परमेश्वर उन वचन
इब्रानिगोळ 12
परमेश्वर नाम आप्प
यल ताका नाव गवाहगोळ्द हिंग धोळ्द बादल देल घेरस्कु आयेव, रा बाक बरी, हर ऊंद बादा हाकावाळा वस्तु उक अदिक आ पाप इक जो आसानी देल नामी ऊलझुस बुळतद अदरी भीट बुटेव, अदिक बरी, अद दवळ जो नामी ओळोद आद अदरी धिरज इन सांगुळ ओळेव, अदिक नाम विश्वास इन कर्ता अदिक सिद्ध माळावाळा यीशु उन दी तान कण्णगोळी हचकु ईत्तेव. याव तान मुंद उपस्थित खुशी इन साटी क्रूस इन यातनागोळ झेल्सदुन, अदुर शरम इन येनु चिन्ता माळीदिल अदिक परमेश्वर उन सिंहासन इन ऊमा कय दी विराजमान आगेदुन.
इदुरसाटी आऊन मा ध्यान माळी, याव तान विरोध दा पापीगोळ्द ईट विरोध सहन माळदुन कि नीव निराश आगकु साहस बिट बुळतिदिल. नीव लॉकुरी पाप इन विरोध दा संघर्ष माळतेला ईट सहन माळोद बिदिदील कि नीम रक्ता वाहुसिदाद; येन नीव आ प्रोत्साहन इन शब्दगोळी, यारी परमेश्वर तान चिकोर सम्सकु नीम से अंदुन, येन नीव मारतोगीर? “हे नान पारा, याग परमेश्वर नीनी सुधरूस्यान आग ध्यान हच, अदिक याग आव नीन ताळना माळ्यान रा हताश आगबाळ. यतिकी प्रभु यार से प्यार माळतान, आऊक सुधरूस्तान भी, अदिक यारी पार माळ कोमतान, आऊक दण्ड भी कोळतान.”
नीव दुख इक ताळना सम्सकु सहन माळकोमी; परमेश्वर नीमी पार जान्सकु नीम सांगुळ बर्ताव माळतान. हिंग याता पार हुन जो आप्प उन द्वारा सजा भोगसालुन? अगर अद ताळना यदुर भागी सप्पा आगतार, नीम्द आगीदील रा नीव आऊन चिकोर आल्लच, लेकीन नीव घटिया मंळसा आईर. बाक याग कि नाम शारीरिक आप्प भी नाम ताळना माळतोगोर अदिक नाव आंदुर्द आदर माळदेव, रा येन नाव आत्मिक आप्प उन यक्कुल हात्ती आगकु जीवन ईला बीतुसेव. नाम शारीरिक आप्पगोळ थ्वाळासा समय इन साटी ह्यांग आंदुर वळ्लीद सम्सदुर नामी ताळना माळदुर, लेकीन परमेश्वर नाम भलाई इन साटी ताळना माळतान यदुर देल नाव आऊन पवित्रता अन सहभागी आग सक्केव. वर्तमान दा हर ऊंद प्रकार इन ताळना आनन्द इन ईला, लेकीन अद दुखद हततद; तरी भी जो अदरी सहन माळ-माळकु पक्का आगेग्यार, बाद्दा आंदरी न्यायीपन इन जीवन अदिक शांती इन प्रतिफल हासिल आगतद.
उपदेश अदिक चेतावनी
इदुरसाटी थक्स कयगोळी नेगी अदिक निर्बल ट्वांगरागोळी मजबूत माळी, अदिक तान कालगोळ साटी सीधा हादी माळी कि लंगळा भटकुस बाळुल लेकीन भला चंगा आगेगुल.
सप्पा मुंदुर सांगुळ शांती इन सांगुळ ईरली अदिक पवित्र जीवन जीऊसोर साटी हर प्रकार देल प्रयत्नशील ईरी, यतिकी इदुर बिना यावारा भी प्रभु उक नोळ सकतीदिल. तान तान इन सावधानी माळी, ताकी यावारा परमेश्वर उन अनुग्रह देल हींद होगबाळुल. अदिक यावारा भी केय खांदी घाई वाळुस बाळुल, यतिकी आदुर जहर देल यातोदारा झगळा उत्पन्न आग ईला पाहीजे. यावारा भी अनैतिक अदिक अन्यायी या एसाव उन घाई आगबाळुल याव ऊंद घन इन भोजन इन बदला तान धोळ पार आगोद अधिकार मार बुट्टुन. अदुर बाद्दा नीव जान्सतीर कि याग आव तान आप्प उन से आशीष ताकोमोद चाहासदुन रा अयोग्य आळुकु आदुन, अदिक वर्ल-वर्लकु आव आशीष ताकोमोद कोशिश माळदुन तरी भी आऊक आऊन पाप इन मन तिर्गुसोद मौका सिकिदील.
नीव बेक्की देल होद्द आ सिनाय पहाळी इन हात्ती बंदीदिल, यदरी महसुस माळकु आग सकोद अदिक ना रा अंधार अदिक ना रा उदासीनता अदिक बवंडर इन हात्ती बंदीर ह्यांग इस्त्राएली लॉकुर बंदीदुर. अदिक तुरही इन आवाज, अदिक माताळावाळेर्द ईत्ता शब्द अन हात्ती बंदीदिल, यार केळावाळेर विनती माळदुर कि ईग नाम से मात्त मातगोळ माळकु आगबाळुल. यतिकी आंदुर आ आग्या अक सहन माळ सकिदील: “अगर यातोदारा प्राणी भी पहाळ इक मुट्टीत रा अदुर मा कल्लगोळ भिटकु आगुल.” अदिक अद नजारा हिंग भयानक ईरोद कि मूसा अंदुन, “ना हापाळ अंजक्या देल अदिक नळ्गेतीन.”
लेकीन नीव सिय्योन इन पहाळी, जित्ता परमेश्वर उन नगर, अदिक स्वर्गीय यरूशलेम अदिक हजार स्वर्गदूतगोळ आनन्द पुर्ण सभा दा होट बंदीर. नीव परमेश्वर से पयले पैदा आग्द यार हेसुर स्वर्ग दा लिख्सकु आव आंदुर सभा दा पोहचुसेगीर. नीव आ परमेश्वर उन हात्ती बंदीर जो सप्पा लॉकुर न्याय माळतान कि न्यायी लॉकुर्द आत्मागोळ सिद्ध आगुल. अदिक ऊंद व्हाशोद वाचा अन मध्यस्थ यीशु अदिक छिळकाव इन आ रक्ता अन हात्ती होट बंदीर, जो हाबील उन रक्ता अन अपेक्षा वळ्लीद वस्तुगोळ्द प्रतिग्या माळतान.
सावधान ईरी, अदिक आ अनावाळा से बाय तिर्गुसबाळी, यतिकी आ लॉकुर याग पृथ्वी माकळव चेतावनी कोळावाळा से नकार माळकु ऊळु सकिदील, रा नाव स्वर्ग मा टु चेतावनी कोळावाळा से बाय वाकळा माळकु ह्यांग ऊळु सक्केव? आ समय रा आऊन शब्द पृथ्वी इक आलगाळ्स कोम्त, लेकीन ईग आव ईद प्रतिग्या माळ्यान, “ऊंद घन बाक ना सिर्फ पृथ्वी इक बल्की आकाश इक भी आलगाळ्सकु ईट बुळाईन.” ईव शब्द “ऊंद घन मात्त” आ हर वस्तु दी प्रगट माळतद कि जो मातगोळ निर्मित माळकु आग्याव अव आलगाळ्सकु आदव अदिक अस्थिर ईत्ताव कि जो मातगोळ आलगाळ्सकु आगालव अव स्थिर ईरूल.
इदुरसाटी बाक याग नामी हिंग राज्य सिकेत्याद यदरी आलगाळ्सकु आगाल रा बरी धन्यवादी बनसाती अदिक आदर मिलुस्कु अंज्क इन सांगुळ परमेश्वर उन उपासना माळेव कि परमेश्वर अदुर देल प्रसन्न आगुल; यतिकी नाम परमेश्वर भसम माळावाळा बेक्की हुन.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.