परमेश्वर उन वचन
उत्पत्ति 15
अब्राहम उन सांगुळ यहोवा अन वादा कटोद वर्णन
ई मातगोळ बाद्दा यहोवा अन ईद वचन दर्शन दा अब्राहम उन हात्ती पोहचुस्त: “हे अब्राहम, अंजबाळ; नीन ढाल अदिक नीन हापाळ धोळ्द प्रतिफल ना हुईन.” अब्राहम अंदुन, “हे प्रभु यहोवा, ना रा बीना चिकोर इन आईन, अदिक नान मान्ना अन वारीस ईव दमिश्कवासी एलीएजेर आदान, अत: नी नानी येन कोट्या?” अदिक अब्राहम अंदुन, “नानी रा नी वंश कोटीदील, अदिक येन नोळतीन कि नान मान्या पैदा आग्यान ऊंद जन नान वारीस आदान.”
आग यहोवा अन वचन आऊन हात्ती पोहचुस्त, “ईव नीन वारीस आगतीदील, नीन जो खुद इनव पार आदान, आवा नीन वारीस आदान.” अदिक आव आऊक व्हार्या वोतकु अंदुन, “आकाश इन दी नोळकु तारागोळी आळु, येन नी अवरी आळु सकत्या? बाक आव आऊन से अंदुन, नीन वंश हिंग अच आदीत.”
आव यहोवा मा विश्वास माळदुन; अदिक यहोवा ई मात इक आऊन लेख दा धर्म आळदुन.
आग आव आऊन से अंदुन, “ना आवा यहोवा हुईन जो नीनी कसदी अन ऊर नगर टु व्हार्या तंदुन, कि नीनी ई द्याश इन अधिकार कोळाईन.”
अब्राहम अंदुन, “हे प्रभु यहोवा, ना ह्यांग जानसाईन कि ना ईदुर्द अधिकारी आगाईन?”
यहोवा आऊन से अंदुन, “नान साटी मुर वर्ष इन ऊंद कलोर, अदिक मुर वर्ष इन ऊंद मर्र, अदिक मुर वर्ष इन ऊंद म्यांडा, अदिक ऊंद फंडकुल अदिक कबूतर इन ऊंद पाड्डा हुडु.” ई सप्पा जनावर हुडुकु आव अऊर बीच दा टु तुकळा माळदुन, अदिक तुकळागोळी आमने सामने ईटदुन; लेकीन पक्षीगोळोव आव तुकळा माळीदिल. याग मासाहारी पक्षी लाशगोळ मा झपटुसदव, आग अब्राहम अवरी तुळकाळ्स बुट्टुन.
याग सुर्य अन मुळकोद समय आत, आग अब्राहम उक भारी जप बत्त; अदिक नोळी, हापाळ अंज्क अदिक महा अंधकार आऊक घेर्सकोम्त. आग यहोवा अब्राहम से अंदुन, “ईद सही दा जान्स कि नीन वंश पराया द्याश दा परदेशी आगकु ईत्तार, अदिक आ द्याश इन लॉकुरोर दास आगेदार; अदिक आंदुर आंदरी नाक सौ वर्ष ताका दु:ख कोट्टार. बाक याता द्याश इन आंदुर दास आदार आऊक ना दण्ड कोळाईन: अदिक अदुर बाद्दा आंदुर धोळ्द धन अल टु हुडुकु बंदार. नी रा तान पुर्वजगोळ सांगुळ मीलुसेद्या; नीनी पुरा बुढ़ापा दा मुण्ण कोटकु आदीत. लेकीन आंदुर नाकवा पीढ़ी दा ईल मात बंदार : यतिकी ईगासताका एमोरी इन अधर्म पुरा आगली आद.”
अदिक हिंग आत कि याग सुर्य मुळकेत अदिक हापाळ अंधार आत, आग ऊंद बेक्की इन भट्टी यदुर दा टु धुंगा येळ तोगोद अदिक ऊंद होततेला मशाल कांळ्स्त जो आ तुकळा गोळ बीच दा टु आगकु होटबुळ्त. ईदा दिशी यहोवा अब्राहम उन सांगुळ ईद वादा माळदुन, “मिस्त्र अन महानद टु हुडुकु फरात हेसुर इन धोळ्द नद ताका याट द्याश आद, मतलब केनियो, कनिज्जियों, कदमोनियों, हित्ती, परिज्जी, रपाईयो एमोरीगोळ, कनानीगोळ, गिर्गाशीगोळ, अदिक यबूसीगोळ द्याश ना नीन वंश इक कोटीन.”
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.