परमेश्वर उन वचन
मत्ती 18
स्वर्ग इन राज्य दा धोड्डेव याव?
(मरकुस ९:३३-३७; लूका ९:४६-४८)
अदा घळी चेलागोळ यीशु उन हात्ती बंदकु केळली कुरतुर, “स्वर्ग इन राज्य दा धोड्डेव याव आन?”
इदुर मा यीशु ऊंद पार उक हात्ती कारूकु आंदुर्द न्याड्या दा नीदरूसदुन, 2अदिक अंदुन, “ना नीम से खरा अनतीन कि यागासताका नीव बदलुसालीर अदिक चिकोर घाई बनसालीर, नीव स्वर्ग इन राज्य दा प्रवेश माळ सकालीर. जो यावारा तान तान इक ई पार उन घाई स्याणेव माळ्यान, आव स्वर्ग इन राज्य दा धोड्डेव आदान. अदिक जो यावारा नान हेसुर देल ऊंद हिंग पार उक ग्रहण माळतान आव नानी ग्रहण माळतान.
पाप माळोद परीक्षा
(मरकुस ९:४२-४८; लूका १७:१,२)
“पर जो यारारा ई स्याणेर दा टु जो नान मा विश्वास माळतार ऊंद मंळसा अक ठोकर तिनस्यार, आऊन साटी भला आगाईत कि धोळ्द चक्की इन पट्टा आऊन कुतक्या दा लटकुसकु आगाईत, अदिक आऊक खोल समुद्र दा मुळ्कुस्कु आगाईत. ठोकरगोळ्द कारण दुनिया मा हाय! ठोकरगोळ्द हत्तोद जरूरी आद; पर हाय आ मंळसा मा यार्द कारण ठोकर हततद. 3
“अगर नीन कय या नीन काल नीनी ठोकर तिनस्याव, रा अवरी कळकु भिटबुळ; डुण्डा या लंगळा आगकु जीवन दा प्रवेश माळोद नीन साटी इदुर से वळ्लीद आद कि येढ्ढ कय या येढ्ढ काल ईतकु नी अनन्त बेक्की दा हाक्कु आगाईद. 4अगर नीनव कण्णगोळ नीनी ठोकर तिनस्याव, रा अवरी तेगुकु भिटबुळ; कुढ्ढ आगकु जीवन दा प्रवेश माळोद नीन साटी इदुर से वळ्लीद आद कि येढ्ढ कण्ण ईतकु नी नरक इन बेक्की दा हाक्कु आगाईद.
काळ्द म्यांडागोळ्द उदाहरण
(लूका १५:३-७)
“नीव ई स्याणेर दा टु यारीकु तुच्छ जान्सबाळेतीर; यतिकी ना नीम से अनतीन कि स्वर्ग दा आंदुर स्वर्गदूत नान स्वर्गीय आप्प उन मार्रा हमेशा नोळतार. यतिकी मंळसा अन्द पार काळ्द मंळसागोळी उळ्सली बंदान.
“नीव येन सोचतीर? अगर यावारा मंळसा अन्द सौ म्यांडागोळ आव, अदिक अदुर्दा टु ऊंद भटकुसेगुल, रा येन आव निन्यानबे अक बिटकु, अदिक पहाळीगोळ मा होगकु, आ भटकुस्द म्यांडा अक ढुँढ्सतीदिल? अदिक अगर हिंग आत कि अद आऊक सिक्त, रा ना नीम से खरा माताळतीन कि आव आ निन्यानबे म्यांडागोळ साटी जो भटकुसकु ईला ईरव, आट खुश आगतीदील याट कि ई म्यांडा अन्द साटी आदान. हिंग अच नीम आप्प उन जो स्वर्ग दा आन ईद इच्छा हैलेच कि ई स्याणेर दा टु ऊंद भी नाश आगुल.
वार्टुर अदिक आकतिंगेर्द पाप
“अगर नीन वार्ट नीन खिलाप अपराध माळुल, रा होग अदिक आबना दा मातचीत हेळकु आऊक समजुस; अगर आव नींद केळ्यान रा नी तान वार्ट उक हासिल माळ कोंड. अगर आव केळालुन, रा ऊंद या येढ्ढ मुंदरी तान सांगुळ मात्त वोय, कि ‘हर ऊंद मात येढ्ढ या मुर गवाहगोळ्द बाय देल निश्चित माळोद आगुल.’ अगर आव आंदुर्द भी केळालुन, रा मंडली से अंदकोम, लेकीन अगर आव मंडली अन भी केळालुन रा नी आऊक गैरयहूदी अदिक कर ताकोमावाळेर घाई मान्स कोम.
रोकसोद अदिक मौका कोळोद
“ना नीम से खरा माताळतीन, जो येनारा नीव पृथ्वी मा कट्टीर, अद स्वर्ग दा कट्टीत अदिक जो येनारा नीव धरती मा कट्टया, अद स्वर्ग दा खुलसीत. बाक ना नीम से अनतीन, अगर नीम दा टु येढ्ढ मुंदुर पृथ्वी मा यातोदारा मात इन साटी ऊंद मन आगकु अदरी बेळीर, रा अद नान आप्प उन दी टु जो स्वर्ग दा आन, आंदुर्द साटी आगेदीत. यतिकी येल येढ्ढ या मुर मुंदुर नान हेसुर मा जमा आगतार, अल ना आंदुर न्याड्या दा ईरतीन.”
निर्दयी सेवक उन उदाहरण
आग पतरस हात्ती बंदकु यीशु से अंदुन, “हे प्रभु, अगर नान वार्ट अपराध माळतेला ईत्तान, रा ना यास अनली आऊक माफ माळाईन? येन येळ घन ताका?”
यीशु आऊन से अंदुन, “ना नीन से ईद अनालीन कि येळ घन ताका लेकीन येळ घन इन सत्तर गुणा ताका.”
“इदुरसाटी स्वर्ग इन राज्य आ राजा अन्द घाई आद, याव तान दासगोळ से हिसाब ताकोमोद चाहासदुन. याग आव हिसाब ताकोमली कुरतुन, रा ऊंद मंळसा आऊन मुंद तनकु आदुन जो करोळो नव कर्जदार ईरोन. याग आऊन हात्ती पैस्या खण्ळ्सली येनु ईला ईरोद, रा आऊन स्वामी अंदुन, ‘ईव अदिक ईऊन हिंग्स अदिक चिकोर चिण्ग अदिक जो येनारा ईऊन आद सप्पा मारकु आगुल, अदिक कर्ज तुमकु आगुल.’ इदुर मा आ दास बिदकु आ स्वामी इक प्रणाम माळदुन, अदिक अंदुन, ‘हे स्वामी धीरज हुडु, ना सब कुछ तुम बुळाईन.’ आग आ दास उन स्वामी तरस तिनकु आऊक बिट बुट्टुन, अदिक आऊन कर्जा भी माफ माळ बुट्टुन.
“लेकीन याग आव दास व्हार्या होट्टुन, रा आऊन संगी दासगोळ दा टु ऊंद आऊक सिकदुन जो आऊन सौ दीनार इन कर्जदार ईरोन; आव आऊक हुडुकु आऊन कुतक्या ओतदुन अदिक अंदुन, ‘जो येनारा नीन मा कर्ज आद तुमकोम.’ इदुर मा आऊन संगी दास बिदकु आऊन से विनती माळली कुरतुन, ‘धीरज हुडु, ना सब तुम बुळाईन.’ आव मानसिदिल, लेकीन होगकु आऊक बंदीगृह दा हाक बुट्टुन कि यागासताका कर्ज तुम कोमालुन, आगासताका अल्या ईरूल. आऊन संगी दास ईद जो आगीत नोळकु हापाळ उदास आदुर, अदिक होगकु तान स्वामी इक पुरा हाल हेळ बुटुर. आग आऊन स्वामी आऊक कारूकु आऊन से अंदुन, ‘हे दुष्ट दास, नी जो नान से विनती माळ्द, रा ना नींद अद पुरा कर्ज माफ माळदीन. इदुरसाटी ह्यांग ना नीन मा दया माळदीन, हांग अच नीनी भी तान संगी दास मा दया ईला माळोद हुन?’ अदिक आऊन स्वामी गुस्सा दा बंदकु आऊक सजा कोळावाळेर्द कय दा सौप्स बुट्टुन, कि यागासताका आव पुरा कर्ज तुम कोमालुन, आगासताका आंदुर्दा कय दा ईरूल.
“ईदा प्रकार अगर नीम दा टु हर ऊंद तान वार्ट उक मन देल माफ माळ्यान, रा नान आप्प जो स्वर्ग दा आन, नीम से भी हांग अच माळ्यान.”
Source notes (8)
- Cross-reference लूका २२:२४
- Cross-reference मरकुस १०:१५; लूका १८:१७
- Cross-reference मत्ती ५:३०
- Cross-reference मत्ती ५:२९
- Cross-reference लूका १९:१०
- Cross-reference लूका १७:३
- Cross-reference मत्ती १६:१९; यूहन्ना २०:२३
- Cross-reference लूका १७:३,४
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.