परमेश्वर उन वचन
उत्पत्ति 20
अब्राहम अदिक अबीमेलेक
बाक अब्राहम अल टु होटकु कनान इन दक्षिण द्याश दा बंदकु कादेश अदिक शूर इन बीच दा थाम्सदुन, अदिक गरार दा ईरली कुरतुन. अदिक अब्राहम तान हिंग्स सारा अन बारा दा अनली कुरतुन, “आक नान आकतींग हुळ,” इदुरसाटी गरार इन राजा अबीमेलेक दूत कळुकु सारा अक कार्सदुन. ईळ्ल्क इक परमेश्वर कान्सा दा अबीमेलेक इन हाती बंदकु अंदुन, “केळ याता आर्त इक नी ईट्या, आकिन कारण नी सोतोद्या, यतिकी आक मदावळ्त आर.”
लेकीन अबीमेलेक आकिन हाती होगली का ईरोन; इदुरसाटी आव अंदुन, “हे प्रभु, येन नी निर्दोष जाती अन भी घात माळ्या? येन आव खुद अच नान से अंदिदील, ‘आक नान आकतींग हुळ?’ अदिक आ आर्त भी अंदुर कि, ‘आव नान वार्ट हुन,’ ना रा तान मन इन खराई अदिक तान व्यवहार इन सच्चाई देल ईद क्याल्सा माळीन.”
परमेश्वर आऊन से कान्सा दा अंदुन, “हा, ना भी जान्सतीन कि तान मन इन खराई देल नी ईद क्याल्सा माळ्या अदिक ना नीनी रोक्सकु भी ईटीन कि नी नान विरूद्ध पाप माळबाळेत; ईदा कारण ना नीनी आकी मुट गोटीदील. इदुरसाटी ईग आ मंळसा अन हिंग्स उक आऊक वापस माळ कोम; यतिकी आव नबी हुन, अदिक नीन साटी प्रार्थना माळ्यान, अदिक नी जीवन जीऊसतेला ईत्या लेकीन अगर नी आऊक वापस माळतीदील रा ध्यान ईटेत, कि नी, अदिक नीनोर यास भी लॉकुर आर, सप्पा सही दा सोतोदार.”
व्हातर्या अबीमेलेक झट से यदकु तान सप्पा क्याल्सा माळावाळेर इक कारूकु आंदरी ईव सप्पा मातगोळी हेळदुन; अदिक आ लॉकुर हापाळ अंजेदुर. आग अबीमेलेक अब्राहम उक कारसुसकु अंदुन, “नी नाम से ईद येन माळ्द? अदिक ना नींद येन बीगळुसीदिन कि नी नान मा अदिक नांद राज्य अन म्याकुच हिंग धोळ्द पाप हाक्क कोंड्या? नी नान सांगुळ अद क्याल्सा माळ्या जो सही ईला ईरोद.” बाक अबीमेलेक अब्राहम से केळदुन, “नी येन सम्सकु ईत्ता क्याल्सा माळ्द?”
अब्राहम अंदुन, “ना ईद सोचीदिन कि ई जागा दा परमेश्वर उन येनु अंज्क ईला ईतीदाद; इदुरसाटी ई लॉकुर नान हिंग्स उन कारण नानी कोंद बुट्टार.” लेकीन आक सही दा नान आकतींग हुळ, आक नान आप्प उन पोर हुळ लेकीन नान मोय इन पोर आलच; बाक आक नान हिंग्स आगेदुर. बाक हिंग आत कि याग परमेश्वर नानी तान आप्प उन मान्ना बिटकु होळोद आग्या कोट्टुन, आग ना आऊन से अंदीन, “ईट कृपा नीनी नान मा माळोद बीद्दीत कि नाव येढ्ढु मुंदुर येल-येल भी होदेव अल-अल नी नान बारा दा अनेत ईव नान वार्ट हुन.”
आग अबीमेलेक मर्र-म्यांडा, गोसी-वस्ता, अदिक दास-दासीगोळ हुडुकु अब्राहम उक कोट्टुन, अदिक आऊन हिंग्स सारा अक भी आऊक वापस माळ कोंडुन. अदिक अबीमेलेक अंदुन, “नोळ, नांद द्याश नीन मुंद आद; येल नीनी हततद अल ईर.” अदिक सारा से अबीमेलेक अंदुन, “नोळ, नीन वार्टुर इक ऊंद हजार बेळ्ली नव सिक्कागोळ कोट्टीन. आ सप्पा लॉकुर्द नजर दा नी निर्दोष आय आ सप्पा लॉकुर इक पता नळदीत कि नी यातोदु गलत क्याल्सा माळीदिल.”
आग अब्राहम परमेश्वर से प्रार्थना माळदुन, अदिक यहोवा अबीमेलेक, अदिक आऊन हिंग्स, अदिक दासीगोळी चंगा माळदुन अदिक आंदुर चिकोर हाळुली कुरतुर. यतिकी यहोवा अब्राहम उन हिंग्स सारा अन कारण अबीमेलेक उन सप्पा आर्तगोळ्द कोखगोळी पुरा रीति देल बंद माळकु ईटीदुन.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.