परमेश्वर उन वचन
यूहन्ना 14
परमेश्वर ताका होगोद हादी
“नीम मन व्याकुल आगबाळुल; परमेश्वर मा विश्वास ईटी अदिक नान मा भी विश्वास ईटी. नान आप्प उन मान्या हापाळ सा ईरोद जागा आद, अगर ईला ईराईत रा ना नीम से अनबुळायदिन; यतिकी ना नीम साटी जागा तयार माळली होगतीन. अदिक अगर ना होगकु नीम साटी जागा तयार माळाईन, रा बाक बंदकु नीमी तान मान्या ओयाईन कि ना यल इराईन नीव भी अल ईरी. ना यल होगतीन नीव अल ईद हादी अरूतीर.” थोमा आऊन से अंदुन, “हे प्रभु, नाव ईद अरालेव कि नी यल होगेत्या; रा हादी ह्यांग अरतेव?” यीशु आऊन से अंदुन, “हादी अदिक सच्चाई अदिक जीवन ना अच हुईन; बिना नान द्वारा याऊ आप्प उन हात्ती होग सकालुन. आव आंदुर से अंदुन अगर नीव नानी अर्त कोमायदीर, रा नान आप्प उक भी अरायदिर; अदिक ईग आऊक अरूतीर, अदिक आऊक नोळीर भी.”
फिलिप्पुस आऊन से अंदुन, “हे प्रभु, आप्प उक नामी तोर्स बुळ, ईदा नाम साटी हापाळ आद.” यीशु आऊन से अंदुन, “हे फिलिप्पुस, ना ईस दिन टु नीम सांगुळ आईन, अदिक येन नी नानी जान्साल? याव नानी नोळ्यान आव आप्प उक नोळ्यान. नी येती अनत्या कि आप्प उक नामी तोर्स?” येन नी विश्वास माळाल कि ना आप्प दा आईन अदिक आप्प नान दा आन? ई मातगोळी जो ना नीम से अनतीन, तान दी टु अनालीन, लेकीन आप्प नान दा ईतकु तान क्याल्सा माळतान. नान विश्वास माळी कि ना आप्प उन दा आईन अदिक आप्प नान दा आन; ईदारा क्याल्सागोळ्द अच कारण नान विश्वास माळी. “ना नीम से खरा खरा अनतीन कि जो नान मा विश्वास ईटतान, ई क्याल्सा जो ना माळतीन आव भी माळ्यान, बल्की ईऊर से भी धोड्डेव क्याल्सा माळ्यान, यतिकी ना आप्प उन हात्ती होगतीन. जो येनारा नीव नान हेसुर देल बेळीर, अदा ना माळाईन कि पार उन दरवाजा मा आप्प उन महिमा आगुल. अगर नीव नान से नान हेसुर देल येनारा बेळीर, रा ना अदरी माळाईन.”
पवित्र आत्मा अन वादा
“अगर नीव नान से प्यार ईटतीर, रा नान आग्यागोळी मानसीर. ना आप्प उन से विनती माळाईन, अदिक आव नीमी ऊंद अदिक सहायक कोट्टान कि आव सदा नीम सांगुळ ईरूल. मतलब खरा अन आत्मा, यारी दुनिया ग्रहण माळ सकाल्द, यतिकी आव ना आऊक नोळतान अदिक ना आऊक अरूतान; नीव आऊक अरूतीर, यतिकी आव नीम सांगुळ ईरतान, अदिक आव नीम दा ईत्तान. ना नीमी अनाथ बिळतीदील; ना नीम हात्ती बरतीन. अदिक थ्वाळासा समय ईतोग्याद कि बाक दुनिया नानी नोळतीदिल, लेकीन नीव नानी नोळीर; इदुरसाटी कि ना जित्ता आईन, नीव भी जित्ता ईत्तीर. आ दिशी नीव जानसीर कि ना तान आप्प दा आईन, अदिक नीव नान दा, अदिक ना नीम दा. यार हात्ती नान आग्यागोळ आव अदिक आव अवरी मान्सतान, आवा नान से प्यार ईटतान; अदिक जो नान से प्यार ईटतान आऊन से नान आप्प प्यार ईट्यान, अदिक ना आऊन से प्यार ईटाईन अदिक तान तान इक आऊन मा प्रगट माळाईन.” आ यहूदा जो इस्करियोती ईला ईरोन, आऊन से अंदुन, “हे प्रभु, येन आत कि नी तान तान इक नाम मा प्रगट माळोद चाहासत्या अदिक दुनिया मा ईला?” यीशु आऊक उत्तर कोट्टुन, “अगर यावारा नान से प्यार ईट्यान रा आव नान वचन इक मानस्यान, अदिक नान आप्प आऊन से प्यार ईट्यान, अदिक नाव आऊन हात्ती बंदेव अदिक आऊन सांगुळ वास माळेव. जो नान से प्यार ईटालुन, आव नान वचन मानसालुन; अदिक जो वचन नीव केळतीर अद नांद ईला लेकीन आप्प उन हुन, याव नानी कळुदुन.” “ई मातगोळी ना नीम सांगुळ ईतकु नीम से अंदीन. लेकीन सहायक मतलब पवित्र आत्मा यारी आप्प नान हेसुर देल कळ्यान, आव सप्पा मातगोळी कलस्यान, अदिक जो येनारा ना नीम से अंदीन, आव सप्पा नीमी याद माळसुस्यान. ना नीमी शांती कोटकु होगतीन, तान शांती नीमी कोळतीन; ह्यांग दुनिया कोळतद, ना नीमी हांग कोळालीन: नीम मन व्याकुल आगबाळुल अदिक अंजबाळुल.” नीव केळदीर कि ना नीम से अंदीन, “ना होगतीन, अदिक नीम हात्ती मात्त बराईन.” अगर नीव नान से प्यार ईटायदीर, रा ई मात देल खुश आगायदीर कि ना आप्प उन हात्ती होगतीन, यतिकी आप्प नान से धोड्डेव आन. अदिक ना ईग इदुर्द आगोर से पयले नीम से अंद बुटीन, कि याग अद आगेदीत, रा नीव विश्वास माळी. ना ईग नीम सांगुळ अदिक हापाळ मातगोळी माळतीदील, यतिकी ई दुनिया अन सरदार बरतान. नान मा आऊन येनु अधिकार हैलेच; लेकीन ईद इदुरसाटी आगतद कि दुनिया जानसुल कि ना आप्प से प्यार ईटतीन, अदिक ह्यांग आप्प नानी आग्या कोट्टुन ना हांग अच माळतीन. येळी, ईल टु नळी.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.