परमेश्वर उन वचन
लैव्यव्यवस्था 27
प्रभु उन भेंट देल संबंधित नियम
बाक यहोवा मूसा से अंदुन, “इस्राएलीगोळ से ईद अन कि याग यावारा विशेष मन्नत मानसुल, रा मन्नत माळ्द मंळसा नींद ठहरूसोद अनुसार यहोवा दोर आदार; इदुरसाटी अगर आव ईप्पत वर्ष या अदुर से यक्कुल अदिक साठ वर्ष से कम ऊमर इन गंळ्स ईरूल, रा आऊन साटी पवित्र जागा अन्द शेकेल1 इन अनुसार पचास शेकेल इन बेळ्ली नव तुकळागोळ ठहरूसुल.” अगर आक आर्त ईरूल, रा तीस शेकेल ठहरूसुल. बाक अगर आंदुर ऊमर अईद वर्ष या अदुर से यक्कुल अदिक ईप्पत वर्ष से कम इन ईरूल, रा पार उन साटी रा ईप्पत शेकेल, अदिक पोर इन साटी हत्त शेकेल ठहरूसुल. अगर आंदुर ऊमर ऊंद तिंगुळ इन या अदुर से यक्कुल अदिक अईद वर्ष से कम इन ईरूल, रा पार उन साटी रा अईद शेकेल, अदिक पोर इन साटी मुर शेकेल ठहरूसुल. बाक अगर आऊन ऊमर साठ वर्ष इन या अदुर से यक्कुल ईरूल, अदिक आव गंळ्स ईरूल रा आऊन साटी पन्द्रह शेकेल ठहरूसुल.
“लेकीन अगर यावारा ईट गरीब ईरूल कि याजक उन ठहरूसकु आग्याद दाम कोळ सकालुन, रा आव याजक उन मुंद निदरूसकु आगुल, अदिक याजक आऊन पूंजी ठहरूसुल, मतलब याट मन्नत माळावाळेर से आग सकुल, याजक आऊन दा अनुसार ठहरूसुल.”
“बाक या पशुगोळ दा टु लॉकुर यहोवा अक चढ़ावा येर्सतार, अगर हिंगुर दा टु यावारा मन्नत माळकु आगुल, रा जो पशु यावारा यहोवा अक कोळुल अद पवित्र ठहरूसीत. आव अदरी यातोदु प्रकार देल ईला बदलुसुल, ईला रा अद बुरा अन्द बदला वळ्लींद, अदिक न वळ्लीद इन बदला बुरा कोळुल; अदिक अगर आव आ पशु उन बदला दुसरा पशु कोळुल, रा आव अदिक आऊन बदला येढ्ढु पवित्र ठहरूसीत. अदिक या पशुगोळ दा टु यहोवा अन्द साटी चढ़ावा येरसालुर हिंगुर दा टु अगर अद ईरूल, आंदुर आऊक याजक उन मुंद निदरूस बुळुल, आग याजक पशु उन गुण-अवगुण येढ्ढु विचार माळकु अदुर किंमत ठहरूसुल; अदिक यास याजक ठहरूसुल अदुर किंमत आट अच ठहरूसुल. पर अगर मन्नत माळावाळा आऊक यातोदारा प्रकार देल बिळसोद चाहसुल, रा जो किंमत याजक ठहरूसदुन अदुर दा आऊन अईदवा भाग मात्त यक्कुल वाळुसकु कोळुल.”
“बाक अगर यावारा तान मान्ना यहोवा अन्द साटी पवित्र ठहरूसकु मन्नत माळुल, रा याजक आऊन गुण-अवगुण येढ्ढु विचार माळकु आऊन किंमत ठहरूसुल; अदिक याट याजक ठहरूसुल आऊन किंमत आट अच ईरूल. अदिक अगर मान्नी इक पवित्र माळावाळा आऊक बिळसोद चाहसुल, रा यास पैस्या याजक आऊन किंमत ठहरूसदुन अदुर दा आव अईदवा भाग मात्त यक्कुल वाळुसकु कोळुल, आग अद मान्ना आऊंद अच ईत्तीत.”
“बाक अगर यावारा तान खुद इन जागा अन्द यातोदारा भाग यहोवा अन्द साटी पवित्र ठहरूसोद चाहसुल, रा अदुर किंमत इदुर अनुसार ठहरूसुल, कि अदुर दा याट बींजा बिद्दीत; याट भूमी दा होमेर2 तीम जऊ बिद्दीत आटुर दा किंमत पचास शेकेल ठहरूसीत. अगर आव तान केई आजादी प्राप्ति इन वर्ष टु उच पवित्र ठहरूसुल, रा अदुर किंमत नींद ठहरावीन अनुसार ठहरूसुल; अदिक अगर आव तान केई आजादी प्राप्ति इन वर्ष इन बाद्दा पवित्र ठहरूसुल, रा याट वर्ष दुसरा आजादी प्राप्ति इन वर्ष इक बाकी ईरूल अऊर दा अनुसार याजक आऊन साटी पैस्या अन्द हिसाब माळुल, आग यास हिसाब दा बरूल आटा याजक उन ठहरूसोर देल कम आगुल. अदिक अगर केई इक पवित्र ठहरूसावाळा अदरी बिळसोद चाहसुल, रा जो किंमत याजक ठहरूसदुन अदुर दा अद अईदवा भाग मात्त यक्कुल वाळुसकु कोळुल, आग केई आऊंदा ईत्तीत. अदिक अगर आव केई इक बिळसोद ईला चाहस्यान, या आव अदरी दुसरा अन कय दा मारीदान, रा केई मुंद भी यागलु बिळस्कु आगबाळुल; लेकीन याग अद केई आजादी प्राप्ति इन वर्ष दा बिळस्कु आगुल, आग पुरा रीती देल भेंट माळकु आत केई इन घाई यहोवा अन्द साटी पवित्र ठहरूसुल, मतलब अद याजक उन अच खुद इन जागा आगेगुल.”
बाक अगर यावारा तान कोंडकु केई, जो आऊन खुद इन भूमी इन केईगोळ दाकळोद ईरबाळुल, यहोवा अन्द साटी पवित्र ठहरूसुल, रा याजक आजादी प्राप्ति इन वर्ष ताका हिसाब माळकु आ मंळसा अन्द साटी यास ठहरूसदुन आट अच आव यहोवा अन्द साटी पवित्र जान्सकु अदा दिशी कोटबुळुल. आजादी प्राप्ति इन वर्ष दा अद केई आऊंदा अधिकार दा याऊन से अद कोंडकु आग्याद बाक होट्ट बरूल, मतलब याऊन अद खुद इन जागा ईरूल आऊंदा बाक आगेगुल.
या-या वस्तु उन किंमत याजक ठहरूसदुन अदुर किंमत पवित्र जागा अन्द शेकेल इन हिसाब देल ठहरूसुल: शेकेल ईप्पत गेरा3 अन्द ठहरूसुल.
“लेकीन मान्नागोळ पशुगोळ दा टु पयला पाड्डा, जो पयला पैदा आगोद कारण यहोवा अन्द ठहरूसकु आन, अदरी यावारा पवित्र ठहरूसबाळुल; चाहे अद पाड्डा ईरूल, चाहे म्यांडा या मर्री इन पाड्डा, अद यहोवा अन्द अच हुंद. लेकीन अगर अद अशुद्ध पशु उन आगुल , रा आऊन पवित्र ठहरूसावाळा अदरी याजक उन ठहरूसकु आग्याद किंमत इन अनुसार अदुर अईदवा भाग मात्त वाळुसकु बिळ्स सकतान; अदिक अगर अद बिळ्सकु आगीदिल, रा याजक उन ठहरूसकु किंमत मा मारकु आगुल.
“लेकीन तान पुरा वस्तुगोळ दा टु जो येनारा यावारा यहोवा अन्द साटी अर्पण माळुल, चाहे मंळसा आगुल चाहे पशु, चाहे आऊन खुद इन केई आगुल, हिंग यातोदारा अर्पण माळ्द वस्तु मारकु आगबाळुल न बिळ्सकु आगुल; जो येनारा अर्पण माळकु आगुल अद यहोवा अन्द साटी भेंट पवित्र ठहरूसुल. मंळसागोळ दा टु जो यावारा मृत्यु दण्ड इन साटी अर्पण माळकु आदुन, आऊक बिळ्सकु आगबाळुल; अवश्य आद आव कोंदकु आगुल.
“बाक जागा अन्द उपज इन पुरा दशमांश, चाहे अद जागा अन्द बींजा आगुल चाहे मार्र इन काय, ईव यहोवा अन्द हूँ; अद यहोवा अन्द साटी पवित्र ठहरूसुल. अगर यावारा तान दशमांश दा टु येनारा वापस ताकोमोद चाहसुल, रा अईदवा भाग वाळुसकु अदरी बिळसुल. अदिक गोसी-वस्ता अदिक म्यांडा-मर्रगोळ, मतलब जो-जो पशु आळोर साटी कोल इन ल्यालमा टु होट्टबुळावाळेर आव अऊर दशमांश, मतलब हत्त-हत्त पशुगोळ दा टु ऊंद-ऊंद पशु यहोवा अन्द साटी पवित्र ठहरूसुल. यावारा अऊरव गुण-अवगुण विचार माळबाळुल, अदिक न अवरी बदलुसुल; अगर यावारा अवरी बदलुस भी कोंडुन, रा आव अदिक आऊन बदला येढ्ढु पवित्र ठहरूसुल; अदिक अव यागलु बिळ्सकु आगबाळुल.”
जो आग्यागोळी यहोवा इस्राएलीगोळ साटी सीनै पर्वत मा मूसा अक कोटीदुन, अव ईव अच हूँ.
Source notes (3)
- Footnote ऊंद शेकेल याने साढ़े हन्नेळ ग्राम बेळ्ली इन तुकळा
- Footnote पचास शेकेल
- Footnote ऊंद गेरा यानी हन्नेळ ग्राम
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.