परमेश्वर उन वचन
उत्पत्ति 10
नूह उन वंशावली
नूह उन पार शेम, हाम, अदिक येपेत ईरोर; आंदुरोर चिकोर जल-प्रलय इन बाद्दा पैदा आदुर: आंदुर्द वंशावली ईद हुन.
येपेत उन पारगोळ: गोमेर, मागोग, मादै, यावान, तूबल, मेशेक, अदिक तीरास आदुर. गोमेर उन पारगोळ: अशकनज, रीपत, अदिक तोगर्मा आदुर. अदिक यावान उन वंश दा एलीशा, अदिक तर्शीश, अदिक कित्ति, अदिक दोदानी लॉकुर आदुर. इंदुर द्वारा जाती जाती नोर तटवर्तीय प्रदेश तान तान भाषा, कुल अदिक जाती इन अनुसार तान तान द्याश दा अलग आगेदुर.
हाम उन पारगोळ: कूश, मिस्त्र, पूत अदिक कनान आदुर. अदिक कूश उन पारगोळ सबा, हवीला, सबता, रामा, अदिक सबूतका आदुर. अदिक रामा अन चिकोर शबा, अदिक ददान आदुर. कूश उन वंश दा निम्रोद भी आदुन; पृथ्वी मा पयला वीर आवा आग्यान. आव यहोवा अन नजर दा पराक्रमी शिकार आळावाळा ठहरूसदुन, ईदुर देल अद कहावत नळुत; “निम्रोद उन घाई यहोवा अन नजर दा पराक्रमी शिकार आळावाळा.” आऊन राज्य अन सुरूवात शिनार द्याश दा बेबीलोन, एरेख, अक्कद अदिक कलने देल आत. आ द्याश टु आव होटकु अश्शूर उक होदुन, अदिक नीनवे, रहोबोतीर अदिक कालह उक, अदिक नीनवे अदिक कालह इन न्याड्या जो रेसेन आद, अदरी भी बसुसदुन; धोळ्द नगर ईदा हुन.
मिस्त्र अन वंश दा लूदी, अनामी, लहाबी, नप्तूही, अदिक पत्रूसी, कसलूही अदिक कप्तोरी लॉकुर आदुर, कसलूहियों दा टु रा पलिश्ती लॉकुर होट्टुर.
कनान उन वंश दा आऊन धोळ पार सीदोन, तब हित्ती, यबूसी, एमोरी, गिर्गाशी, हिब्बी, अर्की, सीनी, अर्वदी, समारी, अदिक हमाती जाती इन लॉकुर भी आदुर; बाक कनानीगोळ्द कुल भी फैलुसेत; अदिक कनानीगोळ्द सीमा सीदोन टु हुडुकु गरार इन हादी टु आगकु गाजा ताका अदिक बाक सदोम अदिक गमोरा अदिक अदमा अदिक सबोयीम इन हादी टु आगकु लाशा ताका आत. हाम उन वंश दा ईंदुरा पैदा आदुर, अदिक ईंदुर अलग अलग कुलगोळ, भाषागोळ, द्याशगोळ अदिक जातीगोळ अनुसार अलग अलग आगेदुर.
शेम उन वंशज
शेम, जो सप्पा एबेर वंशिगोळोव मूल गंळ्स आदुन, अदिक जो येपेत उन धोळ वार्ट ईरोन, आऊनोर भी चिकोर पैदा आदुर. शेम उन चिकोर : एलाम, अश्शूर, अर्पक्षद, लूद अदिक अराम आदुर. अराम उन चिकोर : ऊस, हूल, गेतेर अदिक मश आदुर. अदिक अर्पक्षद शेलह अक, अदिक शेलह एबेर उक पैदा माळदुन. अदिक एबेर उक येढ्ढ चिकोर आदुर, ऊंद पार उन हेसुर पेलेग ईद कारण देल ईटकु आत कि आऊन दिनगोळ दा पृथ्वी अन्द येढ्ढ भाग आदव, अदिक आऊन वार्ट उन हेसुर योक्तान ईरोद. अदिक योक्तान उक अल्मोदाद, शेलेप, हसर्मावेत, येरह, यदोरवाम, ऊजाल, दिक्ला, ओबाल, अबीमाएल, शबा, ओपीर, हवीला अदिक योबाब पैदा आदुर: ईंदुर अच सप्पा योक्तान उन चिकोर पैदा आदुर. ईंदुर्द ईरोद ऊंद जागा मेशा टु हुळकु सपारा, जो पूर्व दा ऊंद पहाळी आद, अदुर हादी ताका आत. शेम उन चिकोर ईंदुरा आदुर; अदिक ईंदुर अलग-अलग कुलगोळ, भाषागोळ, द्याशगोळ अदिक जातीगोळ अनुसार अलग-अलग आगेदुर.
नूह अन्द पारगोळ्द घराना ईदा हुन: अदिक आंदुर्द जातीगोळ्द हिसाब देल आंदुर वंशावली ईवा हु; अदिक जल-प्रलय इन बाद्दा पृथ्वी माकळव जातीगोळ इंदुर दा टु अच आगकु अलग आगेदव.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.