परमेश्वर उन वचन
उत्पत्ति 12
परमेश्वर उन दी टु अब्राहम उक कारोद आगोद वर्णन
यहोवा अब्राहम से अंदुन, “तान द्याश, अदिक तान घरानागोळी, अदिक तान आप्प उन मान्ना अक बिटकु आ द्याश दा होटोग जो ना नीनी तोरसाईन. अदिक ना नीन से ऊंद धोळ्द जाती माळाईन, अदिक नीनी आशीष कोळाईन, अदिक नीन हेसुर महान माळाईन, अदिक नी आशीष इन मूल आद्या.”
जो आशीर्वाद कोळुल, आंदरी ना आशीष कोळाईन;
अदिक जो नीनी कोसुस्यार, आऊक ना श्राप कोळाईन;
अदिक भूमी माकळोर सप्पा कुल नीन द्वारा आशीष ताकोंडार.
यहोवा अन ई वचन इन अनुसार अब्राहम नळदुन, अदिक लूत भी आऊन सांगुळ नळदुन; अदिक अब्राहम याग हारान द्याश टु होट्टुन आ समय आव पचहत्तर वर्ष इनव ईरोन. ई प्रकार देल अब्राहम तान हिंग्स सारै, अदिक तान पुतणा लूत उक, अदिक जो धन आंदुर जमा माळीदुर, अदिक जो प्राणी आंदुर हारान दा हासील माळीदुर, सप्पा अक हुडुकु कनान द्याश दा होगली होट्टुर;
अदिक आंदुर कनान द्याश दा होट्ट बंदुर. आ द्याश इन बीच टु होगतेला अब्राहम शकेम दा, येल मोरे अन बांज इन मार्र आद, पोहचुसदुन. आ समय आ द्याश दा कनानी लॉकुर ईरतोगोर. आग यहोवा अब्राहम उक दर्शन कोटकु अंदुन, “ईद द्याश ना नीन वंश इक कोळाईन.” अदिक आव यहोवा अन साटी अल ऊंद वेदी माळदुन, याव आऊक दर्शन कोटीदुन. बाक अल टु मुंद वाळुसकु आव आ पहाळी मा बंदुन, जो बेतेल इन पूर्व इन दी आद, अदिक तान ड्यारा आ जागा मा नीदरूसदुन यदुर पश्चिम इन दी बेतेल अदिक पूर्व दी ऐ आद. अल भी आव यहोवा अन साटी ऊंद वेदी माळदुन अदिक यहोवा अन्द साटी प्रार्थना माळदुन. अदिक अब्राहम मुंद वाळुसकु दक्षिण द्याश इन दी वोळेदुन.
मिस्त्र द्याश दा अब्राहम
आ द्याश दा अकाल बीत्त : इदुरसाटी अब्राहम मिस्त्र द्याश इक होटोदुन कि अल परदेशी आगकु ईरूल यतिकी द्याश दा भयंकर अकाल बिदकु ईरोद. बाक हिंग आत कि मिस्त्र इन हात्ती पोहचुस्कु, आव तान हिंग्स सारै से अंदुन, “केळ, नानी मालुम आद कि नी ऊंद सुंदर आर्त आय; अदिक मिस्त्र लॉकुर नीनी नोळ्यार रा अंदार, ‘इक आऊन हिंग्स उर,’ इदुरसाटी आंदुर रा नीनी कोंद बुट्टार, लेकीन नीनी जीत्ता ईट बुट्टार. अत: ईद अनेत, ना आऊन आकतींग हुईन, यदुर देल नीन कारण नान कल्याण आगुल, अदिक नान प्राण नीन कारण ऊळदोगुल.” बाक हिंग आत कि याग अब्राहम मिस्त्र दा बंदुन, आग मिस्त्र लॉकुर आऊन हिंग्स उक नोळदुर कि आक हापाळ सुंदर आर. अदिक फिरौन इन हाकिमगोळ आकी नोळकु फिरौन उन मुंद आकिन प्रशंसा माळदुर; इदुरसाटी आक आर्त फिरौन उन मान्या पोहचुस्कु आदुर. अदिक फिरौन आकिन कारण अब्राहम उन भलाई माळदुन; अदिक आऊक मर्र-माट्ट, वस्ता-गोसी, दास-दासीगोळ, गधा-गदहीगोळ, अदिक ऊँट सिकदव.
लेकीन यहोवा फिरौन अदिक आऊन घराना मा, अब्राहम उन हिंग्स सारै अन कारण धोळ धोळ परेशानीगोळ हाकदुन. आग फिरौन अब्राहम उक कारसुसकु आऊन से अंदुन, “नी नान सांगुळ ईद येन माळ्द? नी नानी येती हेळीदिल कि आक नीन हिंग्स उर? नी येती अंद कि आक नीन आकतींग उर? ना आकी तान हिंग्स माळोर साटी कोंडीन; लेकीन ईग तान हिंग्स उक हुडुकु ईल टु होटोग.” अदिक फिरौन तान मंळसागोळी आऊन बारा दा आग्या कोट्टुन अदिक आंदुर आऊक अदिक आऊन हिंग्स उक, सप्पा संपत्ती सांगुळ जो आऊन ईरोद, विदा माळ कोंडुर
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.