यहोशू 22

यहोशू उन पूर्व दा बसुस्कु वंशगोळी मान्नी वापस होगोद इजाजत

1आ समय यहोशू रूबेनिगोळ, गादीगोळ अदिक मनश्शे अन आर्धा वंश इन लॉकुरी कारूकु अंदुन. 21“जो जो आग्या परमेश्वर उन दास मूसा नीमी कोटीदुन अव सप्पा नीव मान्सदीर, अदिक जो जो आग्या ना नीमी कोटीन आ सप्पा अक भी नीव मान्सदीर. 3नीव तान वार्टुरी ईस दिनगोळ दा ईंद ताका बिटीदील, लेकीन तान परमेश्वर यहोवा अन आग्या नीव वळ्लीसा पालन माळदीर. 4अदिक ईग नीम परमेश्वर यहोवा नीम वार्टुरी तान वचन इन अनुसार आराम कोटान; इदुरसाटी ईग नीव वापस होगकु तान ड्यारा अक, अदिक तान खुद इन जागा दा, यदरी परमेश्वर उन दास मूसा यरदन इन आपाटी नीमी कोटान, ओळेगी. 5केवल ई मात इन चौकसी माळी कि जो जो आग्या अदिक व्यवस्था परमेश्वर उन दास मूसा नीमी कोटान अदरी मान्सकु तान परमेश्वर यहोवा से प्रेम ईटी, आऊन सप्पा हादीगोळ मा नळी, आऊन आग्यागोळी मान्सी, आऊन भक्ति दा लवलीन ईरी, अदिक तान सप्पा मन अदिक सप्पा प्राण देल आऊन स्यावा माळी.” 6आग यहोशू आंदरी आशीर्वाद कोटकु सार्र माळदुन; अदिक आंदुर तान तान ड्यारा अक होटोदुर. 7मनश्शे अन आरधा गोत्रगोळी मूसा बाशान दा भाग कोटीदुन; लेकीन आरधा गोत्र अक यहोशू आंदुर वार्टुर बीच यरदन इन पश्चिम इन दी भाग कोट्टुन, आंदरी याग यहोशू सार माळदुन कि तान तान ड्यारा दा होगुल, 8आग आंदरी भी आशीर्वाद कोटकु अंदुन, “हापाळ सा जनावर, अदिक व्हान्ना, बेळ्ली, पीतल, लोहा, अदिक हापाळ सा कपळा अदिक हापाळ सा धन सम्पत्ति हुडुकु तान तान ड्यारा अक वापस होगी; अदिक तान शत्रुगोळ्द लूट इन सम्पत्ती इक तान वार्टुर सांगुळ वाट्स कोमेतीर.”

9आग रूबेनी, गादी, अदिक मनश्शे अन आरधा गोत्र इस्त्राएल इन हाती टु, मतलब कनान द्याश इन शीलो नगर टु, तान गिलाद हेसुर इन खुद इन जागा दा, जो मूसा अन द्वारा कोटकु आत, यहोवा अन आग्या अन अनुसार आदुर्द खुद इन जागा आगेगीत, होगोद विचार देल वापस होदुर.

यरदन इन किनारा मा वेदी इन स्थापना

10अदिक रूबेनी गादी, अदिक मनश्शे अन आरधा गोत्र यरदन इन आ तराई दा पोहचुसदुर जो कनान द्याश दा आद, आग आंदुर अल नोळोद योग्य ऊंद धोळ्द वेदी माळदुर. 11अदिक ईदुर समाचार इस्त्राएलगोळ केळदुर दा बत्त, कि रूबेनिगोळ, गादीगोळ, अदिक मनश्शे आरधा गोत्रगोळ कनान द्याश इन मुंद यरदन इन तराई दा, मतलब अदुर आप्पाटी जो इस्त्राएलगोळ्द आद, ऊंद वेदी माळ्यार. 12याग इस्त्राएलगोळ ईद केळदुर, आग इस्त्राएलीगोळ्द सप्पा मंडली आंदुर से लळुसोर साटी चढाई माळली शीलो दा जमा आत. 13आग इस्त्राएलीगोळ रूबेनिगोळ, गादीगोळ, अदिक मनश्शे अन आरधा वंश इन लॉकुर हाती गिलाद द्याश दा एलीआजर याजक उन पार पीनहास उक, 14अदिक आऊन सांगुळ हत्त प्रधानगोळी, मतलब इस्त्राएल इन ऊंद ऊंद गोत्र दा टु पूर्वजगोळ घराना अन ऊंद ऊंद प्रधान इक कळुदुन, अदिक आंदुर इस्त्राएल इन हजारगोळ दा तान तान पूर्वजगोळ घराना अन मुख्य मंळसा ईरोर. 15आंदुर गिलाद द्याश दा रूबेनिगोळ, गादीगोळ, अदिक मनश्शे अन आरधा वंश इन लॉकुर हाती होगकु अनली कुरतुर, 162“यहोवा अन सप्पा मंडली ईद अनतद, कि ‘नीव इस्त्राएल यहोवा परमेश्वर उन ईद ह्यांग विश्वासघात माळीर; ईंद जो नीव ऊंद वेदी माळीर, ईदुर दा नीव आऊन हिंद नळोद बिटकु आऊन खिलाप ईंद लळाई माळीर?’ 173केळी, पोर नगर इन विषय इन अधर्म नाम साटी येनारा कम ईरोद, अगर यहोवा अन मंडली इक भारी दण्ड सिक्त भी रा ईंद इन दिन ताका नाव आ अधर्म देल शुद्ध आगीदील; येन अद नीम नजर दा ऊंद श्याण मात आद, 18कि ईंद नीव यहोवा अक त्यागस्कु आऊन हिंद नळोद बीट बुळतीर? येन नीव यहोवा टु तिर्गेगतीर, अदिक नाळ आव अद इस्त्राएल इन मंडली देल गुस्सा आदान. 19लेकीन अगर नीम खुद इन जागा अशुद्ध आद, रा ईपाटी बंदकु यहोवा अन खुद इन जागा दा, येल यहोवा अन निवास ईरतद, नाम लॉकुर बीच तान तान खुद इन जागा माळ बुळी; लेकीन नाम परमेश्वर यहोवा अन वेदी इक बिटकु अदिक यातोदारा वेदी माळकु न रा यहोवा से लळाई माळी, अदिक न नाम से. 204नोळी, याग जेरह अन्द पार आकान अर्पण माळ्द वस्तु अन बारा दा विश्वासघात माळदुन, आग येन यहोवा अन कोप इस्त्राएल इन पुरा मंडली मा ईला भळकुसीत? अदिक आ मंळसा अन अधर्म अन प्राणदण्ड आबना आऊक ईला सिकीत.”

21आग रूबेनिगोळ, गादीगोळ, अदिक मनश्शे अन आरदा वंश इस्त्राएल इन हजारो अन मुख्य मंळसागोळ इक ईद उत्तर कोट्टुर, 22“यहोवा जो ईश्वरगोळोव परमेश्वर हुन, ईश्वरगोळ परमेश्वर यहोवा ईदरी जान्सतान, अदिक इस्त्राएली भी ईदरी जान्स कोंडार, कि अगर यहोवा टु तिर्गकु या आऊन विश्वासघात माळकु नाव ईद क्याल्सा माळेव, रा नी ईंद नाम इक जीत्ता बिळबाळ, 23अगर ईंद इन दिन नाव वेदी इक इदुरसाटी माळेव कि यहोवा अन हिंद नळोद बीट बुट्टेव, या इदुरसाटी कि अदुर मा होमबली, अन्नबली, या मेलबली येर्सेव, रा यहोवा नी खुद अच ईदुर हिसाब ताकोंडान; 24लेकीन नाव ईदा विचार अदिक मनसा देल ईद माळेव कि येल्यारा भविष्य दा नीम सन्तान नाम सन्तान से ईद अनली हतबाळुल, ‘नीमी इस्त्राएल इन परमेश्वर से येन क्याल्सा? 25यतिकी रूबेनिगोळ, हे गादीगोळ, यहोवा जो नाम अदिक नीम बीच दा यरदन इन सीमा ठहरूस्यान, इदुरसाटी यहोवा दा नीम येनु भाग हैलेच.’ हिंग अनकु नीम सन्तान नाम सन्तान दा टु यहोवा अन अंज्क बीळसुस बुट्टीत. 26इदुरसाटी नाव अंदेव, ‘बरी, नाव तान साटी ऊंद वेदी माळाता, अद होमबली या मेलबलि इन साटी ईला, 27लेकीन इदुरसाटी कि नाम अदिक नीम, अदिक नाम बाद्दा नीम अदिक नाम वंश इन बीच दा गवाही इन क्याल्सा कोळुल; इदुरसाटी नाव होमबली, अदिक मेलबली, अदिक बलिदान येर्सकु यहोवा अन हाती आऊन उपासना माळेव; अदिक भविष्य दा नीम औलाद नाम औलाद से ईद अन बाळुल, कि यहोवा दा नीम येनु भाग हैलेच.’ 28इदुरसाटी नाव अंदेव, ‘याग आ लॉकुर भविष्य दा नाम से या नाम वंश से ईद अनली कुरूल, आग नाव आऊन से अंदेव, कि यहोवा अन नमुना मा माळकु ईद वेदी इक नोळी, यदरी नाम पुर्वजगोळ इक, होमबली या मेलबलि, इन साटी माळीदिल, लेकीन इदुरसाटी माळदुर कि नाम अदिक नीम बीच दा गवाही इन क्याल्सा कोळुल.’ 29ईद नाम से दुर ईरूल कि यहोवा से तिर्गकु ईंद आऊन हींद नळोद बीट बुळुल, अदिक तान परमेश्वर यहोवा अन आ वेदी इक बिटकु जो आऊन निवास इन मुंद आद होमबली, अदिक अन्नबली, या मेलबलि इन साटी दुसरा वेदी माळुल.”

30रूबेनिगोळ, गादीगोळ, अदिक मनश्शे अन आरदा वंश इन लॉकुर्द ई मात केळकु पीनहास याजक अदिक आऊन सांगुळ मंडली इन प्रधान, जो इस्त्राएल इन हजारो अन मुख्य मंळसा ईरोर, आंदुर हापाळ खुश आदुर. 31अदिक एलीआजर याजक उन पार पीनहास रूबेनिगोळ, गादीगोळ, अदिक मनश्शेगोळ से अंदुन, “नीव जो यहोवा अन्द हिंग विश्वासघात माळीदिल, इदुर देल ईंद नाव ईद जान्स कोंडेव कि यहोवा नाम बीच दा आन: अदिक नीव लॉकुर इस्त्राएलगोळ इक यहोवा अन्द कय देल ऊळसीर.” 32आग एलीआजर उन पार पीनहास प्रधानगोळ सांगुळ रूबेनिगोळ, अदिक गादीगोळ हाती टु गिलाद आगतेला कनान द्याश दा इस्त्राएलगोळ हाती होट्ट बंदुन; अदिक ईद बातणी आंदरी अंदकु केळ्सदुन. 33आग इस्त्राएली खुश आदुर; अदिक परमेश्वर उक धन्य अंदुर, अदिक रूबेनिगोळ, अदिक गादीगोळ से लळुसली अदिक आंदुर ईरा द्याश ऊजळुसोर साटी चढाई माळोद मातचीत बाक माळीदिल. 34अदिक रूबेनिगोळ अदिक गादीगोळ ईद अंदकु, “ईद वेदी नाम अदिक आंदुर बीच दा ई मात इन गवाही ठहरूस्याद, कि यहोवा अच परमेश्वर हुन.” आ वेदी इन हेसुर एद5 ईटदुर.