परमेश्वर उन वचन
निर्गमन 11
हतवा विपत्ती-धोळ पार उन सायोद चेतावनी
बाक यहोवा मूसा से अंदुन, “मात्त ऊंद मुसीबत ना फिरौन अदिक मिस्त्र द्याश मा हाकतीन, अदुर बाद्दा आव नीम लॉकुरी अल टु होग गोट्टान; अदिक याग होग गोट्टान आग नीम सप्पा मुंदरी निश्चय तेग्द बुट्टान. ईग नान प्रजा अक नान ईद आग्या केळ्स कि ऊंद ऊंद मंळसा अदिक ऊंद ऊंद आर्त तान तान मान्ना हातळोरवाळेर से, व्हान्ना-बेळ्ली इन ईसरावाळी बेळ कोमुल.” 1आग यहोवा मिस्त्रीगोळी तान प्रजा मा दयालु माळदुन. अदुर बाद्दा आव मंळसा मूसा, मिस्त्र द्याश दा फिरौन उन कर्मचारीगोळ अदिक साधारण लॉकुर नजर दा हापाळ महान ईरोन.
बाक मूसा फिरौन से अंदुन, “यहोवा ईत्ता प्रकार देल अनतान: आर्धा ईळ्ल्क इन हात्तीपास ना मिस्त्र द्याश इन बीच दा आगतेला नळाईन. आग मिस्त्र दा सिंहासन मा कुरावाळा फिरौन टु हुडुकु चक्की पिसुसावळ्त दासगीती ताका अन पयला धोळ पारगोळ; उलटा जनावरगोळ ताका अन पयला पाड्डा सोतोदाव. अदिक सप्पा मिस्त्र द्याश दा धोळ्द हाहाकार मचुसेदीत, ईल ताका कि अदुर घाई न रा यागल्यारा आगीदील अदिक न यागलु आदीत. लेकीन इस्त्राएलीगोळ्द खिलाप, येन मंळसागोळ येन जनावरगोळ, यावारा मा यातोदु नाय भी बेगुळतीदील; यदुर देल नीव जान्स कोमी कि मिस्त्रीगोळ अदिक इस्त्राएलीगोळ दा ना यहोवा भेद माळतीन. आग नीनोर ई सप्पा कर्मचारीगोळ नान हात्ती बंदकु म्यांडा बांग्सकु नानी दण्डवत माळकु ईद अंदार, ‘तान सप्पा परिवार इन समेत होटबुळ.’ अदिक अदुर बाद्दा ना होटबुळाईन.” ईद अंदकु मूसा हापाळ सिट्ट दा फिरौन उन हात्ती टु होट बुट्टुन.
यहोवा मूसा से अंद बुटीदुन, “फिरौन नीम मातगोळ केळतीदील; यतिकी नान इच्छा आद कि मिस्त्र द्याश दा हापाळ चमत्कार माळाईन.” मूसा अदिक हारून फिरौन उन मुंद ई सप्पा चमत्कार माळदुर; लेकीन यहोवा फिरौन उन मन मात्त कठोर माळ बुट्टुन, इदुरसाटी आव इस्त्राएलीगोळी तान द्याश दा टु होग गोटीदील.
Source notes (1)
- Cross-reference निर्गमन 3:21
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.