परमेश्वर उन वचन
निर्गमन 13
पहिलौठागोळ्द अर्पण
बाक यहोवा मूसा से अंदुन, 1“येन मंळसा नव येन जनावरगोळव, इस्त्राएलीगोळ दा यास तान तान मोय इन पहिलौठा आर, आंदरी नान साटी पवित्र मानसेत; अद नांदा हुन.”
अखमीरी रोट्टी इन हाब्ब
बाक मूसा लॉकुर से अंदुन, “ई दिन इक याद ईटी, यदुर दा नीव लॉकुर दासत्व अन मान्या, मतलब मिस्त्र द्याश टु होटकु बंदीर; यहोवा नीमी अल टु तान कय इन ताकद देल तेगुकु तंदान; इदुर दा खमीरी रोट्टी तिनकु आगबाळुल. आबीब इन तिंगुळ दा ईंद इन दिशी नीव होटीर. इदुरसाटी याग यहोवा नीमी कनानी, हित्ती, एमोरी, हिब्बी, अदिक यबूसी लॉकुर द्याश दा पोहचुस्यान, यदरी कोळोद किर्या आव नीम आप्प दादागोळ से तिंदीदुन, अदिक यदुर दा हाल अदिक शयद इन धारागोळ वाहुसताव, आग नीव ईदा तिंगुळ दा हाब्ब मानसेतीर. येळ दिन ताका अखमीरी रोट्टी तिनतोगेतीर, अदिक सातवा दिशी यहोवा अन साटी हाब्ब मानसेतीर. ई येळु दिनगोळ दा अखमीरी रोट्टी तिनकु आगुल, उलटा नीम द्याश भर दा न खमीरी रोट्टी, न खमीर नीम हात्ती कांळ्सकु बिळुल. अदिक आ दिशी नीव तान तान पारगोळी ईद अंदकु समझुस बुळेतीर कि ईद नाव अदा क्याल्सा अन कारण माळतेव, जो यहोवा नाम मिस्त्र द्याश टु होटकु बरा होती नाम साटी माळीदुन. 2बाक ईद नीम साटी नीम कय दा ऊंद चिन्ह आदीत, अदिक नीम कण्णगोळ मुंद याद माळसुसावाळा वस्तु ठहरूसुल; यदुर दा यहोवा अन व्यवस्था नीम बाय मा ईरूल: यतिकी यहोवा नीमी तान ताकदवर कयगोळ देल मिस्त्र दा टु तेगदान. ई कारण नीव ई विधी इक हर साल सही समय मा मान्सतोगेतीर.
पहिलौठागोळ
“बाक याग यहोवा आ किर्या अन अनुसार, जो आव नीम आप्प दादागोळ से अदिक नीम से भी तिंदान, नीमी कनानीगोळ द्याश दा पोहचुस्कु अदरी नीमी कोट बुट्टान, 3आग नीम दा टु यास तान तान मोय इन पहिलौठा आईर आंदरी, अदिक नीम जनावरगोळ दा जो हींग ईतीदार अवरी भी यहोवा अन साटी अर्पण माळेतीर; सप्पा नर नारी रा यहोवा नोर अच हुव. अदिक गधा अन हर ऊंद पहिलौठा अन बदला पाड्डा कोटकु अदरी बिळसुस बुळेतीर, अदिक अगर नीव अदरी बिळसोद चाहासालीर रा अदुर्द कुतक्या मुरकुळ्स बुळेतीर. लेकीन तान सप्पा पहिलौठा पारगोळी बदला कोटकु बिळ्स कोमेतीर. अदिक मुंदळव दिनगोळ दा याग नीम पारगोळ नीम से केळुल, ‘ईद येन हुन?’ रा आंदुर से अनेतीर, ‘यहोवा नाम लॉकुरी दासत्व अन मान्या दा टु, मतलब मिस्त्र द्याश टु तान कयगोळ ताकद देल तेगुकु तंदान. आ समय याग फिरौन कठ्ठर आगकु नामी होगगोळोद चाहासीदील, आग यहोवा मिस्त्र द्याश दा मंळसागोळ हात्ती टु हुडुकु रा जनावरगोळ ताका सप्पा अन पहिलौठागोळी कोंद बुट्टुन. ईदा कारण जनावरगोळ दा टु यास तान-तान मोय इन पहिलौठा नर आव, अवरी नाव यहोवा अन साटी अर्पण माळतेव; लेकीन तान सप्पा पहिलौठा पारगोळी बदला कोटकु बिळ्स बुळतेव.’ 4ईद नीम कयगोळ मा ऊंद चिन्ह घाई अदिक नीम भऊगोळ्द बीच टिका अन घाई ठहरूसुल; यतिकी यहोवा नाम लॉकुरी मिस्त्र दा टु तान कय इन ताकद देल तेगुकु तंदान.”
बादल इन खम्भा अदिक बेक्की इन खम्भा
याग फिरौन लॉकुरी होगोद आग्या कोट बुट्टुन, आग यतिकी पलिश्तीगोळ्द द्याश दा टु आगतेला जो हादी होगतद अद श्याण्द ईरोद; तरी भी परमेश्वर ईद विचार माळकु आंदरी आ हादी देल वोतीदील कि ईलारा हिंग आगबाळुल कि याग ई लॉकुर लळाई नोळुल आग पछतासकु मिस्त्र अक वापस बरूल. इदुरसाटी परमेश्वर आंदरी चक्कर तिन्सकु क्याचाँद समुद्र अन आळी इन हादी टु ओतुन. अदिक इस्त्राएलीगोळ पात कटकु मिस्त्र दा टु होट बुट्टुर. 6अदिक मूसा यूसुफ उन येलुगोळी सांगुळ हुडुतेला होदुन; यतिकी यूसुफ इस्त्राएलीगोळ से ईद अंदकु, “परमेश्वर जरूर नीम्द सुधी ताकोंडान, आंदरी ई बारा अन धोळ्द किर्या तिन्सीदुन कि आंदुर आऊन येलुगोळी तान सांगुळ ईल टु ओतार.” बाक आंदुर सुक्कोत टु कूच माळकु आळी दी आप्पाटी एताम दा ड्यारा हाकदुर. अदिक यहोवा आंदरी हागुल इन होती हादी तोरसोर साटी बादल इन खम्भा दा, अदिक ईळ्लकी ऊजुळ कोळोर साटी बेक्की इन खम्भा दा आगकु आंदुर मुंद मुंद नळुतोगोन, यदुर देल आंदुर ईळ्लक अदिक हागुल नळु सकुल. आव ना रा बादल इन खम्भा अक हागुल इन होती अदिक ना बेक्की इन खम्भा अक ईळ्लकी लॉकुर मुंदु टु हटुसदुन.
Source notes (6)
- Cross-reference गिनती 3:13; लूका 2:23
- Cross-reference गिनती 15:39; मत्ती 23:5
- Cross-reference निर्गमन 34:19; गिनती 18:15; यहेजकेल 44:30
- Cross-reference व्यवस्थाविवरण 6:8
- Cross-reference गिनती 14:1
- Cross-reference उत्पत्ति 50:25; यहोशू 24:32
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.