परमेश्वर उन वचन
यहेजकेल 22
यरूशलेम नगर इन अपराध इन न्याय
यहोवा अन ईद वचन नान हाती पोहचुस्त: “हे मंळसा अन सन्तान, ये नी आ हत्यारा नगर इन न्याय माळतीदील? येन नी अदुर्द न्याय माळतीदील? अदरी अदुर सप्पा घिनोना क्याल्सागोळ हेळ कोम, अदिक अन, परमेश्वर यहोवा ईद अनतान: हे नगर नी तान न्याड्या दा हत्या माळत्या यदुर देल नीन समय बरूल, अदिक तान अच हानि माळदुर अदिक अशुध्द आगोर साटी मुर्तीगोळ माळत्या. जो हत्या नी माळ्या, अदुर देल नी दोषी ठहरूस्द, अदिक जो मुर्तीगोळ नी माळ्या, अऊर कारण नी अशुध्द आगेग्या; नी तान आखरी इन दिनगोळी हाती तनकोंड्या, अदिक तान हिंदळोव वर्षगोळ ताका पोहचुसीग्या. ई कारण ना नीनी राज्य राज्य अन लॉकुर इन दी टु नामधराई इन, अदिक सप्पा द्याशगोळ मज्याक इन कारण माळ कोंड्या. हे बदनाम, हे हुल्लड देल तुमकु नगर, जो हाती अदिक जो दुर आर, आंदुर सप्पा नीनी मज्याक दा हारस्यार.” “नोळ, इस्त्राएल उन प्रधान लॉक तान तान ताकत इन अनुसार नीन दा हत्या माळावाळेर आग्यार. नगर दा नीम दा टु याऊ भी तान मोय आप्प उन आदर माळालुन; नीव परदेशी इक ध्वाका कोळतीर अदिक विधवा अदिक अनाथ लॉकुर से लाभ नेगुतीर. नी नान पवित्र वस्तु उक बेकार जान्सद, अदिक नान आराम इन दीनगोळी अपवित्र माळ्द. नीन दा लुच्चा लॉकुर हत्या माळोर साटी तत्पर आग्यार, अदिक नीन लॉकुर पहाळीगोळ मा भोजन माळ्यार; नीन न्याड्या महापाप माळकु आग्याद. नीन दा आप्प उन शरीर ईळ्सकु आग्याद; नीन दा महावारी आर्त से भोग माळकु आग्याद.” यावारा नीन से मान्ना हात्तीळोर आर्त इन सांगुळ बेकार क्याल्सा माळ्यार; अदिक यावारा तान सास्स इक बिगळुसकु महापाप माळ्यार; अदिक यावारा तान सौतेला आकतींग मतलब तान पोर इक भ्रष्ट माळ्यान. नीन दा हत्या माळोर साटी आंदुर घुस तिंदार; नी ब्याज अदिक मुद्दल ताकोंड अदिक तान मान्ना हात्तीगोळोर इक पीसुस पिसुसकु अन्याय देल लाभ नेग्द; अदिक नान इक नी मारतोद, प्रभु यहोवा अन ईदा वाणी हुन. “ईदुरसाटी नोळ, जो लाभ नी अन्याय देल नेगद्या अदिक तान न्याड्या हत्या माळ्या, अदुर देल ना कय मा कय कोट्टीन. अत: या दिनगोळ दा ना नीन न्याय माळाईन, येन नी अदुर दा नान दिल मजबुत अदिक नीन कय स्थिर ईर सक्केव? ना यहोवा अच ईद अंदीन, अदिक हींग अच माळाईन. ना नीन लॉकुरी राज्य राज्य दा तीतर-बितर माळाईन, अदिक द्याश द्याश दा हास बुळाईन, अदिक नीन अशुध्दता अक नीन से नष्ट माळाईन. नी राज्य राज्य अक नोळतेला तान अच नजर दा अपवित्र ठहरुसीत; आग नी जान्स कोंड्या कि ना यहोवा हुईन.”
परमेश्वर उन सिट्ट इन बेक्की
बाक यहोवा अन ईद वचन नान हाती पोहचुस्त: “हे मंळसा अन सन्तान, इस्त्राएल उन घराना नान नजर दा धातु उन मैल आगेदुर; आंदुर सप्पा च्या सप्पा भट्टी इन ल्यालमा अन पीतल अदिक टीन अदिक लोहा अदिक काच इन घाई आगेग्यार; आंदुर बेळ्ली इन मैल आगेग्यार. ई कारण प्रभु यहोवा आंदुर से ईद अनतान: ईदुरसाटी कि नीव सप्पा च्या सप्पा धातु उन मैल इन घाई आगेगीर, अत: नोळी, ना नीम इक यरूशलेम इन बुळ्क जमा माळदुर मा आईन. ह्यांग लॉकुर बेळ्ली, पीतल, लोहा, काच, अदिक टीन ईदुरसाटी भट्टी इन बुळ्क जमा ईटतार कि आंदरी बेक्की दा हचकु पीघलुसुल, हांग अच ना नीमी इक तान कोप अदिक जलजलाहट देल जमा माळकु अल्या ईटकु पीघलुस बुळाईन. ना नीमी अल जमा माळकु तान सिट्ट इन बेक्की देल उराईन, अदिक नीव अदुर न्याड्या पीघलुसकु आदीर. ह्यांग बेळ्ली भट्टी इन न्याड्या पीघलुसकु आगतद, हांग अच नीव अदुर न्याड्या पीघलुसकु आदीर; आग नीव जान्स कोंडीर कि याव नाम मा तान जलजलाहट भळकुस्यान, आव यहोवा हुन.”
इस्त्राएल इन अगुआ गोळोव पाप
बाक यहोवा अन ईद वचन नान हाती पोहचुस्त: “हे मंळसा अन सन्तान, आ द्याश से अन, नी हींग द्याश आय जो शुद्ध आगीदील, अदिक जलजलाहट इन दीन दा नीन मा माळ आगतीदील. नीन भविष्यवक्तागोळ नीन दा राजद्रोह अन गोष्ठी माळ्यार, आंदुर गरजुसावाळा हुल्ल इन घाई सिकार हुळदुर अदिक प्राणीगोळी तीन कोंडुर; आंदुर ईट्द अनमोल धन इक कसु कोमतार, अदिक नीन दा हापाळ आर्तेर इक रांड्या माळ कोंडार. आऊन याजकगोळ नान व्यवस्था अन मतलब जेडु-जाडुकु हचीन, अदिक नान पवित्र वस्तुगोळी अपवित्र माळ्यार; आंदुर पवित्र-अपवित्र अन येनु भेद मानसीदील, अदिक न दुसरा अक शुद्ध अशुद्ध अनभेद कलस्यार, अदिक आंदुर नान आराम दिन इन बारा दा निश्चिन्त ईरतार, यदुर देल ना आंदुर न्याड्या दा अपवित्र ठहरूसतीन.” आऊन प्रधान लांडग्या घाई सिकार हुडुतार, अदिक अन्याय देल लाभ नेगोर साटी हत्या माळतार अदिक प्राण घात माळोर साटी तत्पर ईरतार. आऊन भविष्यवक्ता आंदुर साटी कच्चा पोताई माळतार, आदुर्द दर्शन नोळोद मिथ्या आद; यहोवा अन बिना येनारा अंदेव भी आंदुर ईद अनकु ख्वाटा भावी हेळतार कि प्रभु यहोवा ईद अनतान. द्याश इन साधारण लॉकुर भी अत्याचार माळतार अदिक पराया धन कसुतार, आंदुर रोज गरीबी इक पीसुसतार अदिक न्याय इन चिन्ता बिटकु परदेशी मा अत्याचार माळतार. ना आंदुर दा हींग मंळसा ढुढसोद चाहसदीन जो बाळा अक सुधरूसुल अदिक द्याश इन निम्मित नाका दा नान मुंद हींग नीदुरूसुल कि नानी आऊन नाश माळोद बीळ बाळुल, लेकीन हींग याऊ सीकीदील. ई कारण ना आंदुर मा तान सिट्ट भळकुसदीन अदिक तान जलजलाहट इन बेक्की देल आंदरी भस्म माळ कोंडीन; ना आंदुर चाल आंदुर्द अच ताला मा वापस माळ कोंडीन; परमेश्वर यहोवा अन ईदा वाणी हुन.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.