परमेश्वर उन वचन
यहेजकेल 21
न्याय इन तलवार
बाक यहोवा अन ईद वचन नान हाती पोहचुस्त: “हे मंळसा अन सन्तान, तान बाय यरूशलेम इन दी माळ अदिक पवित्र जागागोळ दी वचन केळ्स; इस्त्राएल इन द्याश इन बारा दा भविष्यवाणी माळ अदिक आऊन से अन, प्रभु यहोवा ईद अनतान: नोळ, ना नीन विरूद्ध आईन, अदिक तान तलवार म्यान दा टु जेडुकु नीन दा टु धर्मी अदिक अधर्मी येढ्ढु मुंदुर नाश माळाईन.” ईदुरसाटी कि ना नीन दा टु धर्मी अदिक अधर्मी सप्पा अन नाश माळावाळा आईन, ई कारण नान तलवार म्यान टु होटकु दक्षिण टु उत्तर ताका सप्पा प्राणीगोळ विरूद्ध नळदीत;
आग सप्पा प्राणी जान्स कोंडव कि यहोवा म्यान दा टु तान तलवार जेळदान; अदिक अद अदुर मात ईटकु आगतीदील.
“ईदुरसाटी हे मंळसा अन सन्तान, नी आह तुम, भारी दुख माळ, अदिक मुर्दकु नेळु हुडुकु लॉकुर मुंद आह तुम. याग आंदुर नीन से केळुल, नी यती आह तुमत्या? आग अनेत, समाचार इन कारण. यतिकी हींग मात बरावाळा आद कि सप्पा अन मन मुरदोदव अदिक सप्पा अन कय ढीला बीद्दव, सप्पा अन आत्मा बेबस अदिक सप्पा अन ट्वांगरा निर्बल आगेदव. नोळी, हींग अच मात बरोद आद, अदिक अद सहीदा पुरा आदीत,” परमेश्वर यहोवा अन ईदा वाणी आद.
बाक यहोवा अन ईद वचन नान हाती पोहचुस्त, हे मंळसा अन सन्तान, भविष्यवाणी माळकु अन, परमेश्वर यहोवा ईद अनतान:
नोळ, तेज धार माळ्द तलवार, अदिक चमकुसोर साटी झलकुस्द तलवार!
अद ईदुरसाटी तेज धार येर्सकु आत तलवार माळकु आत कि अदुर देल घात माळकु आगुल,
अदिक ईदुरसाटी झलकुसकु आत कि बिजली इन घाई चमकुसुल!
रा येन नाव खुश आदेव? आव रा यहोवा अन पार उन राजदण्ड आद
अदिक सप्पा मार्रगोळ इक बेकार जानसावाळा आन.
अद तलवार झलकुसली ईदुरसाटी कोटकु आत कि कय दा हुडुकु आगुल,
अद ईदुरसाटी सान येर्सकु अदिक झलकुसकु आत
कि घात माळावाळेर कय दा कोटकु आगुल.
हे मंळसा अन सन्तान चिळ्लास, अदिक हाय, हाय, माळ!
यतिकी अद नान प्रजा मा नळोद चाहसतद,
अद इस्त्राएल इन सप्पा प्रधानगोळ नळोद चाहसतद;
नान प्रजा अन सांगुळ आंदुर भी तलवार इन वश दा होट्ट बंदुर.
ई कारण नी तान याद्दा बडु.
यतिकी सहीदा अदुर्द जाच आग्याद,
अदिक अगर अदरी बेकार जानसावाळा राजदण्ड भी ईला ईरूल,
रा येन?
परमेश्वर यहोवा अन ईदा वाणी हुन.
“ईदुरसाटी हे मंळसा अन सन्तान, भविष्यवाणी माळ, अदिक कय मा कय होडु, अदिक मुर घन तलवार इन बल दुगना माळकु आगुल; अद घात माळोद तलवार बल्की धोळ से धोळ घात माळोद तलवार हुन, यदुर देल कोठरीगोळ दा भी होचकोमकु याऊ ऊळु सकालुन. ना घात माळावाळा तलवार इक आंदुर सप्पा फाटकगोळ विरूद्ध ईदुरसाटी ईदुरसाटी नळस्यान कि लॉकुरव मन मुरदोगुल, अदिक आंदुर हापाळ ठोकर तिंदुर. हाय, हाय! अद बीजली इन घाई माळकु आत, अदिक घात माळली तेज धार येर्सकु आग्याद. सीकुळसकु ऊमा कय दी होग, बाक तैयार आगकु डाक्या दी तीर्ग, यात्त भी नीन बाय ईरूल. ना भी ताळी मुरसाईन अदिक तान जलजलाहट इक ठंडा माळाईन, ना यहोवा हींग अंदीन.”
बेबीलोन उन राजा अन तलवार
बाक यहोवा अन ईद वचन नान हाती पोहचुस्त: “हे मंळसा अन सन्तान, येढ्ढ हादी ठहरूसकोम कि बेबीलोन उन राजा अन तलवार बरूल; येढ्ढु हादी ऊंद अच द्याश टु होळुल. बाक ऊंद चिन्ह आत, मतलब नगर इन हादी इन ताल्ला मा ऊंद चिन्ह आत; ऊंद हादी माळ कि तलवार अम्मोनिया अन रब्बा नगर मा, अदिक यहूदा द्याश इन गढ़वाळा नगर यरूशलेम मा भी नळुल. यतिकी बेबीलोन उन राजा तिर्मुहाने मतलब येढ्ढु हादीगोळ होळा जागा मा सुकुन जानसोर साटी निदुरदुन, आव तीरगोळी हालुस बुट्टुन, अदिक मान्यागोळ द्यावगोळ प्रश्न माळदुन, अदिक आव बली येर्सद जनावरगोळ ईरग्या अन जाच माळतान.” आऊन ऊजवा कय दी यरूशलेम इन हेसुर आद कि आव अदुर दी युध्द अन यत्न हचुल, अदिक कुतक्या हरूकु घात माळोद आग्या कोळुल अदिक ऊचा आवाज देल चिळ्लाळसुल, फाटक दी युध्द अन यत्न हचुल अदिक घेराबन्दी माळुल अदिक कोट माळुल. लेकीन लॉकुर रा आ भविष्य हेळावाळा अक ख्वाटा समस्यार; आंदुर जो आंदुर्द किर्या तिंदार; ई कारण आव आंदुर अधर्म इक याद माळसुसकु आंदरी हुडु कोंडान. ई कारण प्रभु यहोवा ईद अनतान: ईदुरसाटी कि नीम्द अधर्म जो याद माळकु आग्याद, अदिक नीम अपराध जो खुलसेग्याव, यतिकी नीमव सप्पा क्याल्सागोळ दा पाप अच पाप कांळ्सकु बीदाद, अदिक नीव याद दा बंदीर, ईदुरसाटी नीव आंदुर से हुडुकु आदीर.
“हे इस्त्राएल दुष्ट प्रधान, नीन दीन होट बंदाद; अधर्म इन अन्त इन समय होट्ट बंदाद. नीन बारा दा परमेश्वर यहोवा ईद अनतान: पगळी ईळ्स,अदिक मुकुट भी ईळ्स कोम; आव हांग च्या हांगा माळतीदील; जो नीचा आन आऊक ऊँचा माळ अदिक जो ऊँचा आन आऊक नीच माळ. ना आऊक ऊलटुस बुळाईन अदिक उलट पुलट माळ कोमाईन; अदिक यागासताका आऊन अधिकार बराल आगासताका आव उलटा आगकु ईत्तान; आग ना आऊक कोळाईन.”
अम्मोनिया अन विरूद्ध तलवार
हे मंळसा अन सन्तान, भविष्यवाणी माळकु अन कि प्रभु यहोवा अम्मोनिया अदिक आंदुर्द माळ्द नींदा अन बारा दा ईद अनतान;
नी ईद अन, जेळ्द तलवार आद,
अद तलवार घात इन साटी झलकुसकु आग्याद कि नाश माळुल अदिक बीजली इन घाई ईरूल.
यागासताका कि आंदुर नीन बारा दा ख्वाटा दर्शन नोळतार, अदिक ख्वाटा दिलासा नीनी कोळतार कि नी आ दुष्ट असाध्य घायलगोळ गर्दनगोळ मा बीद्दव यार्द दीन होट्ट बंदाद, अदिक यार अधर्म अन अन्त इन समय होट्ट बंदाद.
“अदरी म्यान दा मात ईट. या जागा दा नी माळकु आग्या अदिक या द्याश दा नीन उत्पत्ति आग्याद, अल्या नीन न्याय माळाईन. ना नीन मा तान सिट्ट भळकुसाईन अदिक नीन मा तान जलजलाहट इन बेक्की ऊराईन; अदिक नीनी जनावर घाई मंळसा अन कय दा माळ कोमाईन जो नष्ट माळदुर दा निपुण आर. नी बेक्की इन कौर आद्या; नीन रक्ता द्याश दा बन्सकु ईत्तीत; नी याद दा ईरतीदील यतिकी ना यहोवा अच हींग अंदीन.”
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.