लैव्यव्यवस्था 26

आशीष इन वादा

(व्यवस्थाविवरण 7:12-24; 28:1-14)

1“नीव तान साटी मुरती माळबाळी, अदिक न यातोदारा अगुळ्द मूर्ति या खंबा तान साटी निदरूसेतीर, अदिक न तान द्याश दा प्रणाम माळोर साटी नक्काशीदार कल्ल स्थापित माळेतीर; यतिकी ना नीम्द परमेश्वर यहोवा हुईन.” 2नीव नांद आराम दिनगोळ्द पालन माळेतीर अदिक नांद पवित्र जागा अन्द अंज्क माळी; ना यहोवा हुईन.

3“अगर नीव नांद विधीगोळ मा नळी अदिक नांद आग्यागोळी मान्सकु पालन माळी, 4रा ना नीम्द साटी समय-समय मा माळ बरसुसाईन, बाक भूमी तान उपज पैदा माळीत, अदिक केई इन मार्रगोळ तान-तान काय कोट्टाव; 5ईल ताका कि नीव अंगुर मुरा समय भी दावनी माळतेला ईत्तीर, अदिक बोऊसा समय भी व्हाट्टा तीम अंगुर मुरूतेला ईत्तीर, अदिक नीव मनमानी रोट्टीगोळ तिनतेला ईत्तीर, अदिक तान द्याश दा निडर कुर्तकु ईत्तीर.”

6अदिक ना नीम्द द्याश दा सुख चैन कोळाईन, अदिक नीव मिंगेतीर अदिक नीमी यावारा अंजुसावाळा ईरतीदील; अदिक ना आ द्याश दा खतरनाक प्राणीगोळ इक ईरगोळालीन, अदिक तलवार नीम्द द्याश दा नळ्सगोळालीन. 7अदिक नीव तान दुश्मनगोळी इक बडुकु तुळकाळसेतीर, अदिक आंदुर नीम्द तलवार देल कोंदकु आदार. 8नीम दा टु अईद मंळसा सव मुंदरी अदिक सव मंळसा हत्त हजार मंळसागोळी खदाळस्यार; अदिक नीम्द दुश्मन तलवार देल नीम्द मुंद-मुंद कोंदकु आदार; 9अदिक ना नीम्द दी कृपादृष्टी ईटाईन अदिक नीमी फलवन्त माळाईन अदिक वाळुसाईन, अदिक नीम्द सांगुळ तान वादा अक पुरा माळाईन. 10अदिक नीव ईटकु हाळोद अनाज इक तिंदीर, अदिक व्‍हाशोद ईत्तीत तो भी हाळोद अनाज इक तेगदीर. 11अदिक ना नीम्द न्याड्या तान ईरोद जागा माळकु ईट्टाइन, अदिक नांद जीव नीम से घृणा माळतीदील. 12अदिक ना नीम्द न्याड्या नळाईन वयाळाईन, अदिक नीम्द परमेश्वर बन्सकु ईराइन, अदिक नीव नांद प्रजा बन्सकु ईरेतीर. 13ना रा नीम्द आ परमेश्वर यहोवा हुईन, जो नीम इक मिस्र द्याश टु इदुरसाटी तेगुकु तंदीन कि नीव मिस्त्रगोळ्द दास बन्सकु ईरबाळेतीर; अदिक ना नीम्द जुआळी इक मुरू बुट्टीन, अदिक नीमी सीधा निदरूसकु नळ्सदीन.

आग्या-उल्लंघन इन दण्ड

(व्यवस्थाविवरण 28:15-68)

14“अगर नीव नांद केळतीदिल, अदिक इव सप्पा आग्यागोळ इक ईला मानसीर, 15अदिक नांद विधिगोळ इक निकम्मा जान्सीर, अदिक नीम्द आत्मा नांद निर्णयगोळ देल घृणा माळुल, अदिक नीव नांद सप्पा आग्यागोळ्द पालन माळतीदील, बल्की नांद वादा अक मुरदिर, 16रा ना नीम से ईद माळाईन; मतलब ना नीमी इक बेचैन माळाईन, अदिक क्षयरोग अदिक मय देल पीड़ित माळाईन, अदिक ईऊर कारण नीम्द कण्णगोळ धुंधला आगेदव, अदिक नीम्द मन अति उदास आदीत. अदिक नीम्द बींजा बोऊसोद व्यर्थ आदीत, यतिकी नीम्द दुश्मन आऊन उपज तिन कोंडार; 17अदिक ना भी नीम्द विरूद्ध आगेगाईन, अदिक नीव तान दुश्मनगोळ देल हारूसेदीर; अदिक नीम्द दुश्मन नीम्द म्याकुच अधिकार माळ्यार, अदिक याग यावारा नीम इक खदळुसतीदिल तो भी नीव ओळीर.”

18अदिक अगर नीव ईव मातगोळ्द म्याकुच भी नांद केळबाळेतीर, रा ना नीम्द पापगोळ्द कारण नीमी येळ गुणा सजा मात्त कोळाईन, 19अदिक ना नीम्द बल इन घमण्ड मुरूबुळाईन, अदिक नीम्द साटी आकाश इक मान्सी ल्वाहा अन्द अदिक भूमी इक मान्सी पीतल इन माळ बुळाईन; 20अदिक नीम्द बल अकारथ गऊसकु आदीत, यतिकी नीम्द केई तान उपज पैदा माळतीदील, अदिक भूमि इन मार्रगोळ तान काय कोळतीदील.

21“अगर नीव नांद विरूद्ध नळुतेला अच ईत्तीर, अदिक नांद कहना मान्सतीदील, रा ना नीम्द पापगोळ्द अनुसार नीम्द म्याकुच अदिक येळ गुणा संकट हाकाईन. 22अदिक ना नीम्द न्याड्या आळी दाकळोव पशु कळाईन, जो नीम इक बिना चिकोर्द माळबुट्टार, अदिक नीम्द घरेलु पशुगोळ इक नाश माळ बुट्टार, अदिक नीम्द गिनती घटुस्यार, यदुर देल नीम्द सळकगोळ सूना आगेदव.”

23“बाक अगर नीव ई मातगोळ मा भी नांद ताळना देल ईला सुधुरसीर, अदिक नांद विरूद्ध नळुतेला अच ईत्तीर, 24रा ना भी नीम्द विरूद्ध नळाईन, अदिक नीम्द पापगोळ्द कारण ना खुद अच नीम इक येळ गुणा दंड कोळाईन. 25अदिक ना नीम मा ऊंद हिंग तलवार नळसुसाईन, जो वादा मुरोद पुरा-पुरा बदला ताकोमीत; अदिक याग नीव तान नगरगोळ दा होग होगकु जमा आदीर आग ना नीम्द न्याड्या मरी फैलुसाईन, अदिक नीमी तान दुश्मनगोळ्द कय दा सौप्स बुळाईन. 26याग ना नीम्द साटी अनाज इन आधार इक बंद माळ बुळाईन, आग हत्त आर्तेर नीम्द रोट्टी ऊंद अच तंदुर दा कासकु तौलुस तौलुसकु वाटस्यार; अदिक नीव तिनकु भी तृप्त आगतीदिल.”

27“बाक अगर नीव इदुर म्याकुच भी नांद केळतीदिल, अदिक नांद विरूद्ध नळुतेला अच ईत्तीर, 28रा ना तान न्याय दा नीम्द विरूद्ध नळाईन, अदिक नीम्द पापगोळ्द कारण नीम इक येळ गुणा दंड यक्कुल भी कोळाईन. 29अदिक नीम इक तान पार अदिक पोरगोळ्द चिच्ची तिनोद बिद्दीत. 30अदिक ना नीम्द पूजा अन्द ऊँचा जागा अक नष्ट माळाईन, अदिक नीम्द सुगंधित धूप वेदी इक मुरू बुळाईन, अदिक नीम्द लोथगोळ्द नीम्द मुरूकु मुर्तीगोळ मा भीळ बुळाईन; अदिक नांद आत्मा अक नीम से घृणा आगेदीत. 31अदिक ना नीम्द नगरगोळ इक ऊजळुस बुळाईन, अदिक नीम्द पवित्र जागा अक ऊजळुस बुळाईन, अदिक नीम्द सुखदायक सुगन्ध ग्रहण माळालीन. 32अदिक ना नीम्द द्याश इक सूना माळ बुळाईन, अदिक नीम्द दुश्मन जो अदुर दा ईरतार आंदुर ई मातगोळ्द कारण चकित ईत्तार. 33अदिक ना नीमी द्याश-द्याश इन न्याड्या तितर-बितर माळाईन, अदिक नीम्द हिंद-हिंद तलवार जेडुकु ईराइन; अदिक नीम्द द्याश सूना आगेदीत, अदिक नीम्द नगर ऊजळुसेदाव.” 34“आग यास दिन अद द्याश सूना बिदकु ईत्तीत अदिक नीव तान दुश्मनगोळ द्याश दा ईरेतीर आस दिन आव तान आराम दिनगोळ इक मान्सतेला ईत्तान. आग अच अद द्याश इक आराम सिक्कीत, मतलब तान आराम दिनगोळ इक मान्सतेला ईत्तान. 35यास दिन अद सूना बिदकु ईत्तीत आस दिन अदरी आराम ईत्तीत, मतलब जो आराम अदरी नीम्द अल कुर्तकु ईरोद समय नीम्द आराम दिनगोळ दा सिक्कीदील अद अदरी आग सिक्कीत.”

36अदिक नीम दा टु जो वाचुसकु ईत्तार अदिक तान दुश्मनगोळ्द द्याश दा ईत्तार आंदुर दिल दा ना निराशा पैदा माळाईन; अदिक आंदुर याल्ला अन्द मुरदुर देल भी वोळ्यार, अदिक आंदुर हिंग वोळ्यार ह्यांग यावारा तलवार देल ओळतान, अदिक यावारा बिना पीछा माळकु भी आंदुर बिदोदार. 37याग यावारा पीछा माळावाळा ईरबाळुल आग भी मान्सी तलवार इन अंज्क देल आंदुर आबुर दाबुर देल ठ्वाकरा तिनकु बीळतेला होदार, अदिक नीम इक तान दुश्मनगोळ्द मुंद ठहरूसोद येनारा शक्ती ईरतीदील. 38आग नीव द्याश-द्याश इन न्याड्या दा पोहचुस्कु नाश आगेदीर, अदिक नीम्द दुश्मनगोळ्द भूमी नीम इक तिंद बुट्टीत. 39अदिक नीम दा टु जो वाचुसकु ईत्तार आंदुर तान दुश्मनगोळ्द द्याशगोळ दा तान दुष्कर्म इन कारण गलुस्यार; अदिक तान आप्प उन मुतीगोळ्द दुष्कर्म इन क्याल्सागोळ्द कारण भी आंदुर आंदुर्दा घाई गलुसेदार.

40“पर अगर आंदुर तान अदिक तान आप्प उन मुतीगोळ्द दुष्कर्म इक मान्स कोंडार, कि नाव यहोवा अन्द विरूद्ध नळदेव, 41ईदा कारण आव नाम्द विरूद्ध आगकु नामी दुश्मनगोळ्द द्याश दा तंदुन. अगर आ समय आऊन खतनारहित दिल दबुसीत अदिक आंदुर आ समय तान दुष्कर्म इन दण्ड इक अंगीकार माळ्यार; 42आग जो वादा ना याकूब उन सांगुळ कटीदिन अदरी ना याद माळाईन, अदिक जो वादा ना इसहाक देल अदिक जो वादा ना अब्राहम देल कटीदुन अवरी भी याद माळाईन, अदिक आ द्याश इक भी ना याद माळाईन. 43लेकीन अद द्याश आंदुर बिना सूना बिदकु ईत्तीत, अदिक अऊर बिना सूना ईतकु भी तान आराम दिनगोळ इक मान्सतेला ईत्तान; अदिक आ लॉकुर तान दुष्कर्म इक अंगीकार माळ्यार, ईदा कारण देल कि आंदुर नांद आग्यागोळ्द उल्लंघन माळीदुर, अदिक आंदुर आत्मागोळ इक नांद विधीगोळ देल घृणा ईरोद. 44ईटुर मा भी याग आंदुर तान दुश्मनगोळ द्याश दा ईत्तार, आग ना आंदरी ई प्रकार देल बिळालीन, अदिक न आंदुर से हिंग घृणा माळाईन कि आंदुर सर्वनाश माळ बुळुल अदिक तान आ वादा अक मुरू बुळाईन जो ना आंदुर से कटीदिन; यतिकी ना आंदुर यहोवा परमेश्वर हुईन; 45लेकीन ना आंदुर भलाई इन साटी आंदुर आप्प उन मुतीगोळ देल कटकु वादा अक याद माळाईन, यारी ना दुसरा राज्य अन्द लॉकुर्द कण्णगोळ्द मुंद टु मिस्त्र द्याश टु तेगुकु तंदीन कि ना आंदुर परमेश्वर ठहरूसाईन; ना यहोवा हुईन.”

46जो-जो विधीगोळ अदिक नियम अदिक व्यवस्था यहोवा तान दी टु इस्राएलीगोळ्द साटी सीनै पर्वत मा मूसा अन्द द्वारा ठहरूसकु ईरोद अव ईव अच हूँ.