परमेश्वर उन वचन
मीका 5
ईग हे हापाळ दल इन स्वामिनी, दल कट कटकु जमा आग, यतिकी आव नाम लॉकुरी घेर्स बुटान; आंदुर इस्त्राएल इन न्यायी इन गाल्ला मा सोटा बळदार.
बैतलहम टु ऊंद राजा अन बरोद वादा
हे बैतलहम एप्राता, अगर नी हींग श्याणेव आय कि यहूदा अन हजारगोळ दा आळ्दकु आगाल, तरी भी नीन दा टु नान साटी ऊंद मंळसा होट्टान, जो इस्त्राएलीगोळ दा प्रभुता माळावाळा आदान; अदिक आऊन होळोद प्राचीनकाल टु, उलटा अनादि काल टु आग्त बंदाद. ई कारण आव आंदरी आ समय ताका त्याग्सकु ईत्तान, यागासताका व्हाट्यादी ईरावळ्त हाळालुर; आग इस्त्राएलीगोळ हात्ती आऊन ऊळ्दकु वार्टुर लौटुस्कु आंदुर से मिळुस्यार. अदिक आव निदुरकु यहोवा अन कोळ्द ताकत देल, अदिक तान परमेश्वर यहोवा अन हेसुर इन तेज देल, आंदुर्द चरवाही माळ्यान. आंदुर सुरक्षित ईत्तार, यतिकी ईग आव धरती न क्वाना ताका महान ठहरूस्यान.
छटकारा अन दण्ड
आव शांती इन मूल ईत्तान. छुटकारा अन दण्ड याग अश्शूरी सेना नाम द्याश मा चढ़ाई माळ्यार, अदिक नाम राजभवनगोळ दा काल ईट्यार, आग नाव आंदुर खिलाप येळ चरवाहागोळ अदिक येठ्ठ प्रधान मंळसा निदरूसाता; अदिक आंदुर अश्शूर उन द्याश इन उलटा प्रवेश इन जागा ताका निम्रोद उन द्याश इक तलवार नळ्सकु कोंद बुळाता; अदिक यग अश्शूरी लॉकुर नाम द्याश दा बंदार, अदिक अदुर सीमा अन बुळ्क काल ईट्यार, आग आ मंळसा अन नामी आंदुर से ऊळस्यान. आग याकूब उन ऊळ्द लॉकुर हापाळ राज्य अन बीच दा ईत्ता क्याल्सा कोट्टार, ह्यांग यहोवा अन दी टु बिळावाळा ओद, अदिक काड्डा माकळोद माळ, जो यारदु साटी रूकसाल अदिक मंळसा अन हादी कायाल. याकूब उन ऊळ्द लॉकुर राज्यगोळ दा अदिक द्याश द्याश इन लॉकुर बीच दा हींग ईत्तार ह्यांग आळी इन जनावरगोळ दा हुल्ल, या आळ मर्रीगोळ झुण्ड दा हारोद हुल्ल ईरतद, यतिकी याग आव आंदुर बीच दा टु होदीत, रा कोन्नतेला अदिक हरूतेला होदीत, अदिक याऊ ऊळ्स सकतीदील. नीन कय नीन द्रोहीगोळ मा बिळुल अदिक नीन सप्पा दुश्मन नष्ट आगेगुल.
यहोवा अन ईद वाणी आद, आ समय ना नीन घ्वाळागोळ्द नीन बीच दा टु नाश माळाईन; अदिक नीन रथगोळ्द विनाश माळाईन. ना नीन द्याश इन नगरगोळी भी नष्ट माळाईन, अदिक नीन किल्लागोळी केळ्द बुळाईन. ना नीन तंत्र मंत्र अन नाश माळाईन, अदिक नीन दा जादु टोनागोळ मिक्कु ईरतीदील. ना नीन अगुळ मुर्तीगोळ, अदिक नीन लाठगोळ, नीन बीच द टु नष्ट माळाईन; अदिक नी मुंदु टु तान कय इन बनुस्द वस्तुगोळी दण्डवत माळतीदील. ना नीन अशेरा हेसुर इन मूर्ति इक नीन जमीन द टु कित्त बुळाईन, अदिक नीन नगरगोळ्द विनाश माळाईन. अदिक ना राज्य राज्य से जो नान मात केळालव, आंदुर से ना भयंकर क्रोध देल बदला ताकोमाईन.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.