यहेजकेल 3

1आग आव आन से अंदुन, “हे मंळसा अन सन्तान, जो नीनी सिक्याद अदरी तीनकोम; मतलब ई किताब इक तीन, आग होगकु इस्त्राएल उन घराना से मात माळ.”

2इदुरसाटी ना बाय खोल्सदीन अदिक आव अद किताब नानी तिन्सदुन. 3आग आव नान से अंदुन, “हे मंळसा अन सन्तान, ईद किताब जो ना नीनी कोळतीन अदरी पचुसकोम, अदिक व्हाट्टा ईदुर देल तुम कोम.” अत: ना अदरी तीन कोंडीन; अदिक नान बाय दा अद शयद इन घाई सय हत.

4बाक आव नान से अंदुन, “हे मंळसा अन सन्तान, नी इस्त्राएल उन घराना अन हाती होगकु नानव वचन केळ्स. 5यतिकी नी यातोदारा अनोखा बोली या कठिन भाषावाळा राज्य अन हाती कळुकु आगाल, लेकीन इस्त्राएल अच उन घराना अन हाती कळुकु आगत्या. 6नीनी ईत्ता लॉकुर इन हाती कळालीन जो अनोखा बोली माताळतार या कठिन भाषा माताळावाळेर लॉकुर आर, यार्द भाषा नी समसाल. अगर ना नीनी ईत्ता लॉकुर हाती इच कळाईदीन, रा बिना सन्देह आंदुर नान मात केळायदुर. 7लेकीन इस्त्राएल उन घरानावाळेर नीन केळोर से इनकार माळ्यार; आंदुर नान भी केळोर से इनकार माळतार; यतिकी इस्त्राएल उन सारा घराना हेकळ अदिक कठोर मन इन आद. 8नोळ, ना नीन बाय इक आंदुर बाय इन मुंद, अदिक नीन मस्तक इक आंदुर मस्तक इन मुंद, मजबुत माळ कोमतीन. 9ना नीन मन इक चकमक कल्ल से येक्कुल कठोर माळ कोंडीन. आंदुर विद्रोही कुल इन सन्तान उर. नी आंदुर तीखा नजर देल अंजबाळेत अदिक न हतास आगेत,”

10बाक आव नान से अंदुन, “हे मंळसा अन सन्तान, यास वचन ना नीन से अनाईन, अव सप्पा दिल दा ईट अदिक किवगोळ देल केळ. 11अदिक आ बन्दीगोळ हाती होगकु, जो नीन राज्य अन वार्टुर हुर, आंदुर से मातगोळ माळेत अदिक अनेत, ‘प्रभु यहोवा हींग अनतान,’ बाक आंदुर केळुल या केळबाळुल.”

12आग परमेश्वर उन आत्मा नानी म्याकुच नेगुत, अदिक ना तान हींद धोळ्द घळघळाहट इन सांगुळ ऊंद शब्द केळदीन: आव अंदुन, “परमेश्वर उन महिमा आशीष इन आद.” 13अदिक अदुर सांगुळ अच आ जीवधारीगोळ पंखगोळ्द शब्द जो आबुर दाबुर से हत तोगोव, अदिक आंदुर सांगुळ इन चक्कागोळ्द शब्द अदिक ऊंद धोळ्द अच घळघळाहट केळ बत्त. 14आग आत्मा नानी नेगुकु वोईत, अदिक ना कठिन दुख देल तुमकु, अदिक मन दा होततेला होटोदीन; अदिक यहोवा अन शक्ती नान दा प्रबल ईरोद; 15अदिक आ बन्दीगोळ हाती बंदीन जो कबार गांगा अन तट मा तेलाबीब दा ईरतोगोर. अदिक अल येळ दिन ताका आंदुर बीच व्याकुल आगकु कुर्तकु ईत्तीन.

पहरेदार उन रूप दा यहेजकेल उन नियुक्ती

(यहेजकेल 33:1-9)

16येळ दिन इन आगदुर बाद्दा यहोवा अन ईद वचन नान हाती पोहचुस्त, 17“हे मंळसागोळ सन्तान, ना नीनी इस्त्राएल उन घराना अन साटी पहरेदार नियुक्त माळीन; नी नान बाय इन मात केळकु, आंदरी नान दी टु चेतावनी कोळेत. 18याग ना दुष्ट से अनाईन, ‘नी सही दा सोत्या,’ अदिक अगर नी आऊक समझुसतीदील, अदिक न दुष्ट से हिंग मातगोळ अनेत कि आव समसुल अदिक तान दुष्ट हादी बिटकु जीत्ता ईरूल, रा आव दुष्ट तान अधर्म दा फसुसकु सोत्तान, लेकीन आऊन खुन इन लेखा ना नीन से अच ताकोमाईन. 19लेकीन अगर नी दुष्ट उक चितुसत्या, अदिक आव दुष्टता अदिक दुष्ट हादी देल तीर्गालुन, रा आव रा तान अधर्म दा फसुसकु सोतोदान; लेकीन नी तान तान इक ऊळस्या.”

20“बाक याग धर्मी मंळसा तान धर्म देल तिर्गकु कुटिल क्याल्सा माळली कुरतान, अदिक ना आऊन मुंद ठोकर ईटाईन, रा आव सोतोदान, यतिकी नी आऊक समझुसीदील, इदुरसाटी आव तान पाप दा फसुसकु सोत्तान; अदिक धर्म इन कर्म आव माळ्यान, अऊर्द सुधी ताकोमकु आगतीदील, लेकीन आऊन खुन इन लेखा ना नीन अच ताकोमाईन. 21लेकीन धर्मी इक हिंग अनकु समझुस्या, कि आव पाप माळबाळुल, अदिक आव से ऊळदान, रा आव आ चितौनी इक ग्रहण माळा कारण सही दा जीत्ता ईत्तान, अदिक नी तान तान इक ऊळस्या.”

यहेजकेल माताळदुर दा असमर्थ

22बाक यहोवा अन सामर्थ अल्या नान मा प्रगट आत, अदिक आव नान से अंदुन, “येदकु मैदान दा होग; अदिक अल नीन से मातगोळ हेळाईन.”

23आग ना येदकु मैदान दा होदीन, अदिक अल येन नोळदीन, कि यहोवा अन तेज घाई नानी कबार गांगा अन तट मा, हांग अच ईल भी कांळ्सकु बिळतद, अदिक ना बाय इन भार देल बिदोदीन. 24आग आत्मा नान दा समुस्कु नानी काल इन भार देल निदरूस्त; बाक आव नान से अनली कुरतुन, “होग तान मान्ना अन बुळ्क दरवाजा बंद माळकु कुर्तकु ईर. 25हे मंळसा अन सन्तान, नोळ, आ लॉकुर नीनी जाळी देल जकळुसकु कटकु ईट्यार, अदिक नी होटकु आंदुर बीच होग सकतीदील. 26ना नीन ल्यालग्या नीन ताळु देल हचाईन; यदुर देल नी मौन ईतकु आंदुर दनकुसावाळा ईला, यतिकी आंदुर विद्रोही घरानानोर उर. 27लेकीन याग याग ना नीन से मातगोळ माळाईन, आग आग नीन बाय इक खोलसाईन, अदिक नी आंदुर से हिंग अनेत, ‘प्रभु यहोवा हींग अनतान,’ जो केळतान आव केळ कोमुल अदिक जो केळालुन आव केळबाळुल, आंदुर रा विद्रोही घरानानोर अच उर.”