निर्गमन 18

मूसा अन तान मॉव उन से मुलाकात माळोद

1याग मूसा अन मॉव मिद्यान इन याजक यित्रो ईद केळदुन कि परमेश्वर मूसा अदिक तान प्रजा इस्त्राएल इन साटी येन येन माळ्यान, मतलब ईद कि याता प्रकार देल यहोवा इस्त्राएलीगोळी मिस्त्र दा टु तेगुकु तंदान, 2आग मूसा अन मॉव यित्रो मूसा अन हिंग्स सिप्पोरा अक, जो पयले टु ना आप्प उन मान्या कळुकु आगीदुर, 31अदिक आऊन येढ्ढु चिकोरी भी तंदुन; ईंदुर दा टु ऊंद उन हेसुर मूसा ईद अंदकु गेर्शोम ईटीदुन: “ना दुसरा द्याश दा परदेशी आगीन.” 4अदिक दुसरा अन हेसुर आव ईद अंदकु एलीएजेर ईटदुन: “नान आप्प उन परमेश्वर नान सहायक आगकु नानी फिरौन उन तलवार देल ऊळ्सदुन.” 5मूसा अन हिंग्स अदिक पारगोळी, आऊन मॉव यित्रो सांगुळ हुडुकु मूसा अन हात्ती आळी दा आ जागा मा बंदुन, यल परमेश्वर उन पहाळ इन हात्ती आऊन ड्यारा ईरोद. 6अदिक बंदकु आव मूसा अन हात्ती ईद बातणी कळुदुन, “ना नीन मॉव यित्रो हुईन, अदिक येढ्ढु पारगोळ समेत नीन हिंग्स उक नीन हात्ती तनकोटीन.” 7आग मूसा तान मॉव उन से मुलाकात माळोर साटी होट्टुन, अदिक आऊक दण्डवत माळकु मुत ताकोंडुन; अदिक आंदुर आबुर दाबुर हालचाल केळकु ड्यारा अन्द बुळ्क होदुर. 8अल मूसा तान मॉव उन से सप्पा क्याल्सागोळ्द वर्णन माळदुन कि यहोवा इस्त्राएलीगोळ निमित्त फिरौन अदिक मिस्त्रीगोळ से येन येन माळदुन, अदिक इस्त्राएलीगोळ यात्रा दा याता याता कष्ट नेगदुर, बाक यहोवा आंदरी ह्यांग ह्यांग बिळ्त बंदान. 9आग यित्रो आ सप्पा भलाई इन कारण जो यहोवा इस्त्राएलीगोळ सांगुळ माळीदुन, कि आंदरी मिस्त्रीगोळ्द वश दा टु बिळ्सीदुन, खुश आगकु अंदुन, 10यित्रोगोळ अंदुर “धन्य आन यहोवा, याव नीमी फिरौन अदिक मिस्त्रीगोळ्द वश दा टु बिळ्सदुन, याव नीम लॉकुरी मिस्त्रीगोळ्द मुठ्ठी दा टु बिळस्यान. 11ईग ना अर्त कोंडीन कि यहोवा सप्पा देवतागोळ से धोड्डेव आन; उलटा आ बारा दा भी यदुर देल आंदुर इस्त्राएलीगोळ सांगुळ अहंकारपुर्ण व्यवहार माळीदुर.” 12आग मूसा अन मॉव यित्रो परमेश्वर उन साटी होमबली अदिक मेलबलि येर्सदुन, अदिक हारून इस्त्राएलीगोळ्द सप्पा पुरनियागोळ समेत मूसा अन मॉव यित्रो अन सांगुळ परमेश्वर उन मुंद प्रार्थना माळदुर अदिक ऊमली कुरतुर.

प्रधानगोळ्द नियुक्ति

13दुसरा दिशी मूसा लॉकुर न्याय माळोर साटी कुरतुन, अदिक द्यावमुळका टु व्हातुर ताका लॉकुर मूसा अन आस पास निदुरकु ईत्तुर. 14ईद नोळकु कि मूसा लॉकुर साटी येन येन माळतान, आऊन मॉव अंदुन, “ईद येन क्याल्सा हुन जो नी लॉकुर साटी येन क्याल्सा माळत्या? येन कारण आद कि नी आबना कुर्तकु ईरत्या, अदिक लॉकुर द्यावमुळका टु व्हातुर ताका नीन आस पास निदुरकु ईरतार?” 15मूसा तान मॉव उन से अंदुन, “ईदुर कारण ईद आद कि लॉकुर नान हात्ती परमेश्वर से केळली बरतार. 16याग याग आंदुर यातोदारा मुकदमा आगतद आग आग आंदुर नान हात्ती बरतार, अदिक ना आंदुर न्याड्या दा न्‍याय माळतेला, अदिक परमेश्वर उन विधि अदिक व्यवस्था आंदरी समझुसतीन.” 17मूसा अन मॉव आऊन से अंदुन, “जो क्याल्सा नी माळत्या, अद वळ्लीद हैलेच. 182ईदुर देल नी येन, उलटा ई लॉकुर भी जो नीन सांगुळ आर जरूर थक्सेदार, यतिकी ईद क्याल्सा नीन साटी हापाळ भारी आद; नी ईदरी आबना माळ सकाल. 19इदुरसाटी ईग नान केळकोम, ना नीनी सम्मति कोळतीन, अदिक परमेश्वर नीन सांगुळ ईरूल! नी ई लॉकुर साटी परमेश्वर उन हात्ती होगतोग, अदिक ईंदुर्द मुकदमागोळी परमेश्वर उन हात्ती नी पोहचुसतोग. 20ईंदरी परमेश्वर उन आग्या अदिक नियम कल्सेत, अदिक याता हादी मा ईंदरी नळोद, अदिक जो जो क्याल्सा ईंदरी माळोद आद, अद हेळबुळतोग. 21बाक नी ई सप्पा लॉकुर दा टु ईत्ता मंळसागोळी छाट्सबुळ, जो गुणी, अदिक परमेश्वर उन अंज्क मान्सावाळेर, सच्चा, अदिक अन्याय इन लाभ देल घृणा माळावाळेर ईरूल; अदिक आंदरी हजार-हजार, सौ-सौ, पचास-पचास, अदिक हत्त-हत्त मंळसागोळ मा प्रधान नियुक्त माळबुळ. 22अदिक आंदुर हर सप्पा समय लॉकुर्द न्याय माळतोगुल; अदिक श्याण-श्याणेव मुकदमागोळ्द न्याय खुद अच माळतोगुल; आग नीन भार हल्का आदीत, यतिकी ई भार इक आंदुर भी नीन सांगुळ नेगदार 23अगर नी ईद उपाय माळ्या, अदिक परमेश्वर नीनी हिंग आग्या कोळुल, रा नी ठहरूस सक्या, अदिक ई सप्पा लॉकुर तान जागा अक कुशल देल पोहचुस सक्यार.”

24तान मॉव उन ईद मात मान्सकु मूसा आऊन सप्पा वचनगोळ्द अनुसार माळदुन. 25इदुरसाटी मूसा सप्पा इस्त्राएलीगोळ दा टु गुणी मंळसागोळी निवळुसकु आंदरी हजार-हजार, सौ-सौ, पचास-पचास, हत्त-हत्त लॉकुरगोळ मा अधिकारी ठहरूसदुन. 26अदिक आंदुर सप्पा लॉकुरगोळ्द न्याय माळली हतदुर; जो मुकदमा कठिन ईरतोगोद अदरी आंदुर मूसा अन हात्ती तरतोगोर, अदिक सप्पा श्याण मुकदमागोळ्द न्याय आंदुर खुद अच माळतोगोर. 27आग मूसा तान मॉव उक सार माळदुन, अदिक आव तान द्याश इन हादी हुळदुन.