यहोशू 21

लेवीगोळ्द नगर

1आग लेवीगोळ पुर्वजगोळोर घराना अन मुख्य मुख्य मंळसा एलीआजर याजक, अदिक नून उन पार यहोशू, अदिक इस्त्राएली गोत्र अन पुर्वजगोळ घराना अन मुख्य मुख्य मंळसागोळ हाती बंदकु 21कनान द्याश इन शीलो नगर दा अनली कुरतुर, “यहोवा मूसा अन द्वारा नामी बसुसोर साटी नगर, अदिक नाम जनावर साटी अवा नगर इन चराई भी कोळोद आग्या कोटीदुन.” 3आग इस्त्राएली यहोवा अन अनोद अनुसार तान तान भाग दा टु लेवीगोळी चराई अन सांगुळ ईव नगर कोट्टुर.

4आग कहातिगोळ कुलगोळ हेसुर मा चिट्टी तेगदुर. इदुरसाटी लेवीगोळ दा टु हारून याजक इन वंश इक यहूदी, शिमोन, अदिक बिन्यामीन इन गोत्रगोळ भाग दा टु तेरहा नगर सीकदव.

5बाकी कहातिगोळी एप्रैम इन गोत्र अन कुलगोळ, अदिक दान उन गोत्र, अदिक मनश्शे अन आरधा गोत्र अन भागगोळ दा चिट्टी हाक हाक्कु हत्त नगर कोटकु आदव.

6बाक गेर्शोनीगोळी इस्साकार इन गोत्र अन कुलगोळ, अदिक आशेर, अदिक नप्ताली इन गोत्र अन भागगोळ दा टु, अदिक मनश्शे अन आ आरधा गोत्र अन भागगोळ दा टु भी जो बाशान दा ईरोन चिट्टी हाक हाक्कु तेरहा नगर कोटकु आदव.

7कुलगोळ अनुसार मरारीगोळ इक रूबेन, गाद, अदिक जबूलून इन गोत्र अन भागगोळ दा टु हन्नेळ नगर कोटकु आदव. 8जो आग्या यहोवा मूसा अन द्वारा कोटीदुन अदुर अनुसार इस्त्राएलीगोळ लेवीगोळी चराई सांगुळ ईव नगर चिट्टी हाक हाक्कु कोट्टुर. 9आंदुर यहूदागोळ अदिक शिमोन उन गोत्र अन भागगोळ दा टु ईव नगर यारव हेसुर लिख्सकु आंदरी कोट्टुर; 10ईव नगर लेवीय कहाती कुलगोळ दा टु हारून इन वंश इन साटी ईरव; यतिकी पयला चिट्टी आंदुर अच हेसुर मा होटीत. 11मतलब आंदुर आंदरी यहूदा अन पहाळी द्याश दा नाकु दीकळोद चराई सांगुळ किर्यतर्बा नगर कोट बुट्टुन, जो अनाक उन आप्प अर्बा अन हेसुर मा कहलुसदुन अदिक हेब्रोन भी कहलुसतान. 12लेकीन आ नगर इन केई अदिक आऊन ऊर आंदुर यपुन्ने उन पार कालेब उक आऊन खुद इन जमीन माळकु कोट बुट्टुर.

13आग आंदुर हारून याजक इन वंश इन चराईगोळ सांगुळ खूनी इन शरण नगर हेब्रोन, अदिक तान तान चराई सांगुळ लिब्ना, 14यत्तीर, एश्तमो, 15होलोन, दबीर, 16ऐन, यूता, अदिक बेतशेमेश कोट्टुर, ई प्रकार आ येढ्ढु गोत्रगोळ भाग दा टु ऊम्बत नगर कोटकु आदव. 17अदिक बिन्यामीन इन गोत्र अन भाग दा टु तान तान चराई सांगुळ ईव नाक नगर कोटकु आदव, मतलब गिबोन, गेबा, 18अनातोत अदिक अल्मोन. 19ई प्रकार हारून वंशी याजकगोळी तेरहा नगर अदिक आंदुरव चराईगोळ सीकदव.

20बाक बाकी कहाती लेवीगोळ कुलगोळ भाग इन नगर चिट्टी हाक हाक्कु एप्रैम इन गोत्र अन भाग दा टु कोटकु आदव. 21मतलब आंदरी चराई सांगुळ एप्रैम उन पहाळी द्याश दा खूनी इन शरण ताकोमोद शकेम नगर कोटकु आत, बाक तान तान चराई सांगुळ गेजेर, 22किबसैम, अदिक बेथोरोन; ईव नाक नगर कोटकु आदव. 23अदिक दान इन गोत्र अन भाग दा टु तान तान चराई सांगुळ, एलतके, गिब्बतोन, 24अय्यालोन, अदिक गत्रिम्मोन; ईव नाक नगर कोटकु आदव. 25अदिक मनश्शे अन आरधा गोत्र अन भाग दा टु तान तान चराईगोळ सांगुळ तानाक अदिक गत्रिम्मोन; ईव येढ्ढ नगर कोटकु आदव. 26ई प्रकार बाकी कहातिगोळ कुलगोळ सप्पा नगर चराई सांगुळ हत्त ठहरूसदुर.

27बाक लेवीगोळ कुल दाकळोर गेर्शोनीगोळी मनश्शे अन आरधा गोत्र अन भाग दा टु तान तान चराई सांगुळ खूनी इन शरण नगर बाशान उन गोलान अदिक बेशतरा; ईव येढ्ढ नगर कोटकु आदव. 28अदिक इस्साकार इन गोत्र अन भाग दा टु तान तान चराई सांगुळ किश्योन, दाबरत, 29यर्मूत, अदिक एनगन्नीम; ईव नाक नगर कोटकु आदव. 30अदिक आशेर इन गोत्र अन भाग दा टु तान तान चराईगोळ सांगुळ मिशाल, अब्दोन, 31हेल्कात, अदिक रहोब; ईव नाक नगर कोटकु आदव. 32अदिक नप्ताली इन गोत्र अन भाग दा टु तान तान चराईगोळ सांगुळ खूनी इन शरण नगर गलील इन केदेश, बाक हम्मोतदोर, अदिक कर्तान; ईव मुर नगर कोटकु आदव. 33गेर्शोनीगोळ कुलगोळ अनुसार आंदुर सप्पा नगर तान तान चराई सांगुळ तेरहा ठहरूसदुर.

34बाक बाकी लेवीगोळ, मतलब मरारीगोळ कुलगोळी जबूलून इन गोत्र अन भाग दा टु तान तान चराई सांगुळ योकनाम, कर्ता, 35दिम्ना, अदिक नहलाल; ईव नाक नगर कोटकु आदव. 36अदिक रूबेन इन गोत्र अन भाग दा टु तान तान चराई सांगुळ बेसेर, यहसा, 37कदेमोत, अदिक मेपात; ईव नाक नगर कोटकु आदव. 38अदिक गाद इन गोत्र अन भाग दा टु तान तान चराई सांगुळ खूनी इन शरण नगर गिलाद दाकळोद रामोत, बाक महनैम, 39हेशबोन, अदिक याजेर, जो सप्पा मीलुसकु नाक नगर कोटकु आदव. 40लेवीगोळ बाकी कुलगोळ मतलब मरारीगोळ कुलगोळ अनुसार आंदुर सप्पा ईवा ठहरूसदव, ई प्रकार आंदरी हन्नेळ नगर चिट्टी हाक हाक्कु कोटकु आदव.

41इस्त्राएलगोळ्द निज भूमी इन बीच लेवीगोळ सप्पा नगर तान तान चराई सांगुळ अळतालीस ठहरूसदव. 42ईव सप्पा नगर तान तान नाकु दीकळव चराईगोळ सांगुळ ठहरूसदव; ई सप्पा नगरगोळ्द ईदा दशा ईरोद.

इस्त्राएलगोळ्द कनान द्याश मा पुरा अधिकार

43ई प्रकार यहोवा इस्त्राएलगोळी अद सप्पा द्याश कोट्टुन, यदरी आव आंदुर पुर्वजगोळ से किर्‍या तीनकु कोळली हेळीदुन; अदिक आंदुर आऊन अधिकारी आगकु अल बसुसेदुर. 44अदिक यहोवा आ सप्पा मातगोळ अनुसार, जो आव आंदुर पुर्वजगोळ से किर्‍या तीनकु अंदीदुन, आंदरी नाकु दी टु आराम कोट्टुन; अदिक आंदुर दुश्मनगोळ दा टु याऊ भी आंदुर मुंद टिक्स सकीदील; यतिकी यहोवा आ सप्पा अक आंदुर वश दा माळ बुट्टुन. 45यास भलाई इन मातगोळ यहोवा इस्त्राएल इन घराना टु अंदीदुन अदुर दा टु यातोदु मात भी बिटीदील; सप्पा च्या सप्पा पुरा आदव.