परमेश्वर उन वचन
निर्गमन 1
मिस्त्र दा इस्त्राएलीगोळ्द दुर्दशा
इस्त्राएल मतलब याकूब उन पारगोळ हेसुर, जो तान तान घराना अक हुडुकु याकूब उन सांगुळ मिस्त्र द्याश दा बंदुर, ईंदुर उर: रूबेन, शिमोन, लेवी, यहूदा, इस्साकार, जबूलून, बिन्यामीन, दान, नप्ताली, गाद अदिक आशेर. अदिक यूसुफ रा मिस्त्र दा पयला अच होट बंदीदुन. याकूब उन निज वंश दा जो पैदा आदुर आंदुर सप्पा सत्तर2 लॉकुर ईरोर. यूसुफ अदिक आऊन सप्पा वार्टुर अदिक आऊन पीढ़ी इन सप्पा लॉकुर सोतोदुर. 3लेकीन इस्त्राएल इन सन्तान वाळुसली हतदुर; अदिक आ लॉकुर हापाळ सामर्थी माळतेला होदुर, अदिक ईट वाळुसेदुर कि पुरा द्याश आंदुर से तुम्मेत.
मिस्त्र दा ऊंद व्हाशोव राजा गद्दी मा कुरतुन जो यूसुफ इक ईला जानसोन. आव तान प्रजा से अंदुन, “नोळी, इस्त्राएलीगोळ नाम से गिनती दा अदिक सामर्थ्य दा यक्कुल वाळुसेग्यार. 4इदुरसाटी बरी, नाव आंदुर सांगुळ चतुराई देल बर्ताव माळाता, ईलारा हींग आगबाळुल कि याग आंदुर हापाळ वाळुसेदार अदिक अगर संग्राम इन समय होट बंदीत, रा नाम दुश्मनगोळ से मिलुसकु नाम से लळाई माळुल अदिक ई द्याश टु होटबुळुल.” इदुरसाटी आंदुर आंदुर मा बेगारी माळसुसावाळेरी नियुक्त माळदुर कि आंदुर आंदुर मा भार हाक्क-हाक्कु आंदरी दुख कोळुल; अदिक आंदुर फिरौन उन साटी पितोम अदिक रामसेस हेसुर इन नगरगोळ दा भंडार माळदुर. लेकीन ह्यांग ह्यांग आंदुर आंदरी दुख कोळ्त ईत्तुर, हांग हांग आंदुर वाळुस्त अदिक फैलुसतेला होदुर; इदुरसाटी मिस्त्री लॉकुर इस्त्राएलीगोळ से हापाळ अंजेदुर. तरी भी मिस्त्रीगोळ इस्त्राएलीगोळ से कठोरता अन सांगुळ स्यावा माळसुसदुर, अदिक आंदुर जीवन इक गारा, ईटा अदिक केई इन ब्यार्र-ब्यार्र क्याल्सा अन कठिन स्यावा देल जीना मुश्किल माळ बुट्टुर; जो याता क्याल्सा दा आंदुर आंदुर से स्यावा माळसुसतोगोर अदुर दा आंदुर कठोरता देल व्यवहार माळतोगोर.
शिप्रा अदिक पूआ हेसुर इनोर येढ्ढ इब्री सुईनगितेर इक मिस्त्र अन राजा आग्या कोट्टुन, “याग नीव इब्री आर्तेर्द बारतपन माळा समय नीम इक पता नळुल कि आग अगर पार आगुल रा आऊक कोंद बुळेतीर, अदिक पोर आगुल रा जीत्ता ईर गोळेतीर.” लेकीन आ सुईनगितेर परमेश्वर उन अंज्क मान्सतोगोर, इदुरसाटी मिस्त्र अन राजा अन आग्या ईला मान्सकु पारगोळी भी जीत्ता बिटबुळ तोगोर. आग मिस्त्र अन राजा आंदरी कारसुसकु केळदुन, “नीव जो पारगोळी जीत्ता बिट बुळतीर, रा हींग येती माळतीर?” सुईनगितेर फिरौन उक उत्तर कोट्टुर, “इब्री आर्तेर मिस्त्री आर्तेर घाई हैलेच; आंदुर हींग फुर्तीला आर कि सुईनगितेर्द बरा से पयला अच आंदरी चिग्द पैदा आगेगतद.” इदुरसाटी परमेश्वर सुईनगितेर सांगुळ भलाई माळदुन; अदिक आ लॉकुर वाळुसकु हापाळ सामर्थी आगेदुर. परमेश्वर आंदुर मान्ना बसुसदुन, यतिकी सुईनगितेर परमेश्वर उन अंज्क मान्सतोगोर. आग फिरौन राजा तान सप्पा प्रजा अक आग्या कोट्टुन, “इब्रीगोळोर यासारा भी पारगोळ पैदा आदार आ सप्पा मुंदुरी नीव नील गांगा दा हाक्क बुळेतीर, अदिक सप्पा पोरगोळी जीत्ता ईरगोळेतीर.”
Source notes (4)
- Cross-reference उत्पत्ति 46:8-27
- Footnote येनारा शास्त्र लेखगोळ दा पच्यात्तर जन लिख्सकु आग्याद
- Cross-reference प्रेरितगोळ 7:17
- Cross-reference प्रेरितगोळ 7:19
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.