निर्गमन 31

यहोवा अन निवास-स्थान इन साटी कारीगर

(निर्गमन 35:30; 36:1)

1बाक यहोवा मूसा से अंदुन, 2“केळ, ना ऊरी इन पार बसलेल उक, जो हूर उन नातु अदिक यहूदा अन गोत्र नव हुन, हेसुर ताकोमकु कारूतीन. 3अदिक ना आऊक परमेश्वर उन आत्मा देल जो बुद्धि, हुनर, ग्यान, अदिक हर प्रकार इन क्याल्सागोळ्द समझ कोळावाळा आत्मा हुन, परिपुर्ण माळतीन, 4यदुर देल आव कारीगरी इन क्याल्सा बुद्धि देल तेगु तेगुकु हर प्रकार इन बनावट दा, मतलब व्हान्ना, बेळ्ली, अदिक पीतळा दा, 5अदिक जळुसोर साटी मणि कळदुर दा, अदिक हुळ्ली मा नकाशा अन क्याल्सा माळुल. 6अदिक केळ, ना दान इन गोत्रवाळेर अहीसामाक उन पार ओहोलीआब उक आऊन सांगुळ माळ बुळतीन; उलटा यास दिमागदार आर आ सप्पा मुंदुर दिल दा ना बुद्धि कोळतीन, यदुर देल यास वस्तुगोळ्द आग्या ना नीनी कोटीन आ सप्पा अक आंदुर बनुसुल; 7मतलब मिलाप इन तम्बु, अदिक गवाही इन चिट्टी इन सन्दुक अदिक अदुर माकळोद प्रायश्चित इन झाकनी अदिक तम्बु उन सप्पा सामान, 8अदिक सामान समेत मेज, अदिक सप्पा समान समेत शुद्ध व्हान्ना अन दीवट, अदिक धूपवेदी, 9अदिक सप्पा सामान समेत होमबली वेदी, अदिक पाया समेत गंगार, 10अदिक होलदव कपळा, अदिक हारून याजक उन याजकवाळा क्याल्सा नव पवित्र कपळा, अदिक आऊन पारगोळ्द कपळा, 11अदिक अभिषेक इन याण्णा, अदिक पवित्रस्थान इन साटी सुगन्धित धूप, अदिक ई सप्पा अक आंदुर आ सप्पा आग्यागोळ्द अनुसार बनुसुल जो ना नीनी कोटीन.”

सब्त मतलब विश्राम दिन

12बाक यहोवा मूसा से अंदुन, 13“नी इस्त्राएलीगोळ से ईद भी अनेत, ‘निश्चय नीव नान विश्राम दिनगोळी मान्सेतीर, यतिकी नीम पीढ़ोन पीढ़ी दा नान अदिक नीम लॉकुर न्याड्या ईद ऊंद चिन्ह ठहरूस्याद, यदुर देल नीव ईद मात याद ईटी कि यहोवा नाम पवित्र माळावाळा हुन. 14ई कारण नीव विश्राम दिन इक मान्सेतीर, यतिकी आव नीम साटी पवित्र ठहरूस्यान; जो आऊक अपवित्र माळुल आव जरूर कोन्सुसकु आगुल: जो यावारा आ दिनगोळ दा येनारा क्याल्सा-कळी माळुल आ मंळसा तान लॉकुर न्याड्या दा टु नष्ट माळकु आगुल. 15आर दिन रा क्याल्सा-कळी माळकु आगुल, लेकीन सातवा दिन परम विश्राम इन दिन अदिक यहोवा अन साटी पवित्र आद; इदुरसाटी जो यावारा विश्राम इन दिन दा येनारा क्याल्सा-कळी माळुल आव जरूर कोन्सुसकु आगुल. 16इदुरसाटी इस्त्राएली विश्राम दिन इन मान्सतोगुल, उलटा पीढ़ोन पीढ़ी दा अदरी हमेशा अन वाचा अन विषय जान्सकु मानसुल. 17अद नान अदिक इस्त्राएलीगोळ न्याड्या दा हमेशा ऊंद चिन्ह ईत्तीत, यतिकी आर दिन दा यहोवा आकाश अदिक धरती इक बनुसदुन, अदिक सातवा दिशी विश्राम माळकु तान जीव ठंडा माळदुन.’”

18याग परमेश्वर मूसा से सीनै पहाळी मा हिंग मात माळ कोंडुन, आग आव आऊक तान बेळ्ल देल लिख्सद गवाही कोळावाळा कल्ल इन येढ्ढु तखतगोळ कोट्टुन.