उत्पत्ति 47

1आग यूसुफ फिरौन उन हाती होगकु ईद समाचार कोट्टुन, “नान आप्प अदिक नानोर वार्टुर, अदिक आंदुर जनावरगोळ अदिक जो येनारा आंदुर्द आद, सप्पा कनान द्याश टु होट्ट बंदाद; अदिक ईग रा आंदुर गोशेन द्याश दा आर.” 2बाक आव तान वार्टुर दा टु अईद मुंदुरी हुडुकु फिरौन उन मुंद नीदरूसदुन. 3फिरौन आऊन वार्टुर से केळदुन, “नीम्द क्याल्सा धंदा येन आद?”

आंदुर फिरौन से अंदुर, “नीन दास चरवाहा आर, अदिक नाम पुर्वज भी चरवाह ईरोर.” 4बाक आंदुर फिरौन से अंदुर, “नाव ई द्याश दा परदेशी घाई ईरली बंदेव; यतिकी कनान द्याश दा भारी अकाल इन कारण नीन दासगोळ मर्र म्यांडागोळ साटी चारा ईतीदील; इदुरसाटी तान दासगोळी गोशेन द्याश दा ईरोद आग्या कोळ.” 5आग फिरौन यूसुफ से अंदुन, “नीन आप्प अदिक नीन वार्टुर नान हाती होट्ट बंदार, 6अदिक मिस्त्र द्याश नीन मुंद बिदकु आद; ई द्याश इन जो सब से वळ्लीद भाग ईतीदाद, अदुर दा तान आप्प अदिक तान वार्टुरी बसुसकोम, मतलब आंदुर गोशेन द्याश दा अच ईरूल; अदिक अगर नी जान्सतीद्या, कि आंदुर दा टु मेहनती मंळसा आर रा आंदरी नान जनावरगोळ अधिकारी माळ कोम.”

7आग यूसुफ तान आप्प याकूब उक वतकु फिरौन उन हाती नीदरूसदुन; अदिक याकूब फिरौन उक आशीर्वाद कोट्टुन. 8आग फिरौन याकूब उक केळदुन, “नी यास वर्ष ईनव आय?”

9याकूब फिरौन से अंदुन, “ना ऊंद सौ तीस वर्ष परदेशी आगकु तान जीवन बितुस कोंडीन; नान जीवन इन दिन थ्वाळासा अदिक दुख देल भी तुमकु ईरव, अदिक नान आप्प दादागोळ परदेशी आगकु यास दिन ताका जीत्ता ईत्तुर आस दिन इनव ना आगली का आईन.” 10अदिक याकूब फिरौन उक आशीर्वाद कोट्टुन अदिक आऊन हाती टु होटोदुन. 11आग यूसुफ तान आप्प अदिक वार्टुरी बसुस बुट्टुन, अदिक फिरौन उन आग्या अन अनुसार मिस्त्र द्याश इन वळ्लीद से वळ्लीद भाग दा, मतलब रामसेस हेसुर इन प्रदेश दा, जागा कोटकु आंदरी सौप्स कोंडुन. 12अदिक यूसुफ तान आप्प उन, अदिक तान वार्टुर्द, अदिक आप्प उन सप्पा घराना अन, ऊंद ऊंद इन बाल बच्चागोळ्द गिनती इन अनुसार, अनाज कोटकु आंदुर्द पालन पोषण माळली कुरतुन.

अकाल अदिक यूसुफ उन प्रबन्ध

13आ सप्‍पा द्याश दा तीनोर साटी येनु ईतीदील; यतिकी अकाल हापाळ भारी ईरोद, अदिक अकाल इन कारण मिस्त्र अदिक कनान द्याश त्रस्त आगेदव. 14अदिक यास पैस्या मिस्त्र अदिक कनान द्याश दा ईरोद, सप्पा अक यूसुफ आ अनाज इन बदला, जो आऊन निवासी कोम तोगोर, जमा माळकु फिरौन उन मान्ना दा पोहचुसदुर. 15याग मिस्त्र अदिक कनान द्याश इन पैस्या खतम आगेत, आग मिस्त्री लॉकुर यूसुफ उन हाती बंदकु अनली कुरतुर, “नामी भोजन वस्तु कोळ; येन नाव पैस्या अन ईला ईत्तुर देल नीन ईत्तुर मा सोतिदेव?”

16यूसुफ अंदुन, “अगर पैस्या हैलेच रा तान जनावरगोळ कोट्ट बुळी, अदिक ना अऊर बदला दा नीमी तिनली कोळाईन.” 17आग आंदुर तान जनावरगोळी यूसुफ उन हाती तंदुर; अदिक यूसुफ आंदरी आंदुरव घ्वाळागोळ, मर्रगोळ, गोसीगोळ, अदिक गधागोळ बदला तीनली कोळली कुरतुन: आ वर्ष दा आव सप्पा जातीगोळ जनावरगोळ बदला भोजन कोटकु अऊर्द पालन पोषण माळतेला ईत्तुन.

18अद वर्ष रा हिंगा होटोत; आग मुंदळोद वर्ष दा आंदुर आऊन हाती बंदकु अंदुर, “नाव तान प्रभु से ईद मात होचकु ईटतीदिल कि नाम्द पैस्या खतम आगेग्याद, अदिक नामव सप्पा प्रकार इन जनावरगोळ नाम प्रभु नव आगेग्याव; इदुरसाटी ईग नाव नाम प्रभु उन मुंद नाम्द शरीर अदिक जागा अक बिटकु अदिक येनु ईतीदील. 19नीन नोळतेला अच नाव सही दा सोतोदेव, लेकीन अगर नी नामी भोजन वस्तु कोळत्या रा नाव फिरौन उक तान जमीन कोट्टेव अदिक आऊन दास आगेदेव, नामी बींजा कोळी यवरी नाव बोऊस सक्केव. आग नाव लॉकुर जीत्ता ईत्तेव अदिक सायतीदिल अदिक जमीन नाम लॉकुर साटी मात्त अनाज उगुसीत.”

20आग यूसुफ मिस्त्र अन सप्पा जमीन इक फिरौन उन साटी कोंड कोंडुन; यतिकी आ भयंकर अकाल इन बिद्दुर देल मिस्त्रीगोळी तान तान केई मारोद बीत्त, ई प्रकार सप्पा जमीन फिरौन उन आगेत; 21अदिक ऊंद छोर टु हुडुकु दुसरा छोर ताका सप्पा मिस्त्र द्याश दा जो प्रजा ईर तोगोद, अदरी आव नगरगोळ दा तनकु बसुस कोंडुन. 22लेकीन याजकगोळ्द जमीन आव कोंडीदिल यतिकी याजकगोळ साटी फिरौन उन दी टु नित्य भोजन इन बंदोबस्त ईरोद, अदिक नित्य जो भोजन फिरौन आंदरी कोळ तोगोन अदरी आंदुर तीन तोगोर, ई कारण आंदरी तान जमीन मारोद बिदीदील. 23आग यूसुफ प्रजा अन लॉकुर से अंदुन, “केळी, ना ईंद इन दिशी नीमी अदिक जमीन इक भी फिरौन उन साटी कोंड कोंडीन; नोळी नीम साटी ईल बींजा आद, ईदरी जमीन दा बोऊसी. 24अदिक जो येनारा उपज आदीत अदुर्द पाचवा अंश फिरौन उक कोळेतीर, बाकी नाक अंश नीमव ईत्तव कि नीव अदरी तान केई दा बोऊसी, अदिक तान तान बाल बच्चा अदिक तान मान्या नोर अन्य लॉकुर सांगुळ तीनुल.”

25आंदुर अंदुर, “नी नामी ऊळ्स बुट्या; नाम प्रभु उन अनुग्रह अन नजर नाम मा बन्सकु ईरूल, अदिक नाव फिरौन उन दास आगकु ईत्तेव.” 26ई प्रकार यूसुफ मिस्त्र अन जमीन इन बारा दा हिंग नियम ठहरूसदुन, जो ईंद ताका नळेत्याद कि अईवा अंश फिरौन उक सीकुल; केवल याजकगोळ्द जमीन फिरौन उन आगीदील.

याकूब उन आखरी इच्छा

27इस्त्राएली मिस्त्र अन गोशेन द्याश दा ईरली कुरतुर; अदिक अल ईद जमीन आंदुर वश दा ईरोद; अदिक आंदुर फुलुसदुर अदिक हापाळ वाळुसदुर. 28मिस्त्र द्याश दा याकूब सत्रह वर्ष जीत्ता ईत्तुन: ई प्रकार याकूब उन उमर ऊंद सौ सैंतालीस वर्ष इन आत. 29याग इस्त्राएल उन सायोद दिन हाती होट्ट बत्त, आग आव तान पार यूसुफ उक कारसुसकु अंदुन, “अगर नीन अनुग्रह नान मा ईतीदाद, रा तान कय नान जांघ मा ईटकु कसम तीन कि नी नान सांगुळ कृपा अदिक सच्चाई इन ईद क्याल्सा माळ्या कि नानी मिस्त्र दा मुण्‍ण कोळतीदील.1”

30याग ना तान आप्प दादागोळ सांगुळ सोतोगाईन, आग नी नानी मिस्त्र टु नेगुकु आंदुर्दा कब्रस्तान दा ईट्या, आग यूसुफ अंदुन, “ना नीन वचन इन अनुसार माळाईन.”

31बाक आव अंदुन, “नान से कसम तीन.” अत: आव आऊन से कसम तीनदुन. आग इस्त्राएल व्हर्स इन ताल्ला अन दी ताल्ला बांग्सकु प्रार्थना माळदुन.