परमेश्वर उन वचन
इफिसिगोळ 3
गैरयहूदीगोळ दा पौलुस उन स्यावा
ईदा कारण ना पौलुस जो नीव गैरयहूदीगोळ्द साटी मसीह यीशु दा बंदीन. अगर नीव परमेश्वर उन आ अनुग्रह अन्द प्रबन्ध इन समाचार केळीदीर, जो नीम्द साटी नानी कोटकु आग्याद, मतलब ईद कि अद भेद नान मा प्रकाशन इन द्वारा प्रगट आत, ह्यांग ना पयला अच थ्वाळासा दा लिख्सदीन, 1यारी नीव वाचुसकु जान्स सकतीर कि ना मसीह अन्द अद भेद यल ताका सम्सतीन. जो अन्य समयगोळ दा मंळसागोळ्द औलादगोळ इक हिंग ईला हेळकु आगीत, ह्यांग कि आत्मा अन्द द्वारा ईग आऊन पवित्र प्रेरितगोळ अदिक भविष्यवक्तागोळ मा प्रगट माळकु आग्याद. मतलब ईद कि मसीह यीशु दा खुशखबरी इन द्वारा गैरयहूदी लॉकुर मीरास दा हिस्सेदार, अदिक ऊंद अच मय इन अदिक वादा अन्द भागी आर.
ना परमेश्वर उन अनुग्रह अन्द आ दान इन अनुसार, जो आऊन सामर्थ्य अन्द प्रभाव इन अनुसार नानी कोटकु आग्याद, आ खुशखबरी इन सेवक बन्सदीन, नान मा जो सप्पा पवित्र लॉकुर दा टु स्याणेर दा टु भी स्याणेव आईन, ईद अनुग्रह आत कि ना गैरयहूदीगोळ इक मसीह अन्द अगम्य धन इन खुशखबरी केळ्साईन, अदिक सब मा ईद मात प्रकाशित माळुल कि आ भेद इन प्रबन्ध येन आद, जो सप्पा मुंदुर सृजनहार परमेश्वर दा सुरूवात टु गुप्त ईरोद. ताकी ईग मंडली इन द्वारा, परमेश्वर उन अलग अलग प्रकार इन ग्यान आ प्रधानगोळी अदिक अधिकारीगोळ मा जो स्वर्गीय जागा दा आर, प्रगट माळकु आगुल. आ अनन्त मंळसा अन्द अनुसार जो आव नाम प्रभु मसीह यीशु दा माळीदुन. यदुर दा नामी आऊन मा विश्वास माळदुर देल साहस अदिक भरोसा अन्द सांगुळ परमेश्वर उन हात्ती बरोद अधिकार आद. इदुरसाटी ना विनती माळतीन कि जो क्लेश नीम साटी नानी आगेत्याद, अदुर कारण साहस बिळबाळी, यतिकी अदुर दा नीम्द महिमा आद.
मसीह अन्द प्यार
ना ईदा कारण आ पृथ्वी मा आप्प उन मुंद ट्वांगरा टेक्सतीन, यदुर देल स्वर्ग अदिक पृथ्वी मा, हर ऊंद घराना अन्द हेसुर ईटकु आगतद, कि आव तान महिमा अन्द धन इन अनुसार नीमी ईद दान कोळुल कि नीव आऊन आत्मा देल तान बुळ्क इन मंळसातत्व दा सामर्थ्य हासिल माळकु बलवन्त आगतेला होगी; अदिक विश्वास इन द्वारा मसीह नीम्द दिल दा कुरूल कि नीव प्यार दा जळ हुळकु अदिक पायवा हाक्कु, सप्पा पवित्र लॉकुर्द सांगुळ भला-भाति समसोद शक्ति सिकुल कि आऊन चौळाई, अदिक लंबाई, अदिक ऊँचाई, अदिक गहराई याट आद, अदिक मसीह अन्द आ प्यार इक जान्स सकी जो ग्यान देल अनजान आर कि नीव परमेश्वर उन पुरा भरपुरी ताका परिपुर्ण आगेगी.
ईग जो हिंग सामर्थी आन कि नाम्द विनती अदिक समझ देल मात्त यक्कुल क्याल्सा माळ सकतान, आ सामर्थ्य अन्द अनुसार जो नाम दा कार्य माळतान, मंडली दा अदिक मसीह यीशु दा आऊन महिमा पीढ़ी टु पीढ़ी ताका हमेशा हमेशा आगतेला ईरूल. आमीन.
Source notes (1)
- Cross-reference कुलुस्सिगोळ १:२६,२७
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.