निर्गमन 39

याजकीय कपळा तयार माळोद

(निर्गमन 28:1-14)

1बाक आंदुर नीळा, जांभळा अदिक क्याचांद रंग इन कळुस्द कपळा पवित्रस्थान इन स्यावा अन साटी, अदिक हारून उन साटी भी पवित्र कपळा माळदुर; याता प्रकार देल यहोवा मूसा अक आग्या कोटीदुन.

2आव विशेष प्रकार इक कपळा अन्द व्हान्ना, अदिक नीळा, जांभळा अदिक क्याचांद रंग इन कपळा अन, अदिक सुक्ष्म सन इन कपळा अन बनुसदुन. 3अदिक आंदुर व्हान्ना पीठ्स पीठ्सकु अदुर्द पतरी माळदुर, बाक पतरीगोळी कडु कडुकु तार माळदुर, अदिक कुशल कारागीरगोळ आ तारगोळी नीळा, जांभळा अदिक क्याचांद रंग इन कपळा दा, अदिक सुक्ष्म सन इन कपळा दा कळाई इन बनावट देल मिलुस बुट्टुर. 4एपोद इन जोळ्सली आंदुर अदुर बाक्कागोळ माकळोद बंधन माळदुर, अद तान येढ्ढु क्वानागोळ से जोळ्सकु आत. 5अदिक अदुर कसुसोर साटी जो काळ्सद पट्टा अदुर मा बनुस्त, अद अदुर सांगुळ बिना जोळ इन, अदिक अदुर्दा बनावट इन अनुसार, मतलब व्हान्ना अदिक नीळा, जांभळा अदिक क्याचांद रंग इन कपळा अन, अदिक सुक्ष्म सन इन कपळा अन बनुस्त; याता प्रकार देल यहोवा मूसा अक आग्या कोटीदुन.

6आंदुर सुलैमानी मणि कडुकु अऊर दा इस्त्राएल इन हन्नेळ पारगोळ हेसुर, ह्यांग छापा अगुळकु आगतद हांगा अगुळदुर, अदिक व्हान्ना नव खानगोळ दा जळुस बुट्टुर. 7अदिक आव आंदरी एपोद इन बाक्का अन बन्धनगोळ मा हचदुन, यदुर देल इस्त्राएलीगोळ लॉकुर साटी याद माळसुसावाळा मणि ठहरूसुल; याता प्रकार देल यहोवा मूसा अक आग्या कोटीदुन.

सीनाबन्द माळोद

(निर्गमन 28:15-30)

8आव सीनाबन्द इक एपोद इन घाई व्हान्ना अन, अदिक नीळा, जांभळा अदिक क्याचांद रंग इन कपळा अन, अदिक सुक्ष्म सन इन कपळा दा बेल बुटा अन क्याल्सा माळदुन. 9सीनाबन्द चौकोन बनुस्त; अदिक आंदुर अदरी दोहरा माळदुर, अदिक अद दोहरा आगकु ऊंद बित्ता ऊद्द अदिक ऊंद बित्ता चौळा आत. 10अदिक आंदुर अदुर दा नाक लाईन दा मणि हाकदुर. पयला लाईन दा माणिक्य; पुखराज, अदिक लालड़ी हाकदुर; 11अदिक दुसरा लाईन दा मरकत, नीलमणि, अदिक हीरा; 12अदिक तीसरा लाईन दा लशम, सुर्यकांत, अदिक नीलम; 13अदिक चौथा लाईन दा फिरोजा, सुलैमानी मणी, अदिक यशब हाकदुर; ई सप्पा अलग अलग सीना अन खानगोळ दा हाक्कु आदव. 14अदिक ई मणि इस्त्राएल इन पारगोळ्द हेसुरगोळ गिनती इन अनुसार हन्नेळ ईरव; हन्नेळ गोत्रगोळ दा टु ऊंद ऊंद हेसुर ह्यांग छापा अगुळकु आगतद हांगा अगुळकु आत. 15अदिक आंदुर सीनाबन्द मा डोरीगोळ घाई गुथुस्द खरा व्हान्ना अन जंजीर माळकु हचदुर; 16बाक आंदुर व्हान्ना नव येढ्ढ खाना, अदिक व्हान्ना अन येढ्ढ कळीगोळ माळकु येढ्ढु कळीगोळी सीनाबन्द इन येढ्ढु क्वाना मा हचदुर; 17आग आंदुर व्हान्ना नव येढ्ढु गुथुस्द जंजीरगोळी सीनाबन्द इन क्वाना माकळोद येढ्ढु कळीगोळ दा हचदुर. 18अदिक गुथुस्द येढ्ढु जंजीरगोळ्द मिक्द येढ्ढु क्वानागोळी आंदुर येढ्ढु खानागोळ दा हाक्कु, विशेष कपळा अन्द मुंद येढ्ढु बाक्का अन बन्धनगोळ मा हचदुर. 19आग आंदुर व्हान्ना अन अदिक येढ्ढ कळीगोळ माळकु सीनाबन्द इन येढ्ढु क्वाना मा अदुर आ कोर मा, जो एपोद इन बुळ्क इन भाग दा ईरोद, हचदुर. 20अदिक आंदुर व्हान्ना अन मात्त येढ्ढ कळीगोळ भी माळकु एपोद इन येढ्ढु बाक्का अन बन्धनगोळ मा ल्यालमा टु अदुर मुंद, अदिक जोळ इन हात्ती विशेष कपळा अन्द काळुस्द पट्टा मा म्याकुच हचदुर. 21आग आंदुर सीनाबन्द इक अदुर कळीगोळ द्वारा एपोद इन कळीगोळ दा नीळा फिता देल हींग कटदुर कि अद एपोद इन काळुस्द पट्टा अन म्याकुच ईरूल, अदिक चपरास एपोद देल अलग आग सकबाळुल; ह्यांग यहोवा मूसा अक आग्या कोटीदुन.

दुसरा याजकीय कपळा माळोद

(निर्गमन 28:31-43)

22बाक एपोद इन कुर्ता पुरा नीळा रंग इन माळकु आत. 23अदिक अदुर बनावट हींग आत कि अदुर न्याड्या गोठ इन गड्डा अन घाई ऊंद गड्डा बनुस्त, अदिक गड्डा अन नाकु दी ऊंद कोर बनुस्त कि अद हरूबाळुल. 24आंदुर अदुर्द ल्यालमा अन घ्यारा दा नीळा, जांभळा अदिक क्याचांद रंग इन कपळा अन अनार माळदुर. 25आंदुर शुद्ध व्हान्ना अन घंटीगोळ भी माळकु बागा अन ल्यालमा अन घ्यारा अन नाकु दी अनारगोळ्द बीचोबीच हचदुर; 26मतलब बागा अन ल्यालमागोळ्द घ्यारा अन नाकु दी ऊंद व्हान्ना अन घंटी, अदिक ऊंद अनार, बाक ऊंद व्हान्ना अन घंटी, अदिक ऊंद अनार हचकु आत कि अवरी हाक्कु स्यावा टहल माळुल; ह्यांग यहोवा मूसा अक आग्या कोटीदुन.

27बाक आंदुर हारून, अदिक आऊन पारगोळ साटी बनुस्द सुक्ष्म सन इन कपळा अन अंगरखा, 28अदिक सुक्ष्म सनी इन कपळा अन पगळी, अदिक सुक्ष्म सन इन कपळा अन सुंदर टोपीगोळ; अदिक सुक्ष्म सनी इन कपळा अन जंग्यागोळ, 29अदिक सुक्ष्म सन इन कपळा अन अदिक नीळा, जांभळा अदिक क्याचांद रंग इन कढ़ाई इन क्याल्सा माळ्द पगळी; ई सप्पा अक याता प्रकार देल यहोवा मूसा अक आग्या कोटीदुन हांगा माळदुन.

30बाक आंदुर पवित्र मुकुट इन पट्टी शुद्ध व्हान्ना अन माळदुर; अदिक ह्यांग छापा दा हांगा अदुर दा ई अक्षर अगुळकु आदव, मतलब “यहोवा अन साटी पवित्र.” 31अदिक आंदुर अदुर दा नीळा जाळी हचदुर, यदुर देल अद म्याकुच पगळी मा ईरूल, याता प्रकार देल यहोवा मूसा अक आग्या कोटीदुन.

मिलाप इन तम्बु उन तयार आगोद

(निर्गमन 35:10-19)

32ईत्ता प्रकार देल मिलाप इन तम्बु उन निवास इन सप्पा क्याल्सा खतम आदव, अदिक याता याता क्याल्सा अन आग्या यहोवा मूसा अक कोटीदुन, इस्त्राएलीगोळ अदुर्दा अनुसार माळदुर.

33आग आंदुर निवास इक मूसा अन हात्ती तंदुर: मतलब घुंडीगोळ, पाटीगोळ, बेंडगोळ, खम्बागोळ, कुर्चीगोळ आदि सप्पा सामान समेत तम्बु; 34अदिक क्याचांद रंग देल रंगुस्द म्यांडागोळ्द तोगुल इन होदोद, अदिक सूइसगोळ तोगुल इन होदोद, अदिक न्याड्या अन पळदा; 35डंडा सहित साक्षीपत्र इन सन्दुक, अदिक प्रायश्चित इन झाकनी; 36सप्पा सामान समेत मेज, अदिक भेंट इन रोट्टीगोळ; 37सप्पा सामान सहित दिवट, अदिक अदुर सजावट इन दिंग्या, अदिक ऊजुळ कोळोर साटी याण्णा; 38व्हान्ना अन वेदी, अदिक अभिषेक इन याण्णा; अदिक सुगन्धित धूप, अदिक तम्बु उन दरवाजा अन पळदा; 39पीतळ इन झंझरी, डण्डागोळ अदिक सप्पा सामान समेत पीतळ इन वेदी; अदिक पाया सांगुळ गंगार; 40खम्बागोळ अदिक कुर्चीगोळ समेत आंगुळ इन पळदागोळ, अदिक आंगुळ इन दरवाजा अन पळदा, अदिक डोरीगोळ, अदिक खुटागोळ, अदिक मिलाप इन तम्बु उन निवास इन स्यावा अन सप्पा सामान; 41पवित्रस्थान दा स्यावा टहल माळोर साटी बेल बुटा काळुस्द कपळा, अदिक हारून याजक उन पवित्र कपळा, अदिक आऊन पारगोळ्द कपळा यवरी हाक्कु आंदरी याजक उन क्याल्सा माळोद ईरोद. 42मतलब जो जो आग्या यहोवा मूसा अक कोटीदुन अऊर्दा अनुसार इस्त्राएलीगोळ सप्पा क्याल्सा माळदुर. 43आग मूसा सप्पा क्याल्सा अन निरीक्षण माळकु नोळदुन कि आंदुर यहोवा अन आग्या अन अनुसार सप्पा येनारा माळदुर. अदिक मूसा आंदरी आशीर्वाद कोट्टुन.