परमेश्वर उन वचन
उत्पत्ति 27
इसहाक उन याकूब उक आशीर्वाद कोळोद
याग इसहाक बाट्ट आगेदुन, अदिक आऊन कण्णगोळ हिंग कमजोर आगेदव कि आव नोळ ईला सकोन, आग आव तान धोड्डेव पार एसाव उक कारदुन अदिक अंदुन, “हे नान पारा.”
आव अंदुन, “येन आग्या आद नान आप्पा?”
इसहाक अंदुन, “ना रा हाळाबाट्ट आगेगीन अदिक जानसालीन कि याग सायाईन. इदुरसाटी ईग नी तान तरकस अदिक धनुष हुडु अदिक आळी दा होग अदिक नान साटी यातोदारा आळी दाकळोद जनावर शिकार माळकु तर. अदिक नान पसंद इन अनुसार सवाद भोजन माळकु नान हाती तनकु कोळेत, कि अदरी तीनकु सायोर से पयले नीनी जी तुमकु आशीर्वाद कोळाईन.”
याग इसहाक तान पार एसाव से मातगोळ हेळोन, आग रिबका आंदुर मातगोळ केळोर. याग एसाव आळी दा शिकार माळोर साटी होटोदुन, आग रिबका तान पार याकूब से अंदुर, “नोळ, ना नीन आप्प उक नीन वार्ट एसाव से ईद अनतेला केळीन, ‘शिकार माळकु नान साटी सवाद भोजन माळकु तर कि ना अदरी तीनाईन अदिक तान सायोर से पयले यहोवा अन मुंद आशीष कोळाईन.’ इदुरसाटी ईग, हे नान पारा, नांद केळ, अदिक ईद आग्या मान्स, कि मर्रगोळ हाती होगकु मर्रगोळोव येढ्ढ वळ्लेव वळ्लेव पाड्डा तर; अदिक ना नीन आप्प उन साटी आऊन पसंद इन अनुसार सवाद भोजन माळकु कोळाईन. आग नी अदरी तान आप्प उन हाती ओयत, कि आव अदरी तीनकु सायोर से पयले नीनी आशीर्वाद कोळुल.”
याकूब तान मोय रिबका से अंदुन, “केळ, नान वार्ट एसाव उन मय मा पुरा चुट्टी आव लेकीन नान मय मा हैलेच. अगर नान आप्प नानी अजमुस्यान रा, ना तान आप्प उन नजर दा ख्वाटा बीळाईन; अदिक आशीष इन बदला दा श्राप अच कमुसाईन.”
आऊन मोय आऊन से अंदुर, “हे नान पारा, श्राप नीन मा ईला नान मा बिळुल, नी सिर्फ नांद केळ, अदिक होगकु अव पाड्डागोळ नान हाती तर.” आग याकूब होगकु आ पाड्डागोळी तान मोय इन हाती तंदुन, अदिक मोय आऊन पसंद इन अनुसार सवाद भोजन माळकु कोट्टुर. आग रिबका तान पयला पार एसाव उन सुंदर कपळा, जो आकिन मान्या ईरव, तान स्याण पार याकूब उक हाकसुस बुट्टुर. आक मर्र इन पाड्डा अन तोगुल देल आऊन कयगोळ्द हिस्सा अदिक कुतक्या अक भी ढाक्स कोंडुर. आग आक तान कास्द सवाद मांस इक अदिक रोट्टीगोळी हुडुकु याकूब उक कोट्टुर.
तान आप्प उन हाती होगकु याकूब अंदुन, “आप्पा.”
इसहाक उत्तर कोट्टुन, “येन पारा, याव हुय नी?”
याकूब तान आप्प उक उत्तर कोट्टुन, “ना नीन धोड्डेव पार एसाव हुईन. ना अद सप्पा माळदीन, ह्यांग नी अंदीद. कृपया कुर अदिक नांद शिकार माळ्द भोजन माळ अदिक नानी तान आशीष कोळ.”
इसहाक तान पार से अंदुन, “हे नान पारा, येन कारण आद कि शिकार नीनी ईट जल्दी सीकेत?”
आव उत्तर कोट्टुन, “नीन परमेश्वर यहोवा अदरी नान मुंद माळ बुट्टुन.”
बाक इसहाक याकूब से अंदुन, “हे नान पारा, हाती बर, ना नीनी ताळुकु नोळतीन, कि नी सही दा नान पार एसाव हुय या ईला.” आग याकूब तान आप्प इसहाक उन हाती होदुन, अदिक आव आऊक ताळुकु अंदुन, “आवाज रा याकूब घाई आद लेकीन कय एसाव उन घाई आव.” इसहाक आऊक अरतीदिल, यतिकी आऊन कय मा हांगा चुट्टी ईरव ह्यांग एसाव उन ईरव. इदुरसाटी इसहाक याकूब उक आशीष कोट्टुन. इसहाक केळदुन, “येन नी सहीदा नान पार एसाव हुय?”
याकूब उत्तर कोट्टुन, “हव.”
आग इसहाक अंदुन, “हे नान पारा, तान शिकार देल बेईस्द येनारा भोजन नान साटी तीनली तर, ताकी ना नीनी तान आशीष कोळाईन.” आग आव अदरी आऊन हात्ती तंदुन, अदिक आव तिंदुन; अदिक आव आऊन हात्ती अंगुर इन रास्सा भी तंदुन, अदिक आव कुळदुन. आग आऊन आप्प इसहाक आऊन से अंदुन, “हे नान पारा, ईल बर अदिक नानी चुम्स.” इदुरसाटी याकूब आऊन हाती होदुन अदिक आऊक चुम्सदुन, याग इसहाक उक आऊन कपळा दा टु एसाव उन सुंगध बत्त, इदुरसाटी आव आऊक आशीष कोळतेला अंदुन, “नान पार उन खुशबू परमेश्वर यहोवा अन आशीष देल मैदान दा फैलुसीग्याद. परमेश्वर नीनी आकाश टु ओद, अदिक जमीन इन वळ्लीद से वळ्लीद फसल, अदिक हापाळ सा अनाज अदिक व्हाशोद अंगुर इन रास्सा कोळुल; सप्पा राज्य अन लॉकुर नींद स्यावा माळुल, जाती जाती इन लॉकुर नींद मुंद झुकसुल, नी तान वार्टुर्द स्वामी आगुल, अदिक नीन मोय इन चिकोर नीनी नमस्कार माळुल. जो नीनी श्राप कोळतान आव खुद अच श्रापीत आगुल, अदिक जो नीनी आशीर्वाद कोट्टान आऊक आशीष सिकुल.”1
आशीर्वाद इन साटी एसाव उन निवेदन
याग इसहाक याकूब उक आशीष कोट्ट बुट्टुन आग आऊन वार्ट एसाव शिकार माळकु मान्या बंदुन. आव जल्दी सवाद भोजन तैयार माळदुन अदिक तान आप्प से अंदुन “आप्पा, येळ अदिक सवाद भोजन तीनकु नानी आशीष कोळ.”
आऊन आप्प इसहाक आऊन से केळदुन, “याव हुय नी?”
आव अंदुन, “ना नीन धोड्डेव पार एसाव हुईन.”
ईद केळकु इसहाक नळ्गतेला अंदुन, “रा आव याव ईरोन, जो नान साटी भोजन तंदीदुन? अदिक ना आऊक आशीष भी कोट्टीन, ईग आव आशीषित अच ईत्तान!”
तान आप्प उन ईद मात केळकु एसाव हापाळ वर्लली कुरतुन अदिक आव तान आप्प से अंदुन, “हे नान आप्पा, नानी भी आशीष कोळ!”
इसहाक अंदुन, “नीन वार्ट ध्वाका कोट्टुन अदिक आशीष ताकोम कोंडुन.”
एसाव अंदुन, “अदुर साटी याकूब हेसुर सही हैलेच, येढ्ढ घन आव नान सांगुळ गलत माळदुन: पयले आव नान धोड्डेव आगोद अधिकार ताकोम कोंडुन अदिक ईग नान आशीष भी कदू कोंडुन!” आग एसाव तान आप्प से केळदुन, “येन नी नान साटी ऊंद भी आशीष मीक्सकु ईटीदिल?”
इसहाक एसाव से अंदुन, “ना रा आऊक नीन स्वामी माळ कोंडीन. अदिक सप्पा संबंधीगोळी आऊन सेवक माळकु आऊक सौप्स कोंडीन अदिक आऊक अनाज अदिक व्हाशेव अंगुर इन रास्सा देल तुमकु ईरोद आशीष कोट्टीन, ईग नान पारा, नीन साटी ना येन माळाईन?”
एसाव तान आप्प से केळदुन, “हे नान आप्पा, येन नीन हाती नान साटी ऊंद भी आशीष हैलेच? अदिक वर्लतेला अनली कुरतुन कि हे नान आप्पा नानी भी आशीष कोळ!”2
आग इसहाक अंदुन,
“नीन मान्ना वळ्लीद ऊपज वाळा जागा टु दूर ईरूल
अदिक अदुर मा आकाश टु ओद बिळबाळुल.
नी तान तलवार इन ताकत देल जीत्ता ईत्या.
नी तान वार्टुन स्यावा माळ्या;
लेकीन हा, लेकीन नी आजादी इन साटी लळुस्या,
अदिक नी तान म्याकुच बीत्त आऊन प्रतिबन्ध इक मुरूकु भीट्या.”3
एसाव तान वार्ट याकूब से तान आप्प उन कोळ्द आशीष इन कारण सिट्ट माळली कुरतुन अदिक मन दा हिंग सोचली हतदुन कि “आप्प उन सोत्तुर बाद्दा आऊन हत्या माळ कोमाईन.”
याग रिबका अक तान धोड्डेव पार उन सिट्ट कांळ्सली कुर्त आग याकूब उक कारसुसकु आऊन से अंदुर, “नीन वार्ट एसाव उन मन दा नीन साटी हापाळ सिट्ट आद. केळ, नीन वार्ट एसाव नीनी कोन्नोद विचार माळेत्यान. इदुरसाटी नी ईल टु ओळकु नान वार्ट लाबान उन मान्या हारान नगर होटोग. अल होगकु येनारा समय ईर, यागास ताका नीन वार्ट उन सिट्ट खतम आगेगाल. यागास ताका नीन वार्ट उन सिट्ट खतम आदीत, अदिक आव मारतोदान कि नी आऊन सांगुळ येन माळ्द, आग ना नीनी अल टु कारू कोमाईन.” हिंग येती आगुल कि उंद अच दिन दा नान इक येढ्ढु पारगोळ से वंचित आगोद बिळुल.
याकूब उन लाबान उन हात्ती होगोद
ऊंद दिशी रिबका इसहाक से केळदुर, “हित्ती इन ई पोरगोळ नान जीवन दुखी माळ बुट्टार. अगर याकूब भी हेथ इन पोरगोळ दा टु यारीकारा, तान हिंग्स माळ कोंडान रा नान साटी जीऊसोद अदिक भी मुश्किल आगेदीत?” इदुरसाटी याकूब उक आऊन मामा लाबान उन मान्या कळु कोम.
Source notes (3)
- Cross-reference उत्पत्ति 12:3
- Cross-reference इब्रानिगोळ 12:17
- Cross-reference उत्पत्ति 36:8; २ राजा 8:20
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.