परमेश्वर उन वचन
इब्रानिगोळ 11
विश्वास
विश्वास इन मतलब आद यार्द आशा हचकु ईटतेव आऊन साटी निश्चित आगोद, अदिक यातोदारा वस्तु उक नाव चाहे नोळालेव अदुर अस्तित्व अन बारा दा निश्चित आगोद अच विश्वास हुन. ईदा कारण स्याणा लॉकुर काल इन लॉकुरी आंदुर विश्वास इन द्वारा परमेश्वर उन सहमती हासिल आगित. 1
विश्वास देल अच नाव जान्स कोमतेव कि पुरा दुनिया अन्द रचना परमेश्वर उन शब्द अन द्वारा आग्याद. इदुरसाटी जो माळ्द मातगोळ दृश्य आव, अव दृश्य देल अच बनसीदील.
विश्वास इन द्वारा अच हाबील परमेश्वर उक कैन से वळ्लीद बलिदान येर्सीदुन, अदिक आऊन विश्वास इन द्वारा अच सच्चाई देल नळावाळा मंळसा आगोद सहमती परमेश्वर से हासिल माळदुन; यतिकी परमेश्वर खुद अच आऊन दानगोळी सहमती कोट्टुन. ईदुर मतलब हाबिल विश्वास इन कारण अच ईंद भी माताळतान, याग कि आव सोतोग्यान.
विश्वास देल अच हनोक नेगुकु आदुन कि मृत्यु उक नोळबाळुल, अदिक आऊक याऊ ढुंढ्स सकिदील यतिकी परमेश्वर आऊक म्याकुच नेगु कोंडीदुन, शास्त्र अनतद कि हनोक उन म्याकुच नेगा से पयले आव परमेश्वर उक प्रसन्न माळीदुन. अदिक विश्वास बिना परमेश्वर उक खुश माळोद असंभव आद; यतिकी जो परमेश्वर उन हात्ती बरतान आऊक विश्वास माळ पाहीजे यतिकी परमेश्वर उन अस्तित्व आद अदिक आंदरी प्रतिफल कोळतान जो आऊक ढुंढ्सतार.
विश्वास इन कारण देल अच नूह अक याग परमेश्वर उन द्वारा अव भविष्य अन मातगोळ्द बारा दा चेतावनी कोटकु आगित जो आव नोळीदुन भी ईला, रा आव पवित्र अंज्क पुर्वक तान परिवार इक ऊळसोर साटी ऊंद ड्वांगा अन निर्माण माळीदुन. परिणाम स्वरूप आऊन विश्वास इन द्वारा अच आव दुनिया अक दोषी ठहरूसदुन; अदिक विश्वास इन द्वारा परमेश्वर से बरावाळा न्यायीपन इक हासिल माळदुन.
विश्वास देल अच अब्राहम उक याग परमेश्वर कारदुन रा आग्या मान्सकु ईत्ता जागा दा होटोदुन यदुर्द परमेश्वर प्रतिग्या माळीदुन; अदिक आव ईला जानसोन कि आव यल होगेत्यान, तरी भी तान द्याश बिट बुट्टुन. विश्वास इन कारण अच प्रतिग्या माळ्द धरती मा आव ऊंद अनजाना परदेशी घाई तान मान्ना माळकु निवास माळदुन. आव तम्बूगोळ दा हांगा ईत्तुन ह्यांग इसहाक अदिक याकूब ईतिदुर जो आऊन सांगुळ परमेश्वर उन अदा प्रतिग्या अन उत्तराधिकारी ईरोर. अब्राहम आ नगर इन हादी कायोन, यदरी परमेश्वर आकार कोटकु माळदुन अदिक हमेशा मजबूत ईरावाळा पायवा हाकदुन.
विश्वास इन कारण अच अब्राहम जो हापाळ बाट्ट आगेगिदुन अदिक सारा जो खुद वांझला ईरोर, लेकीन आक परमेश्वर मा विश्वास माळदुर कि आव आकिन प्रतिग्या पुरा माळतान अदिक अब्राहम आप्प बन्सेदुन. ईद कारण अब्राहम देल अच, जो सोत्तुर घाई ईरोन, आकाश ईनव तारागोळ अदिक समुद्र अन धुळा घाई अनगिनत वंशज पैदा आदुर.
विश्वास इक तान मन दा हुडुकु ई सप्पा लॉकुर सोतोदुर; याता वस्तुगोळ्द परमेश्वर प्रतिग्या माळीदुन आंदुर ई वस्तुगोळ हासिल माळीदिल, आंदुर बस अवरी दुर टु ना नोळदुर अदिक अऊर्द स्वागत माळदुर अदिक आंदुर ईद खुला हिसाब देल मान्स कोंडुर कि आंदुर ई धरती मा परदेशी अदिक अनजाना आर. आ लॉकुर जो ईत्ता मातगोळ अनतार, आंदुर ईद तोर्सतार कि आंदुर ऊंद ईत्ता द्याश इन खोज दा आर जो आंदुर्द खुद इन आद. जो द्याश आंदुर बिटार अदुर बारा दा आ लॉकुर विचार माळतेला ईरालुर, अगर विचार माळतेला ईरायदुर रा आंदरी मात्त वापस बरोद मौका ईराइत. लेकीन आंदुर ऊंद वळ्लीद मतलब स्वर्गीय द्याश इन अभिलाषी आर; इदुरसाटी परमेश्वर आंदुर परमेश्वर कहलुसली सरमुसालुन, यतिकी आव आंदुर साटी ऊंद नगर तयार माळ्यान.
विश्वास इन कारण अच अब्राहम, याग परमेश्वर आऊन परीक्षा ताकोमोन, तान पार इसहाक उक बलिदान इन रूप दा भेंट कोट्टुन; अब्राहम आव ईरोन यार से परमेश्वर प्रतिग्या माळीदुन तरी भी आव तान ऊंद ठैसा पार उक बली येरसोर साटी तयार ईरोन. रा इदुरसाटी परमेश्वर आऊन से अंदिदुन, “इसहाक उन द्वारा अच नीन वंश वाळुसित.” अब्राहम विचार माळीदुन परमेश्वर इसहाक उक सोत्तुर दा टु भी जित्ता माळ सकतान, अदिक हांग नोळकु आगुल रा ऊंद प्रकार देल अब्राहम इसहाक उक मृत्यु दा टु मात्त वापस नोळदुन.
विश्वास देल अच इसहाक याकूब अदिक एसाव उक आंदुर भविष्य अन बारा दा आशीष कोट्टुन.
विश्वास देल अच याकूब साया होती यूसुफ उन येढ्ढु पारगोळ दा टु ऊंद ऊंद पार उक आशीष कोट्टुन, अदिक तान कोल इन सहारा ताकोमकु परमेश्वर उन आराधना माळदुन.
विश्वास देल अच यूसुफ, याग आव सायदुर मा ईरोन, रा इस्त्राएलगोळी मिस्त्र टु होटकु होगोद बारा दा माताळीदुन, अदिक तान अस्थीगोळ सांगुळ येन माळ पाहीजे अदुर निर्देश हेळीदुन.
विश्वास देल अच मूसा अन मोय आप्प आऊक पैदा आगदुर बाद्दा मुर तिंगुळ ताका होचकोमकु ईटदुर; यतिकी आंदुर नोळदुर, कि चिग्द सुंदर आद, अदिक आंदुर राजा अन्द आग्या मुरदुर देल अंजीदिल.
विश्वास देल अच मूसा धोड्डेव आगकु फिरौन उन पोर इन पार अंदकु आगली इनकार आदुन. इदुरसाटी कि आऊक पाप दा थ्वाळासा दिन इन सुख भोगस्दुर देल परमेश्वर उन लॉकुर सांगुळ दुख भोगसोद यक्कुल वळ्लीद हत्त. अदिक मसीह अन कारण निन्दीत आगली मिस्त्र अन भंडार देल धोळ्द धन सम्सदुन: यतिकी आऊन कण्ण भविष्य अन प्रतिफल हासिल माळदुर दी हतकु ईरव.
विश्वास देल अच राजा अन सिट्ट देल बिना अंजकु मूसा मिस्त्र अक बिट बुट्टुन, यतिकी मान्सी कि आऊक अदृश्य परमेश्वर कांळसोन. विश्वास देल अच आव फसह अन हाब्बा अदिक कवाळ मा रक्ता छिळकुसोद पालन माळदुन, कि मृत्यु उन दूत इस्त्राएलीगोळ्द पैदा आग्द पयला औलादगोळी कोंद सकबाळुल.
विश्वास देल अच इस्त्राएली लॉकुर क्याचांद समुद्र अन आप्पाटी हिंग ईळदुर, ह्यांग कि वंळगींद जागा मा टु; अदिक याग मिस्त्रीगोळ हांग अच माळोद चाहासदुर, रा सप्पा नीर दा मुळकेदुर.
विश्वास देल अच यरीहो अन दिवार, याग येळ दिन ताका अदुर्द परिक्रमा इस्त्राएलीगोळ माळदुर रा अद बिदोत. विश्वास देल अच राहाब वेश्या आग्या ईला मान्सावाळेर सांगुळ कोन्सुसकु आगीदील; यतिकी आक इस्त्राएली गुप्तचरगोळ संगीपना पुर्ण स्वागत माळीदुर.
ईग ना मात्त येन अनाईन? यतिकी समय ईतीदील, कि गिदोन, बाराक अदिक शिमशोन, यिफताह, दाऊद शमूएल अदिक भविष्यवक्तागोळ्द वर्णन माळाईन. इंदुर विश्वास इन द्वारा अच राज्य जीक्स कोंडुर; जो सही अवा क्याल्सा माळदुर; अदिक परमेश्वर प्रतिग्यागोळ कोट्टुन अवरी हासिल माळदुर, आंदुर हुल्लीगोळव बाय बंद माळ बुट्टुर. बेक्की इन लपटागोळी शांत माळदुर; तलवार इन धार देल उळ्दकु होट्टुर, निर्बलता दा ताकतवर आदुर; लळाई दा वीर होट्टुर; परदेशीगोळ फौजगोळ मा विजय हासिल माळदुर.
विश्वास इन द्वारा आर्तेर तान सोतकु रिश्तेदारगोळी मात्त जित्ता नोळदुर; यास रा सतुसतेला कोन्सुसकु आदुर; अदिक छुटकारा चाहासीदिल; इदुरसाटी आंदुर कि वळ्लीद जीवन इन पुनरूत्थान हासिल माळ सकुल. हापाळ मुंदुर मज्याक हार्सकु आत; अदिक क्वाळागोळ्द सामना माळकु आत याग कि थ्वाळासा मुंदुरी संकलीगोळ देल कटकु बंदीगृह दा हाक्कु आत. आंदुर मा पथराव माळकु आदव, आंदरी आरी देल सिळकु येढ्ढ भाग माळकु आदव, आंदरी तलवार देल मौत इन घाट ईळ्सकु आत. आंदुर गरीब ईरोर आंदरी यातनागोळ कोटकु आदव अदिक आंदुर सांगुळ बुरा व्यवहार माळकु आत. मर्री म्यांडागोळ तोगुल हाक्कु ईत्त आत्त भटकुसतेला ईत्तुर. अदिक मरूस्थल, पहाळीगोळ, गुफागोळ दा अदिक धरती इन फुटगोळ दा वयाळदुर, ई दुनिया आंदुर लायक ईला ईरोद.
विश्वास देल अच आंदुर्द वळ्लीद लेखा जोखा ईटकु आत, तरी भी परमेश्वर उन प्रतिग्या माळ्द मातगोळ आंदरी सकिदील. यतिकी परमेश्वर नाम साटी पयले टु ऊंद वळ्लीद योजना ठहरूसीदुन, आऊन उद्देश ईद ईरोद कि आंदरी भी नाम सांगुळ अच संपुर्ण सिद्ध माळकु आगुल.
Source notes (1)
- Cross-reference यूहन्ना १:३
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.