निर्गमन 26

परमेश्वर उन उपस्थिती इन तम्बु

(निर्गमन 36:8-38)

1“बाक निवासस्थान इन साटी हत्त पळदागोळ माळसुसेत; ईव निवळुस्द महीन मलमल देल माळ्द नीळा, जांभळा, अदिक क्याचांद रंग इन कपळा अन ईरूल, अदिक ईऊर दा यावारा कुशल कारीगर से करूबगोळ्द कढ़ाई माळसुसेत. 2ऊंद ऊंद पळदागोळ्द लंबाई आट्ठावीस कय अदिक चौळाई नाक कय इन ईरूल: सप्पा पळदागोळ ऊंदा नाप इनव ईरूल. 3अईद पळदागोळ आबुर दाबुर देल जुळ्सकु ईरूल; अदिक बाक जो अईद पळदागोळ ईत्ताव अव भी आबुर दाबुर देल जुळ्सकु ईरूल. 4अदिक यल ईव येढ्ढु पळदागोळ जोळ्सकु आगुल अल इन येढ्ढु किनारा मा नीळा नीळा फन्दागोळ हचुसेत. 5येढ्ढु किनारा दा पचास पचास फन्दागोळ हिंग हचुसेत कि अव आमने-सामने ईरूल.” 6अदिक व्हान्ना नव पचास आकळागोळ माळसुसेत; अदिक पळदागोळी ईवा आकळागोळ देल हिंग जोळसुसेत कि निवासस्थान मिलुसकु ऊंद आगेगुल.

7“बाक निवास इन म्याकुच तम्बु उन क्याल्सा कोळोर साटी मर्री इन चुट्टी इन हनुन पळदागोळ माळसुसेत. 8ऊंद ऊंद पळदा अन लंबाई तीस कय अदिक चौळाई नाक कय इन ईरूल; हनुन इन हनुन पळदागोळ ऊंदा नाप इनव ईरूल. 9अदिक अईद पळदा अलग अदिक बाक आर पळदागोळ अलग जोळसुसेत, अदिक छटवा पळदा अक तम्बु उन मुंद मुरूकु येढ्ढ माळ बुळेत. 10अदिक नी पचास आकळागोळ आ पळदागोळ किनारा दा जो व्हार्या टु मिसळुसकु आदीत अदिक पचास अच आकळागोळ दुसरा दिकळोद पळदा अन किनारा दा जो व्हार्या टु मिसळुसकु आदीत माळसुसेत. 11अदिक पीतळा अन पचास आकळागोळ माळेत, अदिक आकळागोळी फन्दागोळ दा हचकु तम्बु उक हिंग जोळसुसेत कि अव मिलुसकु ऊंद आगेगुल. 12अदिक तम्बु उन पळदागोळ्द हिलगुसतेला भाग, मतलब जो आर्धा पट ईत्तीत, अद निवास इन हिंदळा भाग दी लटकुस्त ईरूल. 13अदिक तम्बु उन पळदागोळ्द लंबाई दा टु कय तीम ईत्त, अदिक कय तीम आत्त निवास इन मुच्चोर साटी अदुर्द येढ्ढु दी लटकुस्त ईरूल.” 14बाक तम्बु उन साटी क्याचांद रंग देल रंगुस्द म्यांडागोळ्द तोगुल इन ऊंद होदोद अदिक अदुर म्याकुच सूइसगोळ तोगुल इन भी ऊंद होदोद माळसुसेत.

15“बाक निवास इक निदरूसोर साटी बबूल इन हुळ्लीगोळ्द तख्तागोळ माळसुसेत. 16ऊंद ऊंद तख्ता अन लंबाई हत्त कय अदिक चौळाई दिळ कय इन ईरूल. 17ऊंद ऊंद तख्ता दा आबुर दाबुर से जोळ्सद येढ्ढ येढ्ढ चूली ईरूल; निवास इन सप्पा तख्तागोळी ईदा प्रकार देल माळसुसेत. 18निवास इन साटी जो तख्तागोळ नी माळसुस्या अऊर दा टु ईप्पत तख्तागोळ रा दक्षिण दिकळोद साटी ईरूल; 19अदिक ईप्पत तख्तागोळ ल्यालमा बेळ्ली इन च्यालीस कुर्चीगोळ माळसुसेत, मतलब ऊंद ऊंद तख्तागोळ ल्यालमा अदुर चूलीगोळ साटी येढ्ढ येढ्ढ कुर्चीगोळ. 20निवास इन दुसरा दी, मतलब उत्तर दिकळोद साटी ईप्पत तख्तागोळ माळसुसेत; 21अदिक अऊर साटी बेळ्ली इन च्यालीस कुर्चीगोळ माळसुसेत, मतलब ऊंद ऊंद तख्तागोळ ल्यालमा येढ्ढ येढ्ढ कुर्चीगोळ ईरूल. 22निवास इन हिंदळा भाग दी, मतलब पश्चिम दिकळोद साटी आर तख्तागोळ माळसुसेत. 23अदिक हिंदळा भाग दा निवास इन क्वानागोळ साटी येढ्ढ तख्तागोळ माळसुसेत; 24अदिक ईव ल्यालमा टु येढ्ढ येढ्ढ भाग इनव ईरूल, अदिक येढ्ढु भाग म्याकुच इन क्वाना ताका ऊंद ऊंद कळा दा मिलुसकु आगुल; येढ्ढु तख्तागोळ्द ईदा रूप ईरूल; ईद येढ्ढु क्वाना अन साटी ईरूल.” 25अदिक येठ्ठ तख्तागोळ ईरूल, अदिक अऊर्द बेळ्ली इन सॉळा कुर्चीगोळ ईरूल; मतलब ऊंद ऊंद तख्ता अन ल्यालमा येढ्ढ येढ्ढ कुर्चीगोळ ईरूल.

26“बाक बबूल इन हुळ्ली इन बेंडागोळ माळसुसेत, मतलब निवास इन ऊंद दिकळोद तख्तागोळ साटी अईद, 27अदिक निवास इन दुसरा दिकळोद तख्तागोळ साटी अईद बेंडागोळ, अदिक निवास इन जो भाग पश्चिम दी हिंदळा भाग दा ईत्तीत, अदुर साटी अईद बेंडागोळ माळसुसेत. 28न्याड्यागोळ्द बेंडा जो तख्तागोळ्द न्याड्या दा ईत्तीत अद तम्बु उन ऊंद क्वाना टु दुसरा क्वाना ताका पोहचुसुल. 29बाक तख्तागोळी व्हान्ना देल मळसुसेत, अदिक अऊर्द कळागोळ जो बेंडागोळ्द मान्नोद क्याल्सा कोट्टाव अवरी भी व्हान्ना देल माळसुसेत; अदिक बेंडागोळी भी व्हान्ना देल मळसुसेत. 30अदिक निवास इक ईदा रिति देल निदरूसेत ह्यांग ई पहाळ मा नीनी तोर्सकु आग्याद.”

31“बाक नीळा, जांभळा अदिक क्याचांद रंग इन अदिक महीन मलमल इन ऊंद न्याड्यागोळ्द पळदा माळसुसेत; यदुर मा कुशल कारीगर उन द्वारा करूब कढ़ाई माळकु आगुल. 32अदिक अदरी व्हान्ना देल मळुस्द बबूल इन नाक खम्भागोळ मा हिलगुसेत, ईऊर्द आकळागोळ व्हान्ना नव ईरूल, अदिक ईव बेळ्ली इन नाक कुर्चीगोळ मा निदुरकु ईरूल. 33अदिक न्याड्यागोळ्द पळदा अक आकळागोळ्द ल्यालमा हिलगुसकु, अदुर आळ दा गवाही इन चिट्टी इन सन्दुक अंदर तरेत, ई प्रकार अद न्याड्यागोळ्द पळदा नीम साटी पवित्रस्थान इक परम पवित्रस्थान दा ब्यार्र माळकु ईरूल. 34बाक परम पवित्रस्थान दा गवाही इन चिट्टी इन सन्दुक उन म्याकुच प्रायश्चित इन झाकनी इक ईटेत. 35अदिक आ पळदा अन व्हार्या निवास इन उत्तर दी मेज ईटेत; अदिक दक्षिण दी मेज इन मुंद दीवट ईटेत. 36बाक तम्बु उन दरवाजा अन साटी नीळा, जांभळा अदिक क्याचांद रंग इन अदिक महीन मलमल सुक्ष्म सनी इन कपळा अन कढ़ाई इन क्याल्सा माळ्द ऊंद पळदा माळसुसेत. 37अदिक ई पळदा अन साटी बबूल इन अईद खम्भागोळ माळसुसेत, अदिक अवरी व्हान्ना देल मळसुसेत; अऊर कळागोळ व्हान्ना नव ईरूल, अदिक अऊर साटी पीतळा अन अईद कुर्चीगोळ ढाल्सकु माळसुसेत.”