परमेश्वर उन वचन
यूहन्ना 15
यीशु खरा दाखलता
“खरा दाखलता ना हुईन, अदिक नान आप्प किसान आन. जो खांदी नान दा आद अदिक फलसाल्द, अदरी आव कळ्द बुळतान; अदिक जो फल्सतद, अदरी आव छाट्सतान ताकी अदिक फलसुल. नीव रा आ वचन इन कारण जो ना नीम से अंदीन, शुद्ध आईर. नीव नान दा बन्सकु ईरी, अदिक ना नीम दा. ह्यांग खांदी अगर दाखलता दा बन्सकु ईरतीदील रा तान तान देल फल्स सकाल्द, हांगा नीव भी अगर नान दा बन्सकु ईरतीदील रा फल्स सकालीर. ना दाखलता हुईन: अदिक नीव खांदीगोळ हुईर. जो नान दा बन्सकु ईरतान अदिक ना आऊन दा, अद हापाळ काय तरतद, यतिकी नान से अलग आगकु नीव येनु माळ सकालीर. अगर यावारा नान दा बन्सकु ईरूल, रा आव खांदी अन घाई भिटकु आगतान, अदिक वंळ्गेगतान; अदिक लॉकुर अवरी सकलुसकु बेक्की दा भीट बुळतार, अदिक अव होत्तेगताव. अगर नीव नान दा बन्सकु ईत्तीर अदिक नान वचन नीम दा बन्सकु ईत्तीत, रा जो चाहासीर बेळी अदिक अद नीम साटी आगेदीत. नान आप्प उन महिमा ईदुर देल आगतद कि नीव हापाळ सा काय तरी, आग अच नीव नान चेला ठहरूसीर.” ह्यांग आप्प नान से प्यार ईटदुन, हांग अच ना नीम से प्यार ईटदीन; नान प्यार दा बन्सकु ईरी. अगर नीव नान आग्यागोळी मानसीर, रा नान प्यार दा बन्सकु ईत्तीर; ह्यांग कि ना तान आप्प उन आग्यागोळी मान्सदीन, अदिक आऊन प्यार दा बन्सकु ईरतीन. ना ई मातगोळी नीम से इदुरसाटी अंदीन, कि नान खुशी नीम दा बन्सकु ईरूल, अदिक नीम खुशी पुरा आगेगुल. 1“नान आग्या ईद आद, कि ह्यांग ना नीम से प्यार ईटदीन, हांग अच नीव भी आबुर दाबुर से प्यार ईटी. इदुर से धोळ्द प्यार यारदु ईला कि यावारा तान संगीगोळ साटी तान जीव कोळुल. जो आग्या ना नीमी कोळतीन, अगर अदरी मानसीर रा नीव नान संगी हुईर. ईगी टु ना नीमी दास अनतीदिल, यतिकी दास जानसालुन कि आऊन मालिक येन माळतान; लेकीन ना नीमी संगी अंदीन, यतिकी जो मातगोळी ना तान आप्प से केळदीन, अव सप्पा नीमी हेळ बुटीन. नीव नानी नीवळुसीदील लेकीन ना नीमी नीवळुसदीन कि नीव होगकु काय तरी अदिक नीम काय बन्सकु ईरूल, कि नीव नान हेसुर देल जो येनारा आप्प से बेळी, अद नीमी कोळुल. ई मातगोळ आग्या ना नीमी इदुरसाटी कोळतीन कि नीव आबुर दाबुर से प्यार ईटी.”
दुनिया अन दुश्मनी
“अगर दुनिया नीम से दुश्मनी ईटतद, रा नीव जान्सतीर कि आव नीम से पयले नान से दुश्मनी ईटदुर. अगर नीव दुनिया नोर आगायदीर, रा दुनिया तानोर से प्यार ईटाईत; लेकीन ईद कारण कि नीव दुनिया अन आल्लच, लेकीन ना नीमी दुनिया दा टु नीवळुस कोंडीन, इदुरसाटी दुनिया नीम से दुश्मनी ईटतद. 2जो मात ना नीम से अंदिदीन, ‘दास तान स्वामी से धोड्डेव ईरालुन,’ अदरी याद ईटी. अगर आंदुर नानी सतुसदुर, रा नीमी भी सतुस्यार; अगर आंदुर नान मात मान्सदुर, रा नीम्द भी मानस्यार. लेकीन ईद सप्पा येनारा आंदुर नान हेसुर इन कारण नीम सांगुळ माळ्यार, यतिकी आंदुर नानी कळावाळा अक जानसालुर. अगर ना ईला बरायदीन अदिक आंदुर से मातगोळी ईला माळायदीन, रा आंदुर पापी ईला ठहरूसयदुर; लेकीन ईग आंदरी पाप इन साटी येनु बहाना हैलेच. जो नान से दुश्मनी ईटतान, आव नान आप्प से भी दुश्मनी ईटतान. अगर ना आंदुर दा आंदुर क्याल्सा ईला माळायदीन जो अदिक याऊ माळीदील, रा आंदुर पापी ईला ठहरूसयदुर; लेकीन ईग रा आंदुर नानी अदिक नान आप्प येढ्ढु मुंदरी नोळदुर अदिक येढ्ढु से दुश्मनी माळदुर. ईद इदुरसाटी आत कि अद वचन पुरा आगुल, जो आंदुर्द व्यवस्था दा लिख्सकु आद, ‘आंदुर नान से फालतु दुश्मनी माळदुर.’ लेकीन याग आव मदतगार बंदान, यारी ना नीम हाती आप्प उन दी टु कळाईन, मतलब सच्चाई अन आत्मा जो आप्प उन दी टु होळतान, रा आव नान गवाही कोट्टान; अदिक नीव भी नान गवाह आईर यतिकी सुरूवात टु नान सांगुळ ईतीर.”
Source notes (2)
- Cross-reference यूहन्ना १३:३४; १५:१७; १ यूहन्ना ३:२३; २ यूहन्ना १:५
- Cross-reference मत्ती १०:२४; लूका ६:४०; यूहन्ना १३:१६
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.