परमेश्वर उन वचन
उत्पत्ति 37
यूसुफ अदिक आऊनोर वार्टुर
याकूब रा कनान द्याश दा परदेशी आगकु ईरतोगोन, येल आऊन आप्प परदेशी आगकु ईरोन. अदिक याकूब उन वंश इन वृत्तान्त ईद आद; यूसुफ सतरा वर्ष इन आगकु तान वार्टुर सांगुळ मर्र-म्यांडा आळ्सतोगोन; अदिक आ पार तान आप्प उन हिंग्स बिल्हा, अदिक जिल्पा अन पारगोळ सांगुळ ईरतोगोन; अदिक आदुर्द बुराई इन समाचार तान आप्प उन मुंद पोहचुस तोगोन.
अदिक इस्त्राएल1 तान सप्पा पारगोळ से येक्कुल प्रेम यूसुफ से ईट तोगोन, यतिकी आव आऊन हाळाबाट्ट पनी नव पार ईरोन: अदिक आव आऊन साटी रंग बिरंगी अंगरखा माळसुसदुन. लेकीन याग आऊन वार्टुर नोळदुर, कि नामव आप्प नाम सप्पा वार्टुर से येक्कुल आऊन से प्रेम माळतान, आग आंदुर आऊन से दुश्मनी ईटली कुरतुर अदिक आऊन सांगुळ वळ्लीसा मात ईला हेळतोगोर.
यूसुफ उन कांसा
यूसुफ कांसा नोळदुन, अदिक तान वार्टुर से अदुर्द वर्णन माळदुन; आगी टु आंदुर आऊन से अदिक भी दुश्मनी माळली कुरतुर. आव आंदुर से अंदुन, “जो कांसा ना नोळदीन, अदरी केळी नाव लॉकुर केई दा पेंडी कटीतेव, अदिक येन नोळतीन कि नान पेंडी येदकु सीधा नीदरेत; आग नीम पेंडी नान पेंडी इक नाकु दी टु घेर्स कोंडव अदिक अदरी नमस्कार माळली कुरतव.”
आग आऊन वार्टुर आऊन से अंदुर, “येन नी सही दा नाम मा राज्य माळ्या? या येन नी सही दा नाम मा प्रभुता माळ्या?” इदुरसाटी आंदुर आऊन कांसा अदिक आऊन मात इन कारण आऊन से अदिक भी येक्कुल दुश्मनी माळली कुरतुर.
बाक आव अदिक ऊंद कांसा नोळदुन, अदिक तान वार्टुर हाती अदुर्द भी वर्णन माळदुन, “केळी, ना अदिक ऊंद कांसा नोळदिन, कि सुर्य अदिक चन्द्रमा, अदिक हनुन तारागोळ नानी नमस्कार माळीत्याव.”
ईद कांसा अन आव तान आप्प अदिक तान वार्टुर से वर्णन माळदुन; आग आऊन आप्प आऊक दनकुसकु अंदुन, “ईद ह्यांग कांसा आद जो नी नोळ्द? येन सही दा ना अदिक नीन मोय अदिक नीन वार्टुर सप्पा मुंदुर होगकु नीन मुंद धरती मा बिदकु नमस्कार माळेव?” आऊन वार्टगोळ रा आऊन से सिट्ट माळतोगोर; लेकीन आऊन आप्प आऊन आ मातगोळ इक याद ईटदुन.2
युसुफ उक मारोद अदिक आऊक मिस्त्र ओयोद
यूसुफ उन वार्टुर तान आप्प उन मर्र-म्यांडागोळी आळसोर साटी शकेम उक होदुर. आग इस्त्राएल यूसुफ से अंदुन, “नीन वार्टुर रा शकेम दा का मर्र म्यांडा आळ्सतीदार, इदुरसाटी होग, ना नीनी आंदुर हाती कळुतीन.”
आव आऊन से अंदुन, “ठीक आद ना तैयार आईन.”
इस्त्राएल आऊन से अंदुन, “होग, तान वार्टगोळ अदिक मर्र म्यांडागोळ्द हाल नोळकु बा कि आंदुर ठीक रा आर, बाक नान हाती समाचार तर.” अत: आव आऊक हेब्रोन इन तराई दा सार माळ कोंडुन.
अदिक आव शकेम दा बंदुन. याग यूसुफ ऊंद मैदान दा ईत्त आत्त नोळोन, आग ऊंद मंळसा आऊक सिकदुन, आव आऊन से केळदुन, “येन ढुंढसीत्या नी?”
आव अंदुन “ना रा तान वार्टुरी नोळीतीन कृपा माळकु नानी हेळ कि आंदुर मर्र म्यांडा येल आळसीत्यार?”
आ मंळसा अंदुन, “आंदुर रा ईल टु होटोग्यार; अदिक आंदरी ना अनतेला केळदीन, बरी, ‘नाव दोतान इक होगाता.’” इदुरसाटी यूसुफ तान वार्टुर हिंद होदुन, अदिक आंदरी दोतान नगर दा नोळदुन.
याग आंदुर आऊक दुर टु बरतेला नोळदुर, रा आऊन हाती बरोर से पयले अच आऊक कोंद बुळोद योजना माळदुर. अदिक आंदुर आपस दा अनली कुरतुर, “नोळी, आव कांसा नोळावाळा बरेत्यान. नळी, नाव आऊक कोंदकु ईल यातोदारा गड्डा दा भीट बुळाता, अदिक नाव अन बुळाता, कि आऊक यातोदारा आळी दाकळोद जनावर तीन बुळ्त बाक नाव नोळाता कि आऊन कांसा अन येन आगतद.”
लेकीन रूबेन यूसुफ उक ऊळसोद चाहासोन. इदुरसाटी रूबेन अंदुन “नाव यूसुफ उक जान ठाय कोनालेव; बल्की नाव आऊक यातोदारा गड्डा दा हाक्क बुळाता,” रूबेन हिंग इदुरसाटी माळदुन कि आव यूसुफ उक उळ्सकु तान आप्प उक कोट्ट बुळुल. ह्यांग यूसुफ तान वार्टुर हाती बंदुन, आंदुर यूसुफ उन रंग बिरंगा कपळा, जो आव हाक्कु ईरोन ईळ्सदुर, अदिक यूसुफ उक ऊंद वळ्गींद गड्डा दा हाक्क बुट्टुर, यदुर दा नीर ईला ईरोद.
ईद माळकु आंदुर ऊमली कुरतुर. आग आंदुर नोळदुर कि इश्माएलीगोळ्द ऊंद दल ऊँटगोळ मा सुगन्ध द्रव्य, बलसान, अदिक गन्धरस मंण्सकु, गिलाद टु मिस्त्र अक होगेत्याद. आग यहूदा तान वार्टुर से अंदुन, “तान वार्ट उक कोण्णोद अदिक आऊन खुन होचकोमसुसकु येन लाभ आदीत? नाव ईऊक ई इश्माएलीगोळी मार्र कोमाता, नाव ईऊक कोनालेव, यतिकी आव नामव वार्ट हुन, नाम तान रक्ता हुन.” वार्टुरी ईद मात वळ्लीद हत्त. आटा वती येनारा मिद्यानी व्यापारी भी अल टु होट्टुर, आग आंदुर आंदुर्द मदत देल यूसुफ उक गड्डा दा टु व्हार्या तेगदुर अदिक आऊक इश्माएलीगोळी ईप्पत बेळ्ली इन सिक्कागोळ दा मार्र कोंडुर; अदिक आंदुर यूसुफ उक मिस्त्र द्याश दा ओतुर.
रूबेन गड्डा दा वापस बंदकु येन नोळदुन कि यूसुफ गड्डा दा हैलेच; इदुरसाटी आव तान कपळा हरदुन, अदिक तान वार्टुर हाती बंदकु अनली कुरतुन, “पार रा हैलेच; ईग ना यात होगाईन?”
आग आंदुर यूसुफ उन कपळा हुळदुर, अदिक ऊंद व्हात इक कोंदकु अदुर रक्ता दा अदरी मुळकुसदुर. अदिक आंदुर आ रंग बिरंगा अंगरखा अक तान आप्प उन हाती कळुकु ईद संदेश कळुदुर; “ईद नामी सिक्याद, अत: नोळकु अरूकोम कि ईद नीन पार उन अंगरखा हुन का आलच.”
आव अदरी अरू कोंडुन, अदिक अंदुन, “हव ईद नान पार उन कपळा हुन; यातोदारा दुष्ट जनावर आऊक तीन बुळ्त; बिना संदेह यूसुफ तुकळा तुकळा माळकु आग्यान.” आग याकूब तान कपळा हरदुन अदिक नेळु मा टाट गुंळ्सदुन, अदिक तान पार उन साटी हापाळ दिन ताका वर्लतेला ईत्तुन. अदिक आऊन सप्पा पोर पारगोळ आऊक शांती कोळोद कोशिश माळदुर; लेकीन आऊक शांती सिकीदील; अदिक आव ईदा माळतेला ईत्तुन, “ना वर्लतेला तान पार उन हाती अधोलोक दा ईळदोगाईन.” ई प्रकार आऊन आप्प आऊन साटी वर्लतेला अच ईत्तुन.
ई बीच मिद्यानीगोळ यूसुफ उक मिस्त्र दा ओतकु पोतीपर हेसुर इन फिरौन उन ऊंद हाकिम अदिक अंगरक्षकगोळ प्रधान, उन कय दा मार्र बुट्टुर.
Source notes (2)
- Footnote याकूब
- Cross-reference प्रेरितगोळ 7:9
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.