निर्गमन 8

दुसरा विपत्ती-भ्यापकागोळ्‍द आक्रमण

1आग यहोवा मात्‍त मूसा से अंदुन, “फिरौन उन हात्ती होगकु अन, ‘यहोवा नीन से ईत्‍ता प्रकार देल अनतान: नान प्रजा अन लॉकुरी होगगोळ यदुर देल आंदुर नान आराधना माळ्‍यार. 2लेकीन अगर आंदरी होगगोळतीदील रा केळ, ना भ्यापकागोळी कळुकु नीन सप्‍पा द्‍याश इक हानि पोहुचुसावाळा आईन. 3अदिक नील गांगा भ्यापकागोळ देल तुम्‍मेदित, अदिक अव नीन भवन दा, अदिक नीन हासक्‍या मा, अदिक नीन कर्मचारीगोळ मान्‍नगोळ दा, अदिक नीन प्रजा मा उलटा नीन भट्‍टागोळ अदिक हीठ कालसोद पात्रगोळ दा भी येरेदाव; 4अदिक नीन मा, अदिक नीन प्रजा अदिक नीन कर्मचारीगोळ, सप्‍पा मुंदुर मा भ्यापकागोळ येरेदाव.’”

5बाक यहोवा मूसा अक आग्‍या कोट्‍टुन, “हारून से अंदकोम कि गांगागोळ, नयरगोळ, अदिक झीलगोळ म्‍याकुच कय वाळुसकु कोल इन सांगुळ भ्यापकागोळी मिस्त्र द्‍याश मा येर्सकु तरूल.” 61इदुरसाटी हारून मिस्त्र द्‍याश इन जलाशयगोळ म्‍याकुच तान कय वाळुसदुन; अदिक भ्यापकागोळ मिस्त्र द्‍याश मा येरकु अदरी होच बुट्‍टव. 7अदिक जादूगरगोळ भी हांगा तंत्र-मंत्र देल मिस्त्र द्‍याश मा भ्यापकागोळ येर्सकु तंदुर.

8आग फिरौन मूसा अदिक हारून उक कारसुसकु अंदुन, “यहोवा से विनती माळी कि आव भ्यापकागोळी नान से अदिक नान प्रजा से दुर माळुल; अदिक ना इस्त्राएली लॉकुरी होगगोळाईन. यदुर देल आंदुर यहोवा साटी बलिदान माळुल.” 9आग मूसा फिरौन से अंदुन, “ईट मात साटी नी नानी आदेश कोळ कि ईग ना नीन अदिक नीन कर्मचारीगोळ, अदिक प्रजा अन निमित्त याग विनती माळाईन, कि यहोवा नीन हात्‍ती टु अदिक नीन मान्‍नगोळ दा टु भ्यापकागोळी दुर माळुल, अदिक अव सिर्फ नील गांगा दा सिकुल?” 10आव अंदुन, “नाळ.” आव अंदुन, “नीन वचन इन अनुसार आदीत, यदुर नीनी ईद भास आगेगुल कि नाम परमेश्वर यहोवा अन तुल्‍य दुसरा याऊ हैलेच. 11अदिक भ्यापकागोळ नीन हात्‍ती टु अदिक नीन मान्‍नगोळ दा टु अदिक नीन कर्मचारीगोळ अदिक प्रजा अन हात्‍ती टु दुर आगकु सिर्फ नील गांगा दा अच ईत्‍ताव.” 12आग मूसा अदिक हारून फिरौन उन हात्‍ती टु होटोदुर; अदिक मूसा आ भ्यापकागोळ बारा दा, यहोवा अन दुहाई कोट्‍टुन जो आव फिरौन मा कळीदुन. 13अदिक यहोवा मूसा अन अना हिसाब देल माळदुन; अदिक भ्यापकागोळ मान्‍नगोळ, आंगुळगोळ, ऊरगोळ अदिक केईगोळ दा सोतोदव. 14अदिक मिस्त्री लॉकुर जमा माळकु अऊर्द ढेर हच बुट्‍टुर, अदिक पुरा द्‍याश वास देल तुम्‍मेत. 15लेकीन याग फिरौन नोळदुन कि ईग आराम सिक्‍याद आग यहोवा अन कहना अन अनुसार आव मात्‍त तान मन कठोर माळदुन, अदिक आंदुर केळीदील.

तिसरा विपत्ती पिसोर्‍या अन्द झुण्‍ड

16बाक यहोवा मूसा से अंदुन, “हारून उक आग्‍या कोळ, ‘नी तान कोल वाळुसकु जमीन इन गागरा मा बडु, यदुर देल अद मिस्त्र द्‍याश तीम दा पिसोर्‍यागोळ बनसेगुल.’” 17मुंद आंदुर हांगा माळदुर; मतलब हारून कोल इक हुडुकु कय वाळुसकु जमीन इन गागरा मा बळदुन, आग मंळसा अदिक जनावरगोळ येढ्‍ढु मा पिसोर्‍यागोळ आगेदव, अदिक सप्‍पा मिस्त्र द्‍याश दा भुमी इन गागरा पिसोर्‍यागोळ बन्‍सेदव. 18आग जादूगरगोळ चाहासदुर कि तान तंत्र-मंत्रगोळ्द शक्‍ति देल नाव भी पिसोर्‍यागोळ तंदेव, लेकीन आंदुर सफल आग सकीदील. ई प्रकार मंळसागोळ अदिक जनावरगोळ येढ्‍ढु मा पिसोर्‍यागोळ बन्सकु ईत्‍तव. 192आग जादूगरगोळ फिरौन से अंदुर, “ईद रा परमेश्वर उन 3कय इन क्‍याल्‍सा हुन.” तरी भी यहोवा अन कहना अन अनुसार फिरौन उन मन कठोर आगतेला ईत्‍त, अदिक आव मूसा अदिक हारून उन मात मान्‍सीदील.

चौथा विपत्ती नॉणगोळ्द झुण्‍ड

20बाक यहोवा मूसा से अंदुन, “व्हातऱ्या का येदकु फिरौन उन मुंद निदरेत, आव रा नील गांगा अन्द किनारा मा बंदान, अदिक आऊन से अनेत, ‘यहोवा नीन से ईद अनतान: नान प्रजा अन लॉकुरी होगगोळ कि आंदुर नान आराधना माळुल. 21अगर नी नान प्रजा अक होगगोळतीदील रा केळ, ना नीन मा अदिक नीन कर्मचारीगोळ अदिक नीन प्रजा मा, अदिक नीन मान्‍नगोळ दा झुण्‍ड इन झुण्‍ड नॉणगोळी कळाईन; अदिक मिस्त्रीगोळ मान्‍ना अदिक आंदुर ईरा जागा भी नॉणगोळ देल तुम्‍मेदीत. 22लेकीन आ दिशी ना गोशेन द्‍याश इक यदुर दा नान प्रजा ईरतद ब्‍यार्र माळाईन, अदिक अदुर दा नॉणगोळ्‍द झुण्‍ड ईरतीदील; यदुर देल नी जान्‍स कोम कि 4पृथ्‍वी इन न्याड्या दा ना अच यहोवा हुईन. 23अदिक ना तान प्रजा अदिक नीन प्रजा दा अंतर पैदा माळाईन. ईद चिन्‍ह चमत्कार नाळ आदीत.’” 245अदिक यहोवा हांगा माळदुन, अदिक फिरौन उन भवन अदिक आऊन कर्मचारीगोळ्‍द मान्‍नगोळ दा, अदिक सप्‍पा मिस्त्र द्‍याश दा नॉणगोळ्‍द झुण्‍ड इन झुण्‍ड तुम्‍मेदव, अदिक नॉणगोळ मारा देल आ द्‍याश नष्‍ट आत.

25आग फिरौन मूसा अदिक हारून उक कारसुसकु अंदुन, “नीव होगकु तान परमेश्वर उन साटी ईदा द्‍याश दा बलिदान येरसी.” 26मूसा अंदुन, “हींग माळोद उचित हैलेच; यतिकी नाव तान परमेश्वर यहोवा अन साटी मिस्त्रीगोळ्द हिंग घृणित वस्‍तु बलिदान येरसेव; अदिक अगर नाव मिस्त्रीगोळ नोळ्‍त आंदुर्द घृणित वस्‍तु बलिदान येरसेव रा येन आंदुर नाम मा पथराव माळतीदील? 27नाव सुनसान आळी दा मुर दिन इन हादी मा होगकु तान परमेश्वर यहोवा अन साटी ह्यांग आव नाम से अंदान हांग अच अल नाव बलिदान येरसेव.” 28फिरौन अंदुन, “ना नीमी आळी दा होगगोळाईन कि नीव तान परमेश्वर यहोवा अन साटी बलिदान येरसी; सिर्फ यक्कुल दुर होगबाळेतीर, अदिक नान साटी प्रार्थना माळी.” 29आग मूसा उत्तर कोट्टुन, “केळ, ना नीन हात्‍ती टु व्‍हार्या होगकु यहोवा से प्रार्थना माळाईन कि नॉणगोळ्द झुण्‍ड नीन, अदिक नीन कर्मचारीगोळ, अदिक प्रजा अन हात्‍ती टु नाळ अच दुर माळाईन; लेकीन फिरौन मुंद कपट माळकु नामी यहोवा अन्द साटी बलिदान माळली होगोर साटी मना माळबाळुल.” 30आग मूसा फिरौन उक बिट्ट बुट्टुन अदिक आऊन हात्‍ती टु व्‍हार्या होगकु यहोवा से प्रार्थना माळदुन. 31अदिक यहोवा मूसा अन अना हिसाब देल नॉणगोळ्‍द झुण्‍डगोळी फिरौन, अदिक आऊन कर्मचारीगोळ, अदिक आऊन प्रजा से दुर माळदुन; ईल ताका कि ऊंद भी नॉण मिक्‍कु ईतीदील. 32आग फिरौन ई घन भी तान मन इक कठोर माळदुन, अदिक आ लॉकुरी होग गोटीदील.