उत्पत्ति 22

अब्राहम उन परीक्षा दा बिळोद वर्णन

1थ्‍वाळासा समय इन बाद्‍दा, परमेश्वर अब्राहम उन परीक्षा ताकोंडुन, परमेश्वर आऊन से अंदुन, “हे अब्राहम!” अब्राहम उत्‍तर कोट्‍टुन, “हे प्रभु! येन आग्या आद, ना ईल आईन.”1

2परमेश्वर अंदुन, “तान पार उक मतलब तान धोळ पार इसहाक उक, यार से नी प्रेम ईटत्या, सांगुळ हुडुकु मोरिय्‍याह द्‍याश दा होटोग, अदिक अल आऊक ऊंद पहाळी इन म्‍याकुच जो ना नीनी हेळाईन होमबली माळकु येर्स.”2

3दुसरा दिशी अब्राहम व्हातर्‍या जल्‍दी येदकु तान गधा मा हुल्ली कसुसकु तान येढ्‍ढ सेवकगोळ, अदिक तान पार इसहाक उक सांगुळ हुळदुन, अदिक होमबली साटी हुळ्ली सीळदुन; आग होटकु आ जागा अन दी होदुन, यदुर चर्चा परमेश्वर आऊन से माळीदुन. 4तीसरा दिशी अब्राहम कण्‍ण नेगुकु आ जागा अक दूर टु नोळदुन. 5अदिक अब्राहम तान सेवकगोळ से अंदुन, “गधा अन हाती ईल्या थाम्‍सकु ईरी; ईव पार अदिक ना अल ताका होगकु, अदिक नमस्‍कार माळकु, बाक नीम हाती वापस बंदेव.”

6अब्राहम होमबली इन साटी तैयार माळदव हुळ्‍लीगोळ इसहाक उन कय दा हुळसुस बुट्‍टुन अदिक खुद बेक्‍की अदिक कत्ती हुळदुन, अदिक येढ्‍ढु मुंदुर सांगुळ नळु कुरतुर. 7इसहाक तान आप्‍प अब्राहम से अंदुन, “हे नान आप्‍प?”

आव अंदुन, “हे नान पारा, येन मात आद?”

आव अंदुन, “नोळ, बेक्‍की अदिक हुळ्ली रा आव; लेकीन होमबली साटी म्यांडा अन्द पाड्डा येल आद?”

8अब्राहम अंदुन, “हे नान पारा, परमेश्वर होमबली इन म्यांडा अन उपाय खुद अच माळ्‍यान.” अदिक आंदुर येढ्‍ढु मुंदुर सांगुळ सांगुळ मुंद नळुतेला होदुर.

9याग आंदुर जागा मा पोहचुसदुर, यदरी परमेश्वर आऊक हेळीदुन, आग अब्राहम अल वेदी माळकु हुळ्‍लीगोळ इक नीवळुस नीवळुसकु ईटदुन, अदिक तान पार इसहाक उक कटकु वेदी मा ईटदव हुळ्‍लीगोळ म्‍याकुच ईट बुट्‍टुन. 10बाक अब्राहम कय वाळुसकु कत्ती अक हुळदुन कि तान पार उक बली माळुल. 11आग यहोवा अन दूत स्‍वर्ग टु कारूकु अंदुन, “हे अब्राहम, हे अब्राहम!”

अब्राहम अंदुन, “नोळ, ना ईल आईन.”

12यहोवा अंदुन, “आ पार उन मा कय नेगुबाळ, अदिक आऊक येनु माळबाळ; ईग नानी मालुम आगेग्‍याद कि नी परमेश्वर उन भय मान्‍सत्‍या, यतिकी नी नान साटी तान ऊंदलौता पार उक भी बलिदान माळोर साटी तैयार आगेग्‍या.”

13आग अब्राहम कण्‍ण नेगदुन, अदिक येन नोळदुन, कि आऊन हिंद ऊंद म्यांडा तान सींगगोळ से ऊंद झाळी दा फसुसकु आद; अत: अब्राहम होगकु आ म्यांडा अक हुळदुन, अदिक तान पार उन जागा मा होमबली माळकु येर्सदुन. 14अब्राहम आ जागा अन हेसुर यहोवा यिरे ईटदुन, मतलब यहोवा उपाय माळावाळा, इदुरसाटी ईंद भी ईद अनकु आगतद, “यहोवा अन पहाळी मा उपाय माळकु आदीत.”

15बाक दुसरा घन यहोवा अन दूत स्‍वर्ग टु अब्राहम उक कारूकु अंदुन, 16यहोवा अन ईद वाणी आद, “कि ना तांद अच कसम तिनतीन कि नी जो क्‍याल्‍सा माळ्‍या तान पार, बल्‍की तान ऊंदलौता पार उक भी, बिटीदिल;3 17ईद कारण ना सहीदा नीनी आशीष कोळाईन; अदिक सहीदा नीन वंश इक तारागण, अदिक समुद्र तट इन रेत इन कनगोळ घाई अनगिनत माळाईन, अदिक नीन वंश तान दुश्‍मनगोळ नगर इन अधिकारी आदार;4 18अदिक पृथ्‍वी इन सप्‍पा जातीगोळ नीन वंश इन द्वारा नान से आशीर्वाद प्राप्त माळ्‍यार: यतिकी नी नांद आग्या मान्सकु अदुर पालन माळ्द.”5 19आग अब्राहम तान सेवक उन हाती वापस बंदुन, अदिक आंदुर सप्‍पा बेर्शेबा अक सांगुळ सांगुळ होदुर; अदिक अब्राहम बेर्शेबा दा ईरली कुरतुन.

नाहोर उन वंशज

20ई मातगोळ बाद्‍दा हिंग आत कि अब्राहम उक ईद समाचार सीक्‍त, “मिल्‍का भी मोय बनसेदुर; आक नीन वार्ट नाहोर उन साटी पार उक जनम कोटार. 21धोळ पार ऊस, आऊन वार्ट बुज, कमूएल आराम उन आप्‍प, 22बाक केसेद, हाजो, पिलदाश, यिदलाफ अदिक बतूएल.” 23बतूएल रिबका अन आप्‍प आदुन. अब्राहम उन वार्ट नाहोर टु मिल्‍का देल ईंदुर येळ पार पैदा आदुर. 24नाहोर उन रखैल रियूमाह अन भी ईंदुर पार आदुर: तेबाह, गाहम, ताहाश अदिक माकाह.