परमेश्वर उन वचन
उत्पत्ति 40
बन्दीगोळ्द कांसा अन्द मतलब हेळोद
ई मातगोळ बाद्दा हिंग आत, कि मिस्त्र अन राजा नोर कुळसावाळा अदिक खाना माळावाळा तान स्वामी अन खिलाप येनारा अपराध माळदुर. आग फिरौन तान आ हाकिमगोळ, मतलब कुळसावाळा अन प्रधान, अदिक खाना माळावाळा अन प्रधान मा क्रोधित आगकु आंदरी कैद माळसुसकु, अंग रक्षकगोळ प्रधान उन मान्या अन अदा बंदीगृह दा, येल यूसुफ बंदी ईरोन, हाकसुस बुट्टुन. आग अंग रक्षकगोळ प्रधान आंदरी यूसुफ उन कय दा सोप्सदुन, अदिक आव आंदुर्द स्यावा टहल माळली कुरतुन; अत: आंदुर येनारा दिन ताका बंदीगृह दा ईत्तुर.
आग ऊंद ईळ्ल्की येढ्ढु मुंदुर अलग अलग कांसा नोळदुर, अदिक हर ऊंद कांसा अन तान अलग अलग मतलब ईरोद. यूसुफ दुसरा दिशी व्हातर्या आंदुर हाती होदुन. अदिक नोळदुन कि येढ्ढु मुंदुर हापाळ परेशान ईरोर. इदुरसाटी आव फिरौन उन आ हाकिमगोळ से, जो आऊन सांगुळ आऊन स्वामी इन मान्ना अन्द जेल दा ईरोर, केळदुन, “ईंद नीम्द बाँय येती उदास आद?”
येढ्ढु मुंदुर उत्तर कोट्टुर, “होत आ ईळ्लकी नाव कांसा नोळदेव,” लेकीन नामी समसाल “कि कांसा अन मतलब येन हुन?” याऊ हिंग मंळसा हैलेच जो कांसागोळ्द व्याख्या माळुल या नामी स्पष्ट हेळुल.
यूसुफ आंदुर से अंदुन, “केवल परमेश्वर अच हिंग आन जो कांसागोळी सम्सतान अदिक अऊर्द व्याख्या माळतान. इदुरसाटी ना निवेदन माळतीन कि तान कांसा नानी हेळी.”
इदुरसाटी अंगुर इन रास्सा कोळावाळा सेनापती यूसुफ उक तान कांसा हेळदुन. आव अंदुन, “ना कांसा दा अंगुर इक बेली नोळदीन. आ अंगुर इन बेली इन मुर खांदीगोळ ईरव. ना आ खांदीगोळ मा फूल बरतेला अदिक अवरी अंगुर हततेला नोळदीन. अदिक फिरौन उन कटोरा नान कय दा ईरोद; अदिक ना आ अंगुरगोळी हुडुकु फिरौन उन कटोरा दा हिंडदीन अदिक कटोरा अक फिरौन उन कय दा कोट्टीन.”
यूसुफ आऊन से अंदुन, “ईदुर्द काय ईद हुन: मुर खांदा अन मतलब मुर दिन हुन इदुरसाटी ईग टु मुर दिन इन बुळ्क नीन ताल्ला ऊँचा माळ्यान, अदिक मात नीन पद मा नीनी नीवळुस्यान, अदिक पयले अन घाई फिरौन उन कुळसावाळा आगकु आऊन कटोरा आऊन कय दा मात कोळतोद्या. अत: याग नीन भला आगेदीत आग नानी याद माळेत, अदिक नान मा दया माळकु फिरौन से नान चर्चा माळेत, अदिक ई जेल टु नानी बीळसुस बुळेत. यतिकी सही दा इब्रानीगोळ्द द्याश टु नानी कदुकु तनकु आग्याद, अदिक ईल भी ना यातोदु हिंग क्याल्सा माळीदिल, यदुर कारण ना ई जेल दा हाक्कु आगाईन.”
रोट्टी माळावाळा नोळदुन कि दुसरा नौकर उन कांसा वळ्लीद ईरोद. इदुरसाटी रोट्टी माळावाळा यूसुफ से अंदुन, “ना भी कांसा नोळीन. ना नोळदीन कि नान ताल्ला मा बिळीद मुर रोट्टीगोळोव फुट्टी आव. सबसे म्याकुच इन फुट्टी दा फिरौन उन साटी सप्पा प्रकार इन कासदव भोजन आव. ईद भोजन राजा अन साटी ईरोद. लेकीन ई भोजन इक पक्षीगोळ तीनव.”
यूसुफ उत्तर कोट्टुन, “ना नीनी हेळाईन कि कांसा अन मतलब येन आद? मुर फुट्टीगोळ्द मतलब मुर दिन हुन. ईग टु मुर दिन इन पयले फिरौन नीन ताल्ला कळसुसकु नीनी ऊंद मार्र मा लटकुस बुट्टान, अदिक पक्षी नीन मास इक तीळ्स तीळ्सकु तींदव.”
अदिक तीसरा दिशी फिरौन उन जनम दिन ईरोद, आव तान सप्पा क्याल्सा माळावाळेर इक भोजन कोट्टुन, अदिक आंदुर दा टु कुळसावाळा प्रधान, अदिक कासावाळा प्रधान येढ्ढु मुंदुरी जेल दा टु तेगसुसदुन. कुळसावाळा सेनापती अक रा कुळसावाळा अन पद मा मात नीवळुसदुन, अदिक आव फिरौन उक कय दा कटोरा कोळली कुरतुन. लेकीन फिरौन रोट्टी माळावाळा अक कोंद बुट्टुन. ह्यांग मातगोळ यूसुफ हेळीदुन हांग अच आत. तरी भी कुळसावाळा प्रधान यूसुफ उक याद माळीदिल; लेकीन आऊन मारतोदुन.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.