परमेश्वर उन वचन
रोमियों 5
परमेश्वर उन से मेल मिलाप
ईग जो नाव तान विश्वास इन कारण परमेश्वर उन मुंद न्यायी ठहरूसेव, रा नाम प्रभु यीशु मसीह अन कारण परमेश्वर नामी शांती कोटान. अदिक ईग आऊंदा द्वारा विश्वास इन कारण नाव परमेश्वर उन अनुग्रह दा जीवन व्यतीत माळतेव. अदिक नाव आ आशा मा घमण्ड माळतेव यदुर द्वारा नामी परमेश्वर उन महिमा अन सांगुळ भागीदारी सिक्याद. सिर्फ ईटा ईला, यतिकी नाव तान आपदगोळ मा घमण्ड माळतेव यतिकी नामी मालूम आद नाम आपद धीरज इक उत्पन्न माळतद. अदिक धीरज देल वळ्लीद चरित्र बन्सतद, अदिक वळ्लीद चरित्र देल आशा उत्पन्न आगतद; अदिक ईद आशा नामी निराश माळाल, यतिकी परमेश्वर आऊन प्यार नाम मनगोळ दा हाक्यान, मतलब पवित्र आत्मा जो नाम साटी परमेश्वर उन उपहार हुन.
यतिकी याग नाव आशाहीन ईरेव, रा ठीक समय मा नाव भक्तिहीनगोळ साटी मसीह तान बलिदान माळदुन. यावारा न्यायी जन इन साटी यावारा सायुल, ईद रा दुर्लब आद; लेकीन आग सकतद यावारा वळ्लेव मंळसा अन साटी यावारा सायोद भी हिम्मत माळुल. लेकीन परमेश्वर नाम मा तान प्यार इन भलाई ई रीति देल प्रगट माळतान कि याग नाव पापी अच ईरेव आग भी मसीह नाम साटी सोत्तुन. इदुरसाटी याग कि नाव ईग आऊन रक्ता अन कारण न्यायी ठहरूसदेव, रा आऊन द्वारा परमेश्वर उन सिट्ट देल येती ऊळ्सकु आगतीदील? यतिकी याग नाव परमेश्वर उन दुश्मन ईरेव लेकीन परमेश्वर तान पार उन मृत्यु उन द्वारा नाम सांगुळ मेल मिलाप माळदुन, रा ईग नाव परमेश्वर उन संगी आयेव रा आ मसीह अन जीवन इन द्वारा नाम हापाळ यक्कुल उद्धार आदीत. सिर्फ ईदा ईला, लेकीन नाव तान प्रभु यीशु मसीह से, यार्द द्वारा नाम परमेश्वर उन सांगुळ मेल मिलाप आत, परमेश्वर दा खुश आगतार.
आदम अदिक मसीह
इदुरसाटी ह्यांग ऊंद मंळसा अन द्वारा पाप दुनिया दा बत्त, अदिक पाप इन द्वारा मृत्यु बत्त, अदिक ई रीति देल मृत्यु सप्पा मंळसागोळ दा फैलुसेत, यतिकी सप्पा मुंदुर पाप माळदुर. व्यवस्था अन कोटकु आगोर से पयले ताका पाप दुनिया दा रा ईरोद, लेकीन येल व्यवस्था हैलेच अल पाप आळ्दकु आगाल्द. लेकीन आग भी आदम टु मूसा ताका पुरा मृत्यु आ लॉकुर मा राज्य माळ्त याग कि आ लॉकुर आदम घाई आग्या मुरोद पाप माळीदिल तरी भी पापी ठहरूसीदील, जो आ बरावाळा अन चमत्कार हुन, आ अपराध घाई पाप माळीदिल.
लेकीन ह्यांग अपराध इन दशा आद, हांगा अनुग्रह अन वरदान इन हैलेच, यतिकी याग ऊंद आदम उन अपराध देल हापाळ लॉकुर सोत्तुर, रा परमेश्वर उन अनुग्रह अदिक आऊन जो दान ऊंद मंळसा अन, मतलब यीशु मसीह अन अनुग्रह देल हापाळ लॉकुरी कृपा सिक्त. अदिक परमेश्वर उन भेंट अदिक ऊंद मंळसा अन पाप ई येढ्ढु दा फरक आद. तरी भी पाप इन कारण दोष इन न्याय बत्त, लेकीन हापाळ पुरा पापगोळ्द बाद्दा अदिक निर्दोष आगोद यदुर्द नाव लायक ईला ईरेव अद भेंट बत्त. यतिकी याग ऊंद मंळसा अन अपराध इन कारण मृत्यु आ ऊंद मंळसा अन द्वारा अच राज्य माळ्त, रा जो लॉकुरी अनुग्रह अदिक न्यायरूपी वरदान बहुतायत देल सिकतद आंदुर ऊंद मंळसा अन, मतलब यीशु मसीह अन द्वारा जरूरी अच अनन्त जीवन दा राज्य माळ्यार.
इदुरसाटी ह्यांग ऊंद अपराध सप्पा मंळसागोळ साटी दण्ड इन आग्या अन कारण आत, हांग अच ऊंद न्यायीपन इन क्याल्सा भी सप्पा लॉकुरी मुक्त माळतद अदिक आंदरी जीवन कोळतद. यतिकी ह्यांग ऊंद मंळसा अन आग्या ईला मान्सदुर देल हापाळ लॉकुर पापी ठहरूसदुर, हांग अच ऊंद मंळसा अन आग्या मानसोद कारण सप्पा लॉकुर परमेश्वर उन मुंद न्यायी ठहरूसकु आदार. व्यवस्था अन पयचान इदुरसाटी आत कि अपराध वाळुसेगुल, लेकीन यल पाप वाळुस्त अल परमेश्वर अनुग्रह अदिक यक्कुल वाळुस्त, कि ह्यांग पाप मृत्यु फैलुसतेला राज्य माळ्त, हांग अच नाम प्रभु यीशु मसीह अन द्वारा अनुग्रह भी अनन्त जीवन इन साटी न्यायीपन इन द्वारा राज्य माळीत.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.