मीका 4

शांती इन राज्य

(यशायाह 2:1-4)

1आखरी इन दिनगोळ दा हींग आदीत कि यहोवा अन भवन इन पहाळी सप्पा पहाळीगोळ मा मजबुत माळकु आदीत, अदिक सप्पा पहाळीगोळ से यक्कुल ऊचा माळकु आदीत; अदिक सप्पा राज्य अन लॉकुर गांगा अन घाई आऊन दी नळदार, 2अदिक हापाळ सारा राज्य अन लॉकुर होदार, अदिक आपस दा अंदार, “बरी, नाव यहोवा अन पहाळी मा येरकु, याकूब उन परमेश्वर उन भवन दा होगाता; आग आव नामी तान हादी कलस्यान, अदिक नाव आऊन हादीगोळ मा नळदेव.” यतिकी यहोवा अन व्यवस्था सिय्योन टु, अदिक आऊन वचन यरूशलेम टु होट्टीत. 3आव हापाळ सारा द्याश इन लॉकुर्द न्याय माळ्यान, अदिक दुर दुर ताका नोर सामर्थी राज्यगोळ्द झगळा मिटुस्यान; इदुरसाटी आंदुर तलवार बडुकु नागर इन फार, अदिक तान भालागोळ से कुळगुल बनुस्यार; आग ऊंद राज्य दुसरा राज्य अन खिलाप तलवार यागलु नळ्सतीदिल; 4अदिक लॉकुर मुंद युद्ध विद्या कलुतीदिल. लेकीन तान तान अंगुर इन बेली अदिक अंजीर इन मार्र इन ल्यालमा कुर्तोदार, अदिक याऊ आंदरी अंजुसतीदील; सेनागोळव यहोवा ईदा वचन कोटान.

5सप्पा राज्य लॉकुर रा तान तान द्याव इन हेसुर ताकोमकु नळुतार, लेकीन नाव लॉकुर तान परमेश्वर यहोवा अन हेसुर ताकोमकु हमेशा नळुतेला ईत्तेव.

गुलामी दा टु इस्त्राएल इन बिळोद

6यहोवा अन ईद वाणी आद, आ समय ना प्रजा अन लंगळागोळी, अदिक जबरदस्ती तेग्द लॉकुरी, अदिक यारी ना दुख कोटीन आ सप्पा मुंदुरी जमा माळाईन; 7अदिक लंगळागोळी ना ऊळ्सकु ईटाईन, अदिक दुर माळ्द मंळसागोळी ऊंद सामर्थी जाती माळ बुळाईन; अदिक यहोवा आंदुर मा सिय्योन पहाळी इन म्याकुच टु हमेशा राज्य माळतेला ईत्तान.

8हे एदेर इन गुम्मट, हे सिय्योन इन पहाळी, नीनी पयले अन घाई शासन हासील अदीत, मतलब यरूशलेम इन राज्य नीनी सिक्कीत.

9ईग नी येती किटुरत्या? येन नीन दा याऊ राजा ईतीदील? येन नीन युक्ति माळावाळा नष्ट आगेदुन, यदुर देल व्‍हाट्‍यादी ईरावळ्त आर्त इन घाई नीनी दुख येळतद? 10हे सिय्योन इन पोर, गर्भवती आर्त इन घाई दुख नेगुकु पैदा माळ; यतिकी ईग नी नगर दा टु होटकु मैदान दा बसुस्या, उलटा बेबीलोन ताका होद्या; अल्या नी बिळसुस्कु आद्या, मतलब आवा यहोवा नीनी नीन दुश्मनगोळ वश दा टु बिळ्स बुट्टान.

11ईग हापाळ सारा राज्य नीन खिलाप येदकु नीन बारा दा अंदाव, “सिय्योन अपवित्र माळकु आगुल, अदिक नाव तान कण्णगोळ देल अदरी नाश आगतेला नोळेव.” 12लेकीन आंदुर यहोवा अन कल्पनागोळी जान्सालुर, ना आऊन युक्ति सम्सतार, कि आव आंदरी हींग आंदान जसा केई दा टु फुलागोळी जमा माळतार. 13हे सिय्योन, येळ अदिक दावनी माळ, ना नीन गॉट्टागोळी लॉहा अन, अदिक नीन खुरगोळी पीतळा अन माळ बुळाईन; अदिक नी हापाळ सारा राज्यगोळी चुर चुर माळ्या, अदिक आंदुर कमाई यहोवा अक अदिक आंदुर धन दौलत धरती इन प्रभु उन साटी अर्पण माळ्या.