परमेश्वर उन वचन
यहेजकेल 2
भविष्यवक्ता अन रूप दा यहेजकेल उक परमेश्वर उन कारोद
आव नान से अंदुन, “हे मंळसा अन पार, तान काल इन भार नीदुर, अदिक ना नीन से मात माळाईन.” ह्यांग आव नान से ईद अंदुन, आग आत्मा नान दा समुस्कु नानी कालगोळ बल नीदरुस्त; अदिक जो नान से मातगोळ माळतोगोन ना आऊन केळदीन. आव नान से अंदुन, “हे मंळसा अन सन्तान, ना नीनी इस्त्राएलगोळ हाती मतलब बलवा माळावाळा राज्य अन हाती कळुतीन, यार नान विरूद्ध बलवा माळ्यार; आंदुर पुरखा अदिक आंदुर भी ईंद इन दिन ताका ना विरूद्ध अपराध माळतेला बंदार. ई पीढ़ी इन लॉकुर यार हाती ना नीनी कळुतीन, आंदुर निर्लज अदिक जीद्दी आर; अदिक नी आंदुर से अनेत, ‘प्रभु यहोवा ईद अनतान,’ ईदुर देल आंदुर, जो बलवा माळावाळेर घरानादोर आर, बाक आंदुर केळुल या केळ बाळुल, तरी भी आंदुर ईट जान्स कोंडार कि नाम न्याड्या दा ऊंद भविष्यवक्ता प्रगट आग्यान.”
हे मंळसा अन सन्तान, नी आंदुर से अंजबाळेत; बाक नीनी मुळ्लगोळ, ऊँट कटारगोळ अदिक चेळगोळ बीच दा भी ईरोद बीद्दीत, तरी भी आंदुर वचनगोळ से अंज बाळेत, अदिक न आंदुर बाय नोळकु नीन मन कच्चा आगुल. ईदुरसाटी बाक आंदुर केळुल या केळबाळुल; तरी भी नी नान वचन आंदुर से अनेत, आंदुर रा हापाळ झगळेलु आर.
“लेकीन हे मंळसागोळ सन्तान, जो ना नीन से अनतीन, अदरी नी केळकोम, आ विद्रोही घराना अन घाई नी भी विद्रोही आगबाळेत, जो ना नीनी कोळतीन, अदरी बाय खोल्सकु तीनकोम1.” आग ना दृष्टी माळदीन अदिक येन नोळदीन, कि नान दी ऊंद कय वाळुसकु आद अदिक अदुर दा ऊंद किताब आद. अदरी आव नान मुंद खोल्सकु फैलुसदुन, अदिक अद येढ्ढु दी लिख्सकु ईरोद; अदिक जो अदुर दा लिख्सकु ईरोद, अव विलाप अदिक शोक अदिक दुख इन वचन ईरव.
Source notes (1)
- Footnote प्रकाशित 5:1
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.