa, wetuwe abuyongwa bwenyu bukabinduka lumoo. Mwa mango amukatsi abuta, anaumpfa bwaale kubwishi akashangi kewe karebuta kameeraho. Wetuwe, amebuta amwana, atakiubuka kandi abwaale, kubwishi bwa lumoo lwa rebutwa ra mwana. Nemwe kwonoko, amuumpfa bwaale. Wetuwe nebalolako kandi, nemwe mukamoa. Wetuwe hatikyendeba mundu yakendetuma muyongwa kandi.

«Mwa mango alwire ulo lwendeeraho, mutikyendenibutsa kuluenda kindu kirebe. Mwa kuli anibabwira mbu: Tata akenderebaha abyoshe byomwenderemuhema mwetsina rani. Ihikira tsene mutatsamwahema kindu mwetsina rani. Munerehema, nemwe mukerehabwa, na lumoo lwenyu lukaba lungi kutsibu.»

Yesu ye muhimi wa kihuo

«Namebabwira abinwa ibi mu mishinga. Wetuwe kukahika kashangi monitikyiendeneena nemwe mu mishinga, nenderebabwira kyenene kuluenda Tata. Alwire ulo lwendeba lwaeraho, mwenderehema Tata mwetsina rani. Ingye nitanibula mbu nikendebahemera ira mwa Tata, kureba Tata yewene abatsiyire. Abatsiyire atyo kubwishi nemwe munitsiyire neimirira kunatengaa ira mwa Ongo. Natengaa ira mwa Tata, niwicha kwa kihuo. Tsene natenga kwa kihuo, nefuluka ira mwa Tata.»

Niyo abemitsa bewe bamubwira mbu: «Tsene auneena kyenene butsira ikolesa mishinga. Twichi ku wichi abyoshe, utalaire mbu bakubutse kindu. Kyokituma atuimirira ku utengire ira mwa Ongo.»

Yesu nianaxubyitsabo mbu: «Mwameimirira tsene? Muumpfe, akashangi kawicha, nako kali hofi kutsibu, mweboshe mukashanchana, na mweboshe mukaiyendera, na kintsi muuma mwimwe akaiyendera ku munda uwe, nenisiya ngyewene. Wetuwe nitibe ngyewene, kubwishi Tata ali kuuma nani. Namebabwira abinwa ibi kwebula mbu mube na buholo mwingye, mushibe na mu buuma nani. Mukanuba kwa kihuo, wetuwe muitsibuhiritse kubwishi ingye namehima akihuo.»

Hunde Nouveau Testament. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.