इफिसिगोळ 4

मसीह अन मय दा एकता

1इदुरसाटी ना जो प्रभु दा बंदीन नीम से विनती माळतीन कि या बुलाहट देल नीव कारूकु आगीदीर, अदुर लायक व्यवहार माळी, 21मतलब पुरा दीनता अदिक नम्रता सहित, अदिक धीरज हुळकु प्यार देल आबुर दाबुर्द सहन माळी; 3अदिक मेल इन बंधन दा आत्मा अन्द एकता ईटोद यत्न माळी. 4ऊंद अच मय आद अदिक ऊंद अच आत्मा; ह्यांग नीमी जो कारूकु आगीदीर तान कारूकु आगोर देल ऊंद अच आशा आद. 5ऊंद अच प्रभु आन, ऊंद अच विश्वास ऊंद अच बपतिस्मा, 6अदिक सब मुंदुरव ऊंद अच परमेश्वर अदिक आप्प आन, जो सप्पा मुंदुर म्याकुच अदिक सप्पा मुंदुर बीच दा अदिक सब मुंदुर दा आन.

7लेकीन नाम दा टु हर ऊंद मंळसा अक मसीह अन्द दान इन परिमाण इन अनुसार अनुग्रह सिक्याद. 8इदुरसाटी आव अनतान:

“आव ऊँचाई मा येरदुन

अदिक बंदीगोळ इक कटकु ओतुन,

अदिक मंळसागोळ इक दान कोट्टुन.”

9आऊन येरदुर देल, अदिक येन सिकतद सिर्फ ईद कि अद पृथ्वी इन ल्यालमा जागागोळ्द दा ईळसी भी दुन. 10अदिक जो ईळदुन ईव आवा हुन जो पुरा आकाश टु म्याकुच येरे भी दुन कि सब येनारा परिपुर्ण माळुल. 11आव थ्वाळासा लॉकुरी प्रेरित नियुक्त माळकु, अदिक थ्वाळासा लॉकुरी भविष्यवक्ता नियुक्त माळकु, अदिक थ्वाळासा लॉकुरी खुशखबरी केळावाळेर नियुक्त माळकु, अदिक थ्वाळासा लॉकुरी रखवाला अदिक उपदेशक नियुक्त माळकु कोट बुट्टुन, 12यदुर देल पवित्र लॉकुर सिद्ध आगेगुल अदिक स्यावा अन्द क्याल्सा माळकु आगुल अदिक मसीह अन्द मय इक उन्नती सिक्‍कुल, 13यागासताका कि नाव सब इन सब विश्वास अदिक परमेश्वर उन पार उन पहचान दा ऊंद आगबाळुल, अदिक ऊंद सिद्ध मंळसा आगबाळुल अदिक मसीह अन्द पुरा डील-डौल ताका ना वाळुसुल. 14ताकी नाव मुंदु टु चिकोर ईरतीदील जो मंळसागोळ्द ठग-विद्या अदिक चतुराई देल, आंदुर भ्रम इन युक्तिगोळ्द अदिक उपदेश इन हर ऊंद ध्वाका देल उछलस्कु अदिक ईल अल तिर्गुसकु आगताव. 15बल्‍की प्यार दा सच्चाई देल माताळतेला सब मातगोळ दा अदुर्दा जो ताल्ला आद, मतलब मसीह दा वाळुसतेला होगुल, 162यदुर देल पुरा मय, हर ऊंद जोळ इन सहायता देल ऊंद सांगुळ मिलुसकु अदिक ऊंद सामर्थ्य सांगुळ गठुस्कु, आ प्रभाव उन अनुसार जो हर ऊंद अंग इन ठीक-ठीक कार्य माळोर द्वारा आऊन दा आगतद, तान तान इक वाळुसतद कि आव प्यार दा उन्नती माळतेला होगुल.

मसीह दा व्हाशोद जीवन

17इदुरसाटी ना ईद अनतीन अदिक प्रभु दा आग्रह माळतीन कि ह्यांग गैरयहूदी लॉकुर तान मन इन अनर्थ रीति मा नळुतार, नीव ईगी टु बाक हिंग व्यवहार माळबाळेतीर. 18यतिकी आंदुर बुद्धी भ्रष्ट आगेग्याद, अदिक आ अग्यानता अन्द कारण जो आंदुर दा आद अदिक आंदुर मन इन कठोरता अन्द कारण आंदुर परमेश्वर उन जीवन टु अलग माळकु आदुर; 19अदिक आंदुर सुन्न आगकु लुचपन दा हतेदुर कि सब प्रकार इन खराब क्याल्सा लालसा देल माळुल.

20पर नीव मसीह अन्द हिंग शिक्षा ताकोंडीदील. 21बल्‍की नीव खराखुरा आऊंदा केळदीर अदिक, ह्यांग यीशु दा सच्चाई आद, अदुर दा कल्सकु भी आग्यार 223कि नीव पिछला चाल चलन इक हाळोद मंळसातत्व अक जो भरमुसावळ्त अभिलाषागोळ्द अनुसार भ्रष्ट आगेगतद, ईळु बुळी 23अदिक तान मन इन आत्मिक स्वभाव दा व्हाशोद बन्सतेला होगी, 244अदिक व्हाशोद मंळसातत्व अक हाक्‍क कोमी जो परमेश्वर उन अनुरूप सच्चाई इन न्यायीपन अदिक पवित्रता दा सजुस्कु आग्याद.

25ई कारण ख्वाटा माताळोद बिटकु हर ऊंद मंळसा तान मान्ना हातळोर से सही माताळुल, यतिकी नाव आपस दा आबुर दाबुर अंग हुयेव. 26सिट्ट रा माळी, पर पाप माळबाळी; सुर्य मुळका ताका नीम्द गुस्सा ईरबाळुल, 27अदिक ना शैतान उक मवका कोळी. 28काळताना माळावाळा बाक काळताना माळबाळुल, बल्‍की वळ्लीद क्याल्सा माळोर साटी तान कयगोळ देल मेहनत माळुल, इदुरसाटी कि यारी प्रयोजन आद आऊक कोळली आऊन हात्‍ती येनारा ईरूल. 29यातोदु सही मात नीम्द बाय देल होळबाळुल, पर जरवत इन अनुसार अदा होळुल जो उन्नती इन साटी वळ्लीद ईरूल, ताकी आऊन से केळावाळेर मा अनुग्रह ईरूल. 30परमेश्वर उन पवित्र आत्मा अक दुख माळबाळी, यदुर देल नीम मा छुटकारा अन्द दिन इन साटी छाप कोटकु आग्याद. 31सब प्रकार इन कळवाहट, अदिक प्रकोप अदिक सिट्ट, अदिक कलह, अदिक अपमान, सप्पा बैरभाव समेत नीम से दुर माळकु आगुल. 325आबुर दाबुर मा कृपा माळी अदिक मेहरबान आगी, अदिक ह्यांग परमेश्वर मसीह दा नीम्द अपराध माफ माळदुन, हांग अच नीव भी आबुर दाबुर्द अपराध माफ माळी.